ເມື່ອບໍ່ດົນນີ້,ຢູ່ຫ້ອງປະຊຸມສາທາລະນະສຸກເມືອງເຊໂປນ ໄດ້ຈັດກອງປະຊຸມສະຫຼຸບປະເມີນຄືນບ້ານແບບຢ່າງສາທາລະນະສຸກ. ໂດຍການເຂົ້າຮ່ວມຂອງ ທ່ານ ດຣ ບົງສຸວັນ ພັນທະວົງສາ ຫົວໜ້າພະແນກສາທາລະນະສຸກແຂວງ ພ້ອມຄະນະ, ທ່ານ ໝໍເພັດສົມພອນ ນັນສູນທະວົງ ຮອງຫົວໜ້າຫ້ອງການສາທາລະນະສຸກປະຈຳເມືອງເຊໂປນ, ມີບັນດາໜ່ວຍງານສາທາລະນະສຸກແຂວງ, ຫນ່ວຍງານສາທາລະນະສຸກເມືອງ, ບ້ານແບບຢ່າງສາທາລະນະສຸກ ບ້ານຫ້ວຍສານ ແລະ ບ້ານໂພນໄຮ ເຂົ້າຮ່ວມ.
ກອງປະຊຸມດັ່ງກ່າວ ຈັດຂື້ນເພື່ອປະເມີນຄືນບ້ານແບບຢ່າງສາທາລະນະສຸກ ເຊິ່ງມີສອງບ້ານຫ້ວຍສານ ແລະ ບ້ານໂພນໄຮ່, ຜ່ານມາທີມງານສາທາລະນະສຸກ ໄດ້ລົງເຮັດກິດຈະກຳທາງດ້ານໂຄສະນາ ສຸຂະສຶກສາ ຮອບດ້ານ ຄື: ການຈັດຫານໍ້າສະອາດ, ມີຂະບວນການອານາໄມສາມສະອາດພາຍໃນບ້ານ, ການເຝຶກອົບຮົບໃຫ້ ອສບ ( ອາສາສະມັກບ້ານ) ມີການປະກອບສ່ວນຊຸກຍູ້ວຽກງານສັກຢາຢອດຢາກັນພະຍາດໃຫ້ເດັກ ແລະ ແມ່ຍິງຖືພາ ໃນເກນອາຍຸ 15-49 ປີ, ມີຂະບວນການເພື່ອຄວາມປອດໄຟຂອງການຖືພາ ແລະ ເກີດລູກ, ຊຸກຍູ້ໃຫ້ແມ່ເກີດລູກໃໝ່ ໃຫ້ເດັກກິນນົມເຫຼືອງທັນທີ ແລະ ກິນນົມແມ່ຢ່າງດຽວ ແຕ່ມື້ເກີດ ຫາ 06 ເດືອນ ແລະ ໂພສະນາການອື່ນໆອີກດ້ວຍ. ໃນທີ່ປະຊຸມບັນດາແຂກເຂົ້າຮ່ວມ ໄດ້ປະກອບຄຳຄິດຄຳເຫັນແລກປ່ຽນເຈາະຈິ້ມບັນຫາທີ່ຍັງຄົງຄ້າງ ເພື່ອນຳມາປັບປຸງແກ້ໄຂໃຫ້ສອດຂ້ອງກັບວຽກງານຕົວຈິງ.
ໃນກອງປະຊຸມ ທ່ານ ດຣ ບົງສຸວັນ ພັນທະວົງສາ ໄດ້ມີຄຳເຫັນຕໍ່ທີ່ປະຊຸມຊື່ງເພິ່ນໄດ້ເນັ້ນໜັກ 04 ບັນຫາ ຄື: ເລື່ອງການຫຼຸດຜ່ອນອັດຕາການຕາຍຂອງແມ່ ແລະເດັກ, ການມາຝາກທ້ອງຕາມສະຖານທີ່ຕາມບໍລິການສາທາລະນະສຸກ ຫຼື ຫລາຍກວ່ານັ້ນ ແລະ ຕ້ອງມາເກີດລູກຢູ່ສະຖານທີ່ຕາມບໍລິການສາທາລະນະສຸກ ແລະ ວຽກງານກອງທຶນປະກັນສຸຂະພາບຂອງຊຸມຊົນ, ສະນັ້ນ ເພິ່ນຈຶ່ງຮຽກຮ້ອງໃຫ້ຜູ້ທີ່ຮັບຜິດຊອບນີ້ລົງຕິດຕາມຢ່າງໃກ້ຊິດໂຄສະນາເຜີຍແຜ່ໃຫ້ພໍ່ແມ່ປະຊາຊົນ ໄດ້ຮັບຮູ້ເຂົ້າໃຈກ່ຽວກັບການໄປຫາແພດໝໍ ເວລາເຈັບເປັນມັນມີຜົນດີແນວໃດ ແລະ ຢາກໃຫ້ທັງສອງບ້ານ ນຳເອົາເນື້ອໃນໃນຄັ້ງນີ້ນຳໄປເຜີຍແຜ່ໃຫ້ພໍ່ແມ່ປະຊາຊົນພາຍໃນບ້ານຂອງຕົນໃຫ້ເຂົ້າໃຈ ແລະ ພ້ອມກັນນຳໄປຈັດຕັ້ງປະຕິບັດໃຫ້ປະກົດຜົນເປັນຈິງ.
Editor: ກຳປານາດ ລັດຖະເຮົ້າ
