ພະແນກສຶກສາທິການ ແລະ ກິລາ ແຂວງ ໄຊສົມບູນ ໄດ້ຈັດພິທີເປີດບັ້ນສອບເສັງ ຈົບຊັ້ນມັດທະຍົມຕອນປາຍ ຫຼື ມ7 ທົ່ວແຂວງ ໄຊສົມບູນ ຢ່າງເປັນທາງການ ຂຶ້ນໃນຕອນແລງຂອງວັນທີ 19 ມິຖຸນາ ທີ່ຜ່ານມາ ທີ່ສະໂມສອນຂອງຕົນ ໂດຍການເປັນປະທານຂອງທ່ານ ລາວປາວຊົງ ດາວວົງໄຊ ຮອງເຈົ້າແຂວງໆ ໄຊສົມບູນ, ມີທ່ານ ແດງ ປະທຸມທອງ ເຈົ້າເມືອງ ອະນຸວົງ, ທ່ານ ຈື່ເນັ້ງ ທໍ່ຈູ່ເທັ່ງ ຫົວໜ້າພະແນກສຶກສາທິການ ແລະ ກິລາແຂວງໄຊສົມບູນ, ທ່ານ ຈັນທາລາ ພິລົມລາສັກ ຮອງຜູ້ອໍານວຍການເຕັກໂນໂລຢີ ແລະ ສື່ສານ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິລາ, ມີບັນດາຜູ້ຕາງໜ້າພະແນກການ, ກຸ່ມວັດທະນະທຳສັງຄົມ, ຕະຫຼອດຮອດບັນດາຄູ-ອາຈານ ແລະ ນ້ອງນັກຮຽນຂອງໂຮງຮຽນມັດທະຍົມຕອນປາຍ ພາຍໃນສູນສອບເສັງ, ພາຍໃນເມືອງອານຸວົງເຂົ້າຮ່ວມ. ຫຼັງຈາກຮັບຟັງການຜ່ານຂໍ້ຕົກລົງຂອງທ່ານ ເຈົ້າແຂວງໄຊສົມບູນ ວ່າດ້ວຍການແຕ່ງຕັ້ງຄະນະກຳມະການຊີ້ນຳ ລວມ ແລະ ອານຸກຳມະການຊີ້ນຳ ຂອງແຕ່ລະສູນສອບເສັງ ຂໍ້ຕົກລົງຂອງຫົວໜ້າພະແນກສຶກສາທິການ ແລະ ກິລາແຂວງ ໄຊສົມບູນ ວ່າດ້ວຍການແຕ່ງຕັ້ງອານຸກຳມະການຍາມຫ້ອງສອບເສັງ ລະບຽບຫຼັກການ ແລະ ວິທີການຂອງການສອບເສັງຈົບຊັ້ນມັດທະຍົມຕອນປາຍ ພ້ອມທັງມອບຫົວບົດສອບເສັງຈົບຊັ້ນມັດທະຍົມຕອນປາຍ ໃຫ້ອານຸກຳມະ ການຊີ້ນຳລວມສູນສອບເສັງເມືອງອະນຸວົງ ໂດຍການກ່າວຮັບຂອງທ່ານ ແດງ ປະທຸມທອງ ເຈົ້າເມືອງໆ ອານຸວົງ, ເພື່ອມອບຕໍ່ໃຫ້ຄະນະຮັບຜິດຊອບສູນສອບເສັງພາຍໃນເມືອງອະນຸວົງ ໂດຍການກ່າວຮັບຂອງ ທ່ານ ວັນດີ ວຽງຕະວາ ຮອງຫົວໜ້າຫ້ອງການສຶກສາທິການ ແລະ ກິລາເມືອງອະນຸວົງ, ທ່ານ ຈື່ເນັ້ງ ທໍ່ຈູ່ເທັ່ງ ຫົວໜ້າພະແນກສຶກສາທິການ ແລະ ກິລາແຂວງໄຊສົມບູນ, ໄດ້ກ່າວວ່າ: ໃນສົກປີ 2016-2017 ທົ່ວແຂວງໄຊສົມບູນ ໄດ້ແບ່ງອອກເປັນ 8 ສູນສອບເສັງ ຊຶ່ງມີນັກສອບເສັງທັງໝົດ 1.245 ຄົນ, ຍິງ 489 ຄົນ, ແບ່ງເປັນ 57 ຫ້ອງສອບເສັງ ໃນທົ່ວແຂວງ ໃນສົກຮຽນນີ້ການສອບເສັງຈົບຊັ້ນ ມ7 ມີ 4 ວິຊາ, ວິຊາພາສາລາວວັນະຄະດີ, ວິຊາພິຊິກສາດ, ວິຊາຄະນິດສາດ ແລະ ວິຊາປະຫວັດສາດ. ໃນນາມຄະນະປະທານພ້ອມດ້ວຍຄະນະກຳມະການຍາມຫ້ອງເສັງແມ່ນຈະປະຕິບັດລະບຽບທີ່ເປັນເອກະພາບທົ່ວປະເທດຄື: ຫ້າມບໍ່ໃຫ້ໃຊ້ອີເລັກໂຕເນັກ, ເອກະສານອື່ນໆ ເພື່ອເປັນຕົວຊ່ວຍໃນການສອບເສັງໃນຄັ້ງນີ້ ປະກອບແຜນນະໂຍບາຍ, ຕໍ່ຜູ້ທີ່ເສັງໄດ້ຄະແນນດີ ແລະ ສັບຊ້ອນຕາມການສະເໜີ, ແຕ່ສະເພາະປີນີ້ແມ່ນຈະໄດ້ເອົາຄະແນນສອບເສັງບວກກັບຄະແນນຮຽນປະຈຳປີ ຫານສອງເປັນຄະແນນຮຽນຈົບຊັ້ນມັດຕະຍົມຕອນປາຍ.
Editor:ດາວໄຊ ສີວິໄລ
