ເມື່ອບໍ່ດົນມານີ້ ໄດ້ມີການມອບ-ຮັບ ຜົນສຳເລັດການກໍ່ສ້າງຊົນລະ ປະທານນ້ຳຊາຍ ບ້ານສົບຊາຍ, ເມືອງຊຽງຄໍ້ ແຂວງຫົວພັນ, ໃຫ້ປະຊາຊົນ 3 ບ້ານໄດ້ນໍາໃຊ້ຢ່າງເປັນທາງການ ເຂົ້າຮ່ວມ ທ່ານ ພັນທອງ ເພັດສົມພັນ ຮອງເຈົ້າແຂວງ, ຜູ້ຊີ້ນຳຂົງເຂດເສດຖະກິດຂັ້ນແຂວງ, ມີບັນດາທ່ານຫົວໜ້າພະແນກການຂັ້ນແຂວງ, ຫ້ອງການຂັ້ນເມືອງ, ອຳນາດການປົກຄອງບ້ານອ້ອມຂ້າງເຂົ້າຮ່ວມ.
ໃນພິທີ ທ່ານຜູ້ອຳນວຍການ ບໍລິສັດ ຈະເລີນຊຳ ໄດ້ລາຍງານກ່ຽວກັບການຈັດຕັ້ງປະຕິບັດໂຄງການໄລຍະຜ່ານມາ. ເຊີ່ງໂຄງການດັ່ງກ່າວໄດ້ເລີ່ມລົງມືກໍ່ສ້າງມາແຕ່ຕົ້ນທັນວາ 2013 ຫາກາງເດືອນມີຖຸນາ 2017. ເປັນເວລາ 3 ປີກວ່າ ຈີ່ງກໍ່ສ້າງສຳເລັດ, ຊົນລະປະທານແຫ່ງນີ້ສາມາດເອົານໍ້າເຂົ້າຫົດເນື້ອທີ່ນາ ໄດ້ 2 ລະດູ ທັງໝົດ 317 ເຮັກຕາ, ໃນນີ້ມີເນື້ອທີ່ກະສີກຳເນີນສູງ 132 ເຮັກຕາ, ມີເນື້ອທີ່ນາເກົ່າ ຈໍານວນ 17 ເຮັກຕາ, ແລະ ເນື້ອທີ່ນາບຸກເບີກໃໝ່ຈໍານວນ 168 ເຮັກຕາ, ມີລະບົບຄອງເໝືອງກໍ່ດ້ວຍຫີນພູ ມີຄວາມຍາວ ທັງໝົດ 14 ພັນ 900 ແມັດ, ລວມມູນຄ່າການກໍ່ສ້າງທົງໝົດ 26 ຕື້ 700 ລ້ານກວ່າກີບ ໂດຍແມ່ນທຶນຂອງລັດຖະບານລາວ 100 ສ່ວນຮ້ອຍ, ພະແນກກະສິກໍາ ແລະ ປ່າໄມ້ແຂວງຫົວພັນ ເປັນເຈົ້າຂອງໂຄງການ ແລະ ມອບໃຫ້ບໍລິສັດ ຈະເລີນຊຳ ເປັນຜູ້ຮັບເໝົາກໍ່ສ້າງ ແລະ ລົງທຶນກ່ອນ100 ສ່ວນຮ້ອຍ ເຊີ່ງມີປະຊາຊົນໄດ້ຮັບຜົນປະໂຫຍດ ຈຳນວນ 3 ບ້ານຄື: ບ້ານສົບຊາຍ, ບ້ານວັງຕັ້ງ ແລະ ບ້ານສົບໂກຍ, ມີ 299 ຄອບຄົວ, ມີພົນລະເມືອງ 1,278 ຄົນ.
ໂອກາດນີ້ ທ່ານຜູ້ອຳນວຍການບໍລິສັດ, ການນຳເມືອງຊຽງຄໍ້ ແລະ ພະແນກແຜນການ ແລະ ການລົງທຶນແຂວງຫົວພັນ ກໍ່ໄດ້ພ້ອມກັນລົງນາມເຊັ່ນບົດບັນທຶກ ມອບ-ຮັບ ຜົນສຳເລັດການກໍ່ສ້າງຊົນລະປະທານຢ່າງເປັນການ.
Editor: ກຳປານາດ ລັດຖະເຮົ້າ
