ເພື່ອຊຸກຍູ້ສົ່ງເສີມການຜະລິດຂອງພາກທຸລະກິດ ໃຫ້ມີການຜະລິດຢ່າງກົມກຽວ ແລະ ຂະຫຍາຍຕົວຢ່າງຕໍ່ເນື່ອງ ເປັນທ່າແຮງໃຫ້ແກ່ການພັດທະນາເສດຖະກິດ-ສົງຄົມ ສົກປີ 2015-2016 ພັກ ແລະ ລັດຖະບານ ໄດ້ສ້າງຕ່ອງໂສ້ລະຫວ່າງວິສາຫະກິດຂະໜາດໃຫຍ່ ກັບ ວິສາຫະກິດຂະໜາດນ້ອຍ ແລະ ຂະໜາດກາງ ໂດຍສ້າງສະພາບແວດລ້ອມທີ່ເອື້ອອຳນວຍໃຫ້ແກ່ພາກທຸລະກິດດ້ານນິຕິກຳ ເຊິ່ງໄດ້ສຳເລັດໂດຍພື້ນຖານການຄຸ້ມຄອງລາຄາສິນຄ້າອຸປະໂພກ ບໍລິໂພກ ແລະ ສິນຄ້າຍຸດທະສາດ ດ້ານການຈັດຕັ້ງປະຕິບັດຜັນຂະຫຍາຍດຳລັດວ່າດ້ວຍການຄຸ້ມຄອງລາຄາສິນຄ້າ ແລະ ການບໍລິການຕາມບັນຊີ (ກ) ໄດ້ແກ່ສິນຄ້າທີ່ຄວບຄຸມລາຄາຄື: ນ້ຳມັນເຊື້ອໄຟ, ເຂົ້າ, ຊີ້ນ, ປາ ແລະ ບັນຊີ (ຂ) ໄດ້ແກ່ສິນຄ້າຕາມການເໜັງຕີງຂອງລາຄາ ປະກອບມີ: ອາຫານ, ເຄື່ອງກໍ່ສ້າງ, ເຄື່ອງໃຊ້ສອຍໃນຄົວເຮືອນ, ອາຍແກັດ ເງິນ-ຄຳຮູບປະພັນ ພ້ອມທັງສ້າງຕັ້ງອົງການຄຸ້ມຄອງຢູ່ 5 ຂະແໜງການ ແລະ ໄດ້ສຳເລັດການຮ່າງແຜນພັດທະນາວິສາຫະກິດ ຂະໜາດນ້ອຍ-ຂະໜາດກາງ ດຳລັດວ່າດ້ວຍການຈັດແບ່ງຂະໜາດກຳນົດເງື່ອນໄຂຂອງ SMEs ເພື່ອສະດວກໃນການຄຸ້ມຄອງ ສຳເລັດຮ່າງຍຸດທະສາດການພັດທະນາອຸດສະຫະກຳປຸງແຕ່ງ ແລະ ຫັດຖະກຳປີ 2016-2020 ແຜນດຳເນີນງານກ່ຽວກັບການພັດທະນາຫັດຖະກຳ 5 ປີ ເພື່ອສົ່ງເສີມພັດທະນາຫັດຖະກຳຮ່າງກົດໝາຍວ່າດ້ວຍເຄມີ ສ້າງຮ່າງນະໂຍບາຍ ແລະ ຍຸດທະສາດການພັດທະນາອຸດສະຫະກຳສີຂຽວ ເພື່ອເປັນແນວທາງສົ່ງເສີມໃຫ້ບັນດາຫົວໜ່ວຍ ໂຮງງານອຸດສະຫະກຳປຸງແຕ່ງໃນທົ່ວປະເທດ ສ້າງຂະບວນການຜະລິດເປັນມິດຕໍ່ສິ່ງແວດລ້ອມ.
ຄຽງຄູ່ນັ້ນໄດ້ສ້າງຄວາມພ້ອມໃຫ້ແກ່ພາກທຸລະກິດ ເພື່ອຮອງຮັບການແຂ່ງຂັນທີ່ເພີ່ມຂຶ້ນ ໂດຍສະໜອງທຶນໃຫ້ແກ່ວິສາຫະກິດຂະໜາດນ້ອຍ ແລະ ກາງ ເຊິ່ງໄດ້ອະນຸມັດສິນເຊື່ອ ຈຳນວນ 41 ສັນຍາ ຈໍານວນ 16,73 ຕື້ກີບ ໃນນັ້ນ ຜູ້ປະກອບການເພດຍິງ 17 ຫົວໜ່ວຍ ແບ່ງອອກເປັນ 4 ປະເພດສິນເຊື່ອ ພ້ອມທັງຄົ້ນຄວ້າການສະໜັບສະໜູນ ການເຂົ້າເຖິງແຫຼ່ງທຶນແກ່ຫົວໜ່ວຍວິສາຫະກິດ ທີ່ດຳເນີນການຜະລິດເປັນສິນຄ້າ ເປັນຕົ້ນ ການລ້ຽງສັດແມ່ນໃຫ້ທະນາຄານພັດທະນາລາວ ເປັນຜູ້ປ່ອຍເງິນກູ້ໄດ້ຈຳນວນໜຶ່ງ ແລະ ກຳລັງຂະຫຍາຍກັບບາງທະນາຄານທຸລະກິດອື່ນ ເຊັ່ນ: ທະນາຄານລາວ-ຈີນ ຈຳກັດ ທະນາຄານເອັສທີ ນອກນີ້ໄດ້ສົ່ງເສີມຕ່ອງໂສ້ການຜະລິດເປັນສິນຄ້າ ໂດຍການສ້າງຄູ່ມືຕ່ອງໂສ້ມູນຄ່າເພີ່ມ ເພື່ອເຝິກອົບຮົມໃຫ້ບັນດາວິສາຫະກິດຕ່າງໆ ໃຫ້ຄຳແນະນຳຢ່າງໃກ້ສິດກັບບໍລິສັດ ສະມາຄົມທຸລະກິດ ກ່ຽວກັບການສ້າງແຜນທຸລະກິດ ປະກອບທຶນສົມທົບເພື່ອຊ່ວຍທຸລະກິດໃນການປັບປຸງສະມັດຕະພາບການບໍລິຫານ ຜະລິດຕະພັນເພື່ອສາມາດແຂ່ງຂັນກັບຕະຫຼາດສາກົນ ແລະ ສົກປີຜ່ານມາ ສາມາດອະນຸມັດທຶນສົມທົບໃຫ້ 99 ບໍລິສັດ ແລະ 9 ສະມາຄົມທຸລະກິດ.
ຂອບໃຈຂໍ້ມູນຈາກ ຫນັງສືພິມວຽງຈັນໃຫມ່
Editor: ຕະວັນ ແສງສະຫວັນ
