ກະຊວງສາທາລະນະສຸກ ໄດ້ຈັດງານສະເຫລີມສະຫລອງ ວັນແພດລາວ “ 18 ມິຖຸນາ ” ໂດຍມີຄະນະພັກ, ຄະນະລັດຖະມົນຕີ, ອະດີດການນຳ,ພະນັກງານອາວຸໂສ, ວິລະຊົນ, ພະນັກງານຫລັກແຫລ່ງ,ແພດພະຍາບານ ຢູ່ຂັ້ນສູນກາງ ເຂົ້າຮ່ວມ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີ ຂອງແພດລາວ ໃນສະໄໝຕໍ່ສູ້ກູ້ຊາດ ກໍຄື ສະໄໝປົກປັກຮັກສາ ແລະ ພັດທະນາປະເທດຊາດ
ທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໄດ້ກ່າວໃນງານສະເຫລີມສະຫລອງ ວັນດັ່ງກ່າວ, ໃນວັນທີ 19 ມິຖຸນາ 2017 ຜ່ານມານີ້ ຢູ່ທີ່ນະຄອນຫລວງວຽງຈັນ ວ່າ: ວັນແພດລາວ ໄດ້ສ້າງຕັ້ງຂຶ້ນ ແລະ ໄດ້ກຳນົດໄວ້ໃນ ກົດໝາຍປິ່ນປົວ ເພື່ອເຮັດໃຫ້ພົນລະເມືອງລາວ ບັນດາເຜົ່າ, ທຸກຊັ້ນຄົນເຫັນໄດ້ການເຕີບໃຫຍ່ ຂະຫຍາຍຕົວ ຂອງວຽກງານສາທາລະນະສຸກ, ຂອງຖັນແຖວແພດ ໝໍລາວ ໃນແຕ່ລະໄລຍະ, ຈາລຶກບຸນຄຸນໆງາມຄວາມດີ ຂອງແພດໝໍ ແລະ ພະນັກງານສາທາລະນະສຸກ ທຸກຖ້ວນໜ້າ ທີ່ໄດ້ປະກອບສ່ວນ ເຂົ້າໃນການປິ່ນປົວ, ຮັກສາສຸຂະພາບ ທັງເປັນການ ປຸກລະດົມມວນຊົນ ໃຫ້ເຫັນຄວາມສຳຄັນ, ເປັນເຈົ້າການໃນການສົ່ງເສີມ, ຮັກສາສຸຂະພາບ ຂອງຕົນເອງ, ຄອບຄົວ ແລະ ຊຸມຊົນ ກໍຄື ຄວາມຮັບຜິດຊອບ ຕໍ່ໜ້າທີ່ວຽກງານ ທີ່ໄດ້ມອບໝາຍ, ເພື່ອເປັນການປັບປຸງ ກໍ່ສ້າງຕົນເອງ ໃຫ້ມີຄວາມຮູ້ຄວາມສາມາດ ແລະ ຈັນຍາທຳ ໃນການຮັບໃຊ້ພໍ່ແມ່ ປະຊາຊົນບັນດາເຜົ່າ ກະຊວງສາທາລະນະສຸກ ໄດ້ສະເໜີລັດຖະບານ ແລະ ສະພາແຫ່ງຊາດ ຊຸດທີ VII ແລະ ໄດ້ຮັບການເຫັນດີ ໃຫ້ບັນຈຸເຂົ້າໃນກົດ ໝາຍ ປິ່ນປົວສະບັບປັບປຸງ ເລກທີ 58/ສພຊ ລົງວັນທີ 24 ທັນວາ 2014,
ໝວດ 10 ມາດຕາ 76 ໄດ້ກຳນົດເອົາວັນທີ 18 ມິຖຸນາ ເປັນວັນແພດລາວ
Editor: ກຳປານາດ ລັດຖະເຮົ້າ
