ການຈັດຊຸດອົບຮົມແກ່ສື່ມວນຊົນລາວ ຄັ້ງນີ້ ແມ່ນໄດ້ຈັດເປັນເວລາ 5 ວັນ ນັບແຕ່ວັນທີ 12-16 ມີຖຸນາ 2017 ແລະ ໄດ້ປິດລົງຢ່າງເປັນທາງການໃນວັນທີ 16 ມີຖຸນາ ທີ່ຜ່ານມາ. ເຊິ່ງການອົບຮົມດັ່ງກ່າວ ອິງໃສ່ແຜນການຮ່ວມມື ສອງຝ່າຍ ລະຫວ່າງ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ສປປ ລາວ ແລະ ກະຊວງຖະແຫລງຂ່າວ ແລະ ສື່ສານ ສາທາລະນະລັດ ສັງຄົມນິຍົມ ຫວຽດນາມ. ໂດຍແມ່ນສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ຮ່ວມກັບ ກົມສື່ມວນຊົນ ແຫ່ງ ສສ ຫວຽດນາມ ເປັນຜູ້ຈັດຕັ້ງປະຕິບັດ. ຊຸດອົບຮົມຄັ້ງນີ້ ພາຍໃຕ້ຫົວຂໍ້: ທັກສະການວິເຄາະ ແລະ ບັນນາທິການຂໍ້ມູນຂ່າວສານທາງອິນເຕີເນັດ ໃນນັ້ນແມ່ນໄດ້ຍົກໃຫ້ເຫັນວ່າ: ອິນເຕີເນັດ ແລະ ສື່ສັງຄົມອອນລາຍ ແມ່ນມີຂອບເຂດການພົວພັນຢ່າງກວ້າງຂວາງ ແລະ ທຸກຄົນສາມາດເຂົ້າເຖິງແຫລ່ງຂໍ້ມູນຂ່າວສານໄດ້ຢ່າງທົວເຖິງ, ການແລກປ່ຽນບົດຮຽນ, ການສະແດງຄຳຄິດເຫັນແບບອິດສະຫລະ, ຄຳຄິດເຫັນທາງດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມຕ່າງໆ. ດ້ວຍຈັ່ງຫວະທີ່ວ່ອງໄວ ແລະ ກວ້າງຂວາງ. ສະນັ້ນ, ໃມນເວລາມີເຫດການໃດຫນຶ່ງເກີດຂື້ນ ແມ່ນມີຜົນກະທົບຢ່າງໄວວາຕໍ່ສັງຄົມ ແລະ ເປັນເວທີ ໃຫ້ກຸ່ມຄົນບໍ່ດີສວຍໃຊ້.
ດັ່ງນັ້ນ. ພາລະບົດບາດຂອງສື່ມວນຊົນ ແມ່ນສ່ອງແສງ, ຕິດຕາມກວດກາຕໍ່ກັບສັງຄົມ, ເຊີ່ງນັກຂ່າວແຕ່ລະຄົນ ແມ່ນໄດ້ວາງຈຸດປະສົງ ເປົ້າຫມາຍ ແລະ ວີເຄາະກ່ຽວກັບເຫດການທີ່ເກີດຂື້ນກ່ອນການນຳສະເຫນີຂ່າວອອກໄປ. ແຕ່ຂໍ້ມູນທາງອິນເຕີເນັດແມ່ນຕ້ອງໄດ້ຕິດຕາມກວດກາທຸກເວລາ, ນາທີ ສ່ອງແສງໃຫ້ເຫັນທຸກການເຄື່ອນໄຫວ ແຕ່ນ້ອຍຫາໃຫຍ່ ຂອງສັງຄົມ. ກົງກັນຂ້າມຂໍ່ມູນຂ່າວທາງອິນເຕີເນັດແມ່ນມີຫລວງຫລາຍ ແລະ ມີຫລາຍຫລຽມ-ຫລາຍສີ ທາງຖືກ ແລະ ຜິດ. ສະນັ້ນ, ເພື່ອໃຫ້ຖືກຕ້ອງກ່ຽວກັບການນຳໃຊ້ຂໍ້ມູນທາງອິນເຕີເນັດ ນັກຂ່າວແມ່ນຕ້ອງໄດ້ວິເຄາະ, ກວດກາຢ່າງຄັກແນ່ ເພື່ອຫລີກລ້ຽງບັນດາຫົວຂໍ້ທີ່ບິດເບືອນຄວາມຈີງ, ໄປໃນທາງທີ່ບໍ່ດີ. ທັງນີ້ເພື່ອການນຳໃຊ້ຂໍ້ມູນຢ່າງຖືກຕ້ອງ ແລະ ຂ່າວສານທີ່ສາອາດ. ຕໍ່ກັບບັນຫານີ້, ໃນຍຸກແຫ່ງວິທະຍາສາດ ແລະ ເຕັກໂນໂລຊີ ທີ່ຂະຫຍາຍຕົວໄວແບບກ້າວກະໂດດ ນັກຂ່າວຕ້ອງມີລະດັບຄວາມຮູ້, ຄວາມສາມາດທາງດ້ານວິທະຍາສາດ ແລະ ເຕັກໂນໂລຊີ, ພ້ອມກັນນັ້ນຕ້ອງກຳໄດ້ຍຸດທະສາດແນວທາງຂອງພັກ-ລັດຖະບານ, ມີຈັນຍາບັນ ແລະ ຄຸນສົມບັດຂອງນັກຂ່າວ ເພື່ອເປັນເຈົ້າການໃນຍຸກແຫ່ງເຕັກໂນໂລຊີ-ຂ່າວສານ. ຈິ່ງເຮັດໃຫ້ມີການຈັດຊຸດອົບຮົມນີ້ຂື້ນມາ.
ຊຸດອົບຮົມ ຄັ້ງນີ້ ມີນັກສຳມະນາກອນ ເຂົ້າຮ່ວມທັງໝົດ 42 ທ່ານ, ທີ່ມາຈາກຫລາຍພາກສ່ວນ ທັງສູນກາງ ແລະ ທ້ອງຖິ່ນ, ວິທະຍຸ, ໂທລະພາບ, ສີືສິ່ງພີມ, ວາລະສານ, ເວບໄຊອິນເຕີເນັດ ແລະ ພາກສ່ວນທີ່ກ່ຽວຂ້ອງ. ເຊິ່ງໄລຍະ ການອົບຮົມ ເຖິງຈະສັນກໍ່ຕາມ ແຕ່ການຄົ້ນຄວ້າຮ່ຳຮຽນ ແມ່ນເຕັມໄປດ້ວຍຄວາມສຳຄັນ ທັງພາກທິດສະດີ ແລະ ປະຕິບັດຕົວຈິງ.
Editor: ກຳປານາດ ລັດຖະເຮົ້າ
