ສະມາຄົມເຟີນີເຈີລາວ(ສຟລ) ໄດ້ຖະແຫຼ່ງຂ່າວກຽມຈັດງານວາງສະແດງ ເຄື່ອງເຮືອນລາວຄັ້ງທີ 2 ຫຼື 2nd Lao Home and Living Fair 2017 ທີ່ສູນການຄ້າ ລາວໄອເຕັກ ໂດຍການເປັນປະທານຂອງທ່ານ ດາວວອນ ພະຈັນທະວົງ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ມີປະທານ - ຮອງປະທານ ສະມາຄົມເຟີນິເຈີລາວ, ປະທານສະພາການຄ້າ ແລະ ອຸດສາຫະກຳ ນະຄອນຫລວງ, ຄະນະບໍລິຫານງານ ພ້ອມດ່້ວຍ ສະມາຊິກ ສະມາຄົມເຟີນິເຈີລາວ ແລະ ສື່ມວນຊົນເຂົ້າຮ່ວມ. ທ່ານ ກອງມາລາ ພົມມາໄລ, ຮອງປະທານສະມາຄົມເຟີນິເຈີລາວ ເປີດເຜີຍວ່າ: ງານວາງສະແດງເຄື່ອງເຮືອນ ຄັ້ງທີ 2 ຈະຈັດຂຶ້ນໃນ ລະຫວ່າງ ວັນທີ 8-16 ກໍລະກົດ ທີ່ຈະມາເຖິງ ທີ່ສູນການຄ້າລາວໄອເຕັກ (ຕືກເກົ່າ) ເພື່ອເປັນການໂຄສະນາເຜີຍແຜ່ໃຫ້ສັງຄົມຮັບຮູ້ ແລະ ເຂົ້າໃຈກ່ຽວກັບຜະລິດຕະພັນເຄື່ອງເຮືອນລາວ ຫລາຍຂຶ້ນ, ໃຫ້ຜູ້ຜະລິດ ສາມາດເຂົ້າຫາຕະຫຼາດ ແລະ ຈຳໜ່າຍສິນຄ້າໄດ້ທັງພາຍໃນ ແລະ ຕ່າງປະເທດ ແລະ ກ້າວເຂົ້າສູ່ການສ້າງຕາໜ່າງການວາງສະແດງ - ຂາຍສິນຄ້າກັບພາກພື້ນ ແລະ ສາກົນໃນອະນາຄົດ ເພື່ອຮອງຮັບການພັດທະນາຂອງສະມາຄົມເຟີນິເຈີລາວໃນຕໍ່ໜ້າ. ງານວາງສະແດງເຄື່ອງເຮືອນລາວຄັ້ງທີ 2 ຈະເປັນເວທີ ທີ່ເຕົ້າໂຮມພູມປັນຍາ, ເຕົ້າໂຮມປະສົບການຈາກຜູ້ປະກອບການຈາກຕ່າງປະເທດ ເພື່ອມາຫາລື ແລກປ່ຽນນຳກັນ ພ້ອມເປັນໂອກາດທີ່ດີໃຫ້ຜູ້ປະກອບການ ແລະ ລູກຄ້າໄດ້ມາຮູ້ຈັກ ແລະ ພັດທະນາສິນຄ້າໄປພ້ອມໆກັນ. ທາງດ້ານທ່ານ ຄໍາໄພ ສົມຊະນະ, ປະທານສະມາຄົມເຟີນີເຈີໄດ້ກ່າວວ່າ: ວຽກງານວາງສະແດງເຟີນິເຈີຖືເປັນວຽກງານໜຶ່ງທີ່ມີຄວາມສຳຄັນທີ່ສຸດ ສຳລັບຫົວໜ່ວຍທຸລະກິດເຟີນີເຈີຂອງພວກເຮົາເປັນວຽກງານໜຶ່ງທີ່ເຮັດ ຜູ້ປະກອບການ ໄດ້ນຳເອົາຜົນງານ ຫຼື ຜະລິດຕະພັນໃໝ່ໆ ທີ່ເປັນສີໄມ້ລາຍບມືຂອງນາຍຊ່າງເຮົາ ບວກກັບເປັນໄມ້ທີ່ມີຄຸນຄ່າສູງ ມີຄຸນນະພາບດີ ມາວາງສະແດງຊື້-ຂາຍ ໃຫ້ຜູ້ເຂົ້າມາຊົມງາມມີໂອກາດ ຈັບຈ່າຍຊື້-ຂາຍ ທັງເປັນການຕອບສະໜອງ ຕາມຄວາມຮຽກຮ້ອງຕ້ອງການຂອງສັງຄົມປັດຈຸບັນ ແລະ ກ້າວເຂົ້າຫາຕະຫຼາດພາກພື້ນ ແລະ ສາກົນໃນອະນາຄົດໃກ້ໆນີ້. ພ້ອມດຽວກັນໃນແຕ່ລະຄໍາຄືນ ຍັງຈະມີກິດຈະກໍາອື່ນໆອີກຫຼາກຫຼາຍ ເພື່ອດຶງດູດມວນຊົນເຂົ້າມາຮ່ວມງານຄາດຄະເນຕະຫຼອດງານ ຈະມີຜູ້ເຂົ້າມາທ່ຽວຊົມບໍ່ຫຼຸດ 3 ແສນຄົນ ແລະ ມີຍອດເງິນຫມູນວຽນບໍ່ຫລຸດ 20-30 ກວ່າຕື້ກີບ. ທາງລາຍການມີສຽງຖະແຫລງຂ່າວບາງຕອນຂອງທ່ານ ກອງມາລາ ພົມມາໄລ, ຮອງປະທານສະມາຄົມເຟີນິເຈີລາວມາໃຫ້ຮັບຮູ້ເພີ່ມຕື່ມ.
Editor: ຕະວັນ ແສງສະຫວັນ
