ເພື່ອເປັນການສະຫນອງທາດຊີ້ນ ໃຫ້ພຽງພໍກັບຄວາມຕ້ອງການ ຢູ່ນະຄອນຫລວງວຽງຈັນ ແລະ ນະຄອນຫລວງໂຮ່ຈີມິງ ໃນອານາຄົດອັນໃກ້ນີ້ນະຄອນຫລວງໂຮ່ຈີມິງ ກຽມສົ່ງແນວພັນງົວຊີ້ນ 50 ໂຕ ແລະ ນ້ຳເຊື້ອຈຳນວນ 1 ພັນຫລອດ ເພື່ອສະຫນອງໃຫ້ກັບໂຄງການລ້ຽງງົວ ນະຄອນຫລວງວຽງຈັນ. ທ່ານ ຫງຽນວັນຈຶກ, ຮອງຫົວຫນ້າພະແນກກະສິກຳ ແລະ ພັດທະນາຊົນນະບົດ ນະຄອນໂຮ່ຈີມິງ ໄດ້ເດີນທາງມາເຮັດວຽກ ຢູ່ນະຄອນຫລວງວຽງຈັນ ໃນລະຫວ່າງ ວັນທີ 13-16 ມິຖຸນາຜ່ານມາ ພ້ອມທັງຂັດເລືອກເອົາພະນັກງານວິຊາການເຈົ້າຂອງຟາມ ໄປເຝິກອົບຮົມຢູ່ນະຄອນໂຮ່ຈີມິງ ລວມທັງປຶກສາຫາລືກ່ຽວກັບຂັ້ນຕອນ ແລະ ຮູບແບບການນຳສົ່ງແນວພັນງົວດັ່ງກ່າວ ຈາກນະຄອນໂຮ່ຈິມິງ ມາ ນະຄອນຫລວງວຽງຈັນ ແລະ ສະຖານທີພັກ ຊຶ່ງຄາດວ່າຈະມີການມອບ-ຮັບໃນໄວ້ນີ້. ປະຈຸບັນ ສະມາຄົມຜູ້ປະກອບການລ້ຽງງົວ, ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ທີ່ເປັນຜູ້ປະຕິບັດໂຄງການ ໄດ້ມີການຫ້າງຫາກະກຽມ ເປັນຕົ້ນ ການປູກຫຍ້າໃສ່ແຄມສອງຝັງບຶງທາດຫລວງ ນັບແຕ່ຂົງເຂດຫນອງຫນຽ່ງ ລົງໄປຫາຫ້ວຍຫມາກຮຽວ ຕົກໃສ່ນ້ຳ ເຂດເມືອງຫາດຊາຍຟອງ ນະຄອນຫລວງວຽງຈັນ ໃນເນື້ອທີ່ປູກຫຍ້າປະມານ 1 ພັນກວ່າເຮັກຕ້າ ແລະ ໄດ້ມີການປູກຫຍ້າ ແລະ ຈຳນວນຫນຶ່ງ ເພື່ອສະຫນອງຫຍ້າເປັນອາຫານໃຫ້ກັບພໍ່ພັນ, ແມ່ພັນງົວໃນເບື້ອງຕົ້ນ. ທາງດ້ານທ່ານ ຈັນເພັງ ອິນສະຫວັນ, ປະທານຜູ້ປະກອບການລ້ຽງງົວ ນະຄອນຫລວງວຽງຈັນ ເປີດເຜີຍວ່າ: ເຮົາມີຄວາມພ້ອມທຸກຢ່າງ ທັງສະຖານທີ, ຫຍ້າທີ່ປູກ ທີ່ນຳເຂົ້າຈາກປະເທດໃກ້ຄຽງ ເພື່ອເປັນອາຫານງົວໃນໂຄງການດັ່ງກ່າວ. ສ່ວນຫນຶ່ງແມ່ນຈະໄດ້ສະຫນອງທາດຊີ້ນຢູ່ພາຍໃນ ໃຫ້ສາມາດບໍລິໂພກໄດ້ຢ່າງທົ່ວເຖິງ ແລະ ສົ່ງໄປນະຄອນໂຮ່ຈີມິງ ຕາມທີ່ນະຄອນຫລວງວຽງຈັນ ແລະ ໂຮ່ຈີມິງ ໄດ້ມີການເຊັນສັນຍາກັນກ່ອນຫນ້ານັ້ນແລ້ວ.
ຂອບໃຈຂໍ້ມູນຈາກ: ຫນັງສືພິມວຽງຈັນທຸລະກິດ
Editor: ຕະວັນ ແສງສະຫວັນ
