ທ່ານ ດາວວອນ ພະຈັນທະວົງ ໄດ້ກ່າວວ່າ: ງານວາງສະແດງເຄື່ອງເຮືອນລາວຄັ້ງທີ 2 ທີ່ກຳລັງຈະຈັດຂື້ນໃນລະຫວ່າງວັນທີ 8 ຫາ 16 ກໍລະກົດນີ້ ຈະເປັນອີກເວທີໜຶ່ງໃນການສະທ້ອນໃຫ້ເຫັນເຖິງການພັດທະນາຂອງພາກທຸລະກິດເຟີນີເຈີິລາວ, ສຳລັບ ສະພາການຄ້າ ແລະ ອຸດສາຫະກຳແຫ່ງຊາດ ພ້ອມຈະສົ່ງເສີມ ສຟລ ແລະ ມີແນວຄິດຢາກຈັດຫ້ອງວາງສະແດງສິນຄ້າຫັດຖະກຳ ລວມທັງ ຜະລິດຕະພັນເຟີນີເຈີລາວ ພາຍໃນ ສຄອ ນອກຈາກ ຜະລິດຕະພັນແລ້ວ ຍັງມີຂໍ້ມູນຂອງສິນຄ້າ, ໂຮງງານທີ່ຜະລິດ ເພື່ອຊ່ວຍກັນເຮັດໃຫ້ການຂາຍມີການຂະຫຍາຍໂຕ ແລະ ເຮັດໃຫ້ລູກຄ້າໄດ້ເຂົ້າເຖິງໂຮງງານຜູ້ຜະລິດ ເປັນການສ້າງລາຍຮັບໃຫ້ທຸລະກິດ ກໍ່ຄືປະເທດຊາດໄດ້ອີກຊ່ອງທາງໜຶ່ງ. ສ່ວນທ່ານທ່ານ ສັງຄົມ ຈັນສຸກ, ປະທານ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ ໄດ້ກ່າວວ່າ: ງານວາງສະແດງເຄື່ອງເຮືອນລາວຄັ້ງທີ 2 ຈະເປັນໂອກາດໃນການສົ່ງເສີມສິນຄ້າລາວ, ນອກຈາກຈະເປັນການພົບປະແລກປ່ຽນລະຫວ່າງຜູ້ຂາຍ ແລະ ຜູ້ຊື້ ທ່ານຍັງຫວັງວ່າງານດັ່ງກ່າວ ຈະເປັນອີກໜຶ່ງເວທີ່ ເພື່ອຍົກໃຫ້ເຫັນເອກະລັກ ແລະ ການຮັກສາລາຍລາວເຮົາ, ພ້ອມນັ້ນ ຍັງເປັນເວທີ ໃນການເຕົ້າໂຮມຄວາມສາມັກຄີ ແລະ ເປັນການສ້າງກຸ່ມການຜະລິດໃນອະນາຄົດ. ຂະນະທີ່ທ່ານ ຄຳໄພ ສົມຊະນະ ປະທານ ສະມາຄົມຟີນິເຈີລາວ ໄດ້ກ່າວວ່າ: ງານວາງສະແດງເຄື່ອງເຮືອນລາວຄັ້ງທີ 2 ຈະເປັນເວທີ ເຕົ້າໂຮມພູມປັນຍາ, ເຕົ້າໂຮມປະສົບການ ຈາກຜູ້ປະກອບການຈາກພາຍໃນ ແລະຕ່າງປະເທດ ເພື່ອມາຫາລືແລກປ່ຽນນຳກັນ ພ້ອມເປັນໂອກາດທີ່ດີໃຫ້ຜູ້ປະກອບການ ແລະ ລູກຄ້າ ໄດ້ມາຮູ້ຈັກ ແລະ ພັດທະນາສິນຄ້າໄປພ້ອມໆກັນ. ວຽກງານວາງສະແດງຖືເປັນວຽກງານໜຶ່ງ ທີ່ມີຄວາມສຳຄັນທີ່ສຸດ ສຳລັບຫົວໜ່ວຍທຸລະກິດເຟີນີເຈີຂອງພວກເຮົາ ເປັນວຽກງານໜຶ່ງທີ່ເຮັດ ຜູ້ປະກອບການ ໄດ້ນຳເອົາຜົນງານ ຫຼື ຜະລິດຕະພັນ ໃໝ່ໆ ທີ່ເປັນສີໄມ້ລາຍມືຂອງນາຍຊ່າງເຮົາ ບວກກັບ ເປັນໄມ້ທີ່ມີຄຸນຄ່າສູງ ມີຄຸນນະພາບດີ ມາວາງສະແດງຊື້-ຂາຍ ໃຫ້ຜູ້ເຂົ້າມາຊົມງາມມີໂອກາດ ຈັບຈ່າຍຊື້-ຂາຍ ທັງເປັນການຕອບສະໜອງ ຕາມຄວາມຮຽກຮ້ອງຕ້ອງການ ຂອງສັງຄົມປັດຈຸບັນ ແລະ ກ້າວເຂົ້າຫາຕະຫຼາດພາດພື້ນ ແລະ ສາກົນໃນອະນາຄົດໃກ້ໆນີ້.  ງານວາງສະແດງ ເຟີນີເຈີລາວ ໄດ້ມີການຈັດວາງສະແດງສິນຄ້າຂຶ້ນ ທີ່ເປັນຂອງ ສະມາຊິກ ສຟລ ເອງ   ປີໜຶ່ງປະມານ 3 ຄັ້ງ ຄື: 1 ງານວາງສະແດງຜະລິດຕະພັນ(ເຟີນີເຈີ) ໄມ້ລາວ ເຊິ່ງຈັດຂຶ້ນ ໃນເດືອນ 1 ຂອງທຸກໆປິ. 2 ງານວາງສະແດງສິນຄ້າ ເຟີນີເຈີວຽງຈັນ ຈັດຂຶ້ນ ເດືອນ 4 ຂອງທຸກໆປີ ແລະ 3 ງານວາງສະແດງເຄື່ອງເຮືອນລາວ ເຊິ່ງຈັດຂຶ້ນໃນເດືອນ ກໍລະກົດ ຂອງທຸກໆປິ.

Editor: ຕະວັນ ແສງສະຫວັນ