ຫ້ອງການອຸດສາຫະກຳ ແລະ ການຄ້າ ຮ່ວມກັບ ຫ້ອງການເຕັກໂນໂລຊີ ຫ້ອງການກະສິກຳ ແລະ ປ່າໄມ້ ແລະ ຫ້ອງການສາທາລະນະສຸກ ເມືອງ ທ່າແຕງ ແຂວງ ເຊກອງ ຈັດພິທີ ທຳລາຍສິນຄ້າໝົດອາຍຸການນຳໃຊ້ ແລະ ບໍລິໂພກ, ໃນວັນທີ 14 ມິຖຸນາ 2017 ນີ້. ເຊິ່ງມີ ທ່ານ ສົມເພັດ ເອີດລັດດາ ຮອງເຈົ້າເມືອງໆ ທ່າແຕງ,ມີ ທ່ານ ສຸພາວັນ ໄຊຍະວົງຄຳດີ ຕ່າງໜ້າພະແນກ ອຸດສາຫະກຳ ແລະ ການຄ້າ ແຂວງ ເຊກອງ ພ້ອມດ້ວຍພາກສ່ວນກ່ຍວຂ້ອງເຂົ້າຮ່ວມເປັນສັກຂີພິຍານ.
ໃນພິທີ ທ່ານ ບຸນຫຼາຍ ບຸບຜາພັນ ຄະນະຫອ້ງການ ອຸດສາຫະກຳ ແລະ ການຄ້າ ເມືອງ ທ່າແຕງ ກ່າວວ່າ: ອີງຕາມກົດໝາຍວ່າດວ້ຍການປົກປອ້ງຜູ້ຊົມໃຊ້ ສະບັບເລກທີ 02/ສພຊ ລົງວັນທີ 30 ມິຖຸນາ 2010 ແລະ ອີງຕາມ ຂໍ້ຕົກລົງຂອງ ທ່ານເຈົ້າເມືອງໆ ທ່າແຕງ ສະບັບເລກທີ 246/ຈມ ລົງວັນທີ 25 ພຶດສະພາ 2017 ວ່າດວ້ຍ ການທຳລາຍສິນຄ້າໝົດອາຍຸການນໍາໃຊ້ ແລະ ບໍລິໂພກ. ເພື່ອເຮັດໃຫ້ວຽກງານປົກປອ້ງຜູ້ຊົມໃຊ້ໃນ ເມືອງທ່າແຕງ ໄດ້ຮັບການຈັດຕັ້ງປະຕິບັດ ໃຫ້ໄດ້ຮັບຜົນ . ທາງຄະນະວິຊາການ ອົງການຈັດຕັ້ງປະຕິບັດວຽກງານປົກປອ້ງຜູ້ຊົມໃຊ້ ໄດ້ລົງກວດກາ ແລະ ຢຶດສິນຄ້າໝົດອາຍຸການນຳໃຊ້ ໃນວັນທີ 9-11 ພຶດສະພາ 2017 ປະເພດສິນຄ້າທີ່ຢຶດມາໄດ້ປະກອບມີ: ນ້ຳອັດລົມ, ອາຫານເສີມເດັກນອ້ຍ, ເຂົ້າໜົມ, ນົມ, ເຄື່ອງດື່ມ ແລະ ຢາສູບ, ລວມມູນຄ່າເປັນເງິນທັງໝົດປະມານ 11 ລ້ານ 8 ແສນກວ່າກີບ.
ໂອກາດນີ້ ທ່ານ ສົມເພັດ ເອີດລັດດາ ຮອງເຈົ້າເມືອງ-ເມືອງ ທ່າແຕງ ໄດ້ມີຄໍາເຫັນຕໍ່ພິທີທຳລາຍສິນຄ້າດັ່ງກ່າວ ຊຶ່ງທ່ານໄດ້ເນັ້ນ ໃຫ້ອົງການຈັດຕັ້ງປະຕິບັດວຽກງານປົກປອ້ງຜູ້ຊົມໃຊ້ ເອົາໃຈໃສ່ ສືບຕໍ່ຈັດຕັ້ງປະຕິບັດວຽກງານດັ່ງກ່າວໃຫ້ທົ່ວເຖິງ ເພື່ອເຮັດໃຫ້ຜູ້ບໍລິໂພກພາຍໃນເມືອງ ມີຄວາມປອດໄພຈາກສິນຄ້າທີ່ໝົດອາຍຸ ແລະ ຂໍໃຫ້ຜູ້ປະກອບການທຸກພາກສວ່ນ ຈົ່ງໃຫ້ການຮວ່ມມືກັບພາກສວ່ນທີ່ກ່ຽວຂອ້ງດວ້ຍຄວາມຈິງໃຈ ໃນເວລາລົງປະຕິບັດວຽກງານດັ່ງກ່າວ. ຫຼັງຈາກນັ້ນ ກໍ່ໄດ້ລົງມື ຈູດທຳລາຍສິນຄ້າດັ່ງກ່າວ ຢ່າງເປັນທາງການ.
Editor: ສິງຫາ ເລືອງວັນ
