ມູນນິທິໃຈບຸນແຫ່ງ ປະເທດໄທ, ຄອບຄົວນັກທຸລະກິດ, ບໍລິສັດ, ຫ້າງຮ້ານ, ພາກສ່ວນລັດ ແລະ ປະຊາຊົນໄດ້ປະກອບສ່ວນສົມທົບທຶນ ກໍ່ສ້າງເສັ້ນທາງເບຕົງເຂົ້າໂຮງໝໍ ເມືອງທ່າແຕງ ມູນຄ່າການກໍ່ສ້າງ ຈຳນວນ 35 ລ້ານກີບ ທີ່ມີຄວາມຍາວ 100 ແມັດ, ກ້ວາງ 5 ແມັດ ແລະ ໜາ 10 ຊັງຕີແມັດ.
ທ່ານ ກໍລະກັນ ບຸດສະບາ ຮອງຫົວໜ້າ ຫ້ອງການສາທາລະນະສຸກ ເມືອງທ່າແຕງ ໃຫ້ຮູ້ວ່າ: ການກໍ່ສ້າງເສັ້ນທາງເສັ້ນທາງເບຕົງເຂົ້າໂຮງໝໍເມືອງ ແມ່ນການປະກອບສ່ວນແຮງງານຂອງ ພະນັກງານ ໂຮງໝໍເມືອງ, ທະຫານເມືອງ ແລະ ປະຊາຊົນ ບ້ານທ່າແຕງໃຕ້ ຫຼາຍກວ່າ 2 ຮ້ອຍຄົນ ເຊິ່ງການກໍ່ສ້າງແມ່ນຈະໃຫ້ສຳເລັດພາຍໃນ 1 ອາທິດເລີ່ມແຕ່ມື້ລົງມືກໍ່ສ້າງ ໃນທ້າຍອາທິດຜ່ານມາ ນອກຈາກການກໍ່ສ້າງເສັ້ນທາງສຳເລັດ ກໍຍັງ ຈະຕິດຕັ້ງລະບົບໄຟເຍືອງທາງຕື່ມອີກ. ໃນໄລຍະຜ່ານມາຍ້ອນວ່າ ເສັ້ນທາງເຂົ້າໂຮງໝໍ ແມ່ນເສັ້ນທາງດິນແດງ ເມື່ອຮອດລະດູຝົນ ເຮັດໃຫ້ເປັນບວກ - ເປັນຂຸມເຊິ່ງເຮັດໃຫ້ບໍ່ສະດວກໃນການໄປມາ ແລະ ຮອດລະດູແລ້ງກໍມີຂີ້ຝຸ່ນ ຂີ້ໄງ່ ໂດຍເຮັດໃຫ້ໂຮງໝໍເປີ໊ເປື້ອນ ບໍ່ສະອາດ, ສະນັ້ນຈິ່ງມີຄວາມຈໍາເປັນ ປັບປຸງ ແລະ ກໍ່ສ້າງເສັ້ນທາງໃຫມ່ ເພື່ອເຮັດໃຫ້ມີຄວາມສະດວກ - ສາບາຍ, ສະອາດ ແລະ ດີຂຶ້ນກົ່ວເກົ່າ.
ຮອງຫົວໜ້າຫ້ອງການ ສາທາລະນະສຸກ ເມືອງທ່າແຕງ ໄດ້ກ່າວສະແດງຄວາມຂອບໃຈ ພ້ອມທັງອວຍພອນ ມາຍັງ ທຸກພາກສ່ວນ ທີ່ ໃຫ້ການຊ່ວຍເຫຼືອໃນຄັ້ງນີ້ ຈົ່ງຢູ່ດີມີສຸກທຸກທົ່ວຫນ້າ.
Editor: ສິງຫາ ເລືອງວັນ
