ວັນທີ 18 ມິຖຸນາ 2017 ທີ່ສຳນັກງານຫ້ອງວ່າການປົກຄອງແຂວງ ຈຳປາສັກ ໄດ້ມີພິທີມອບ-ຮັບລົດຮັບສົ່ງຄົນເຈັບ ໂດຍແມ່ນ ບໍລິສັດ ເອສວີ ກຼຸບ ເປັນຜູ້ນຳມາມອບໃຫ້ແກ່ແຂວງຈຳປາສັກ ແລະ ມອບຕໍ່ໃຫ້ແກ່ໂຮງໜໍຈຳປາສັກ ໄດ້ນຳໃຊ້ເຂົ້າໃນການບໍລິການຄົນເຈັບທີ່ເຂົ້າມາປິ່ນປົວໃຫ້ທັນການ.
ເຂົ້າຮ່ວມໃນພິທີມອບຄັ້ງນີ້ ມີ ທ່ານ ປະລິນຍາເອກ ບຸນຖອງດີວິໄຊ ກຳມະການສູນກາງພັກ ເຈົ້າແຂວງຈຳປາສັກ ພ້ອມດ້ວຍຄະນະນຳຂອງແຂວງ, ຄະນະນຳຂອງ ໂຮງໜໍຈຳປາສັກ ແລະ ປະທານບໍລິສັດ ເອສວີ ກຼຸບ ພ້ອມຄະນະ ເຂົ້າຮ່ວມ.
ໃນການມອບຮັບລົດຮັບສົ່ງຄົນເຈັບໃນຄັ້ງນີ້ ທ່ານ ດຣ ຄຳສິງ ແກ້ວທອງກຸ ອຳນວຍການໂຮງໜໍ ແຂວງຈຳປາສັກ ໄດ້ກ່າວວ່າ: ເປັນການປະກອບສ່ວນທີ່ມີປະໂຫຍດຢ່າງຫລວງຫລາຍແກ່ໂຮງໜໍ ແຂວງຈຳປາສັກ ເນື່ອງຈາກໄລຍະຜ່ານມາ ທາງໂຮງໜໍຍັງຂາດເຂີນລົດຮັບສົ່ງຄົນເຈັບ ພາຍໃນໂຮງໜໍມີລົດຮັບສົ່ງ ຄົນເຈັບ 3 ຄັນ ແລະ ເປັນລົດທີ່ນຳໃຊ້ເປັນເວລາດົນນານ,ເກົ່າແກ່ ບວກກັບອຸປະກອນນຳໃຊ້ໃນລົດຍັງຂາດເຂີນບໍ່ທັນກັບສະພາບຄວາມຕ້ອງການຂອງຜູ້ໃຊ້ບໍລິການ ໂດຍ ລົດຄັນທຳອິດທີ່ໄດ້ມາ ແມ່ນ ແຕ່ປີ 1994, ຄັນທີ ສອງ ປີ 2009 ແລະ ຄັນທີ ສາມ ແມ່ນ ປີ 2012 ຖ້າທຽມໃສ່ຄວາມຕ້ອງການດ້ານການບລິການແກ່ສັງຄົມ ກໍ່ຄືຜູ້ເຈັບເປັນທີ່ຕ້ອງການນຳໃຊ້ລົດນຳສົ່ງໄປປິ່ນປົວຢູ່ຕ່າງແຂວງກໍ່ຄືປະເທດໄກ້ຄຽງແມ່ນມີຈຳກັດ, ຕ້ອງໄດ້ນຳໃຊ້ລົດຈາກ ຄີນິກເອກະຊົນເຂົ້າມາຊ່ວຍ.
ລົດຮັບສົ່ງຄົນເຈັບ ຄັນໃໝ່ນີ້ ແມ່ນໄດ້ປະກອບ ຄວາມທັນສະໄໜເຂົ້າມາໃຊ້ໃນເວລາບໍລິການຄົນເຈັບ ແລະ ປະກອບອຸປະກອນຮັບໃຊ້ດ້ານການແພດຄົບຊຸດ ພາຍໃນລົດ ລວມເປັນມູນຄ່າທັງໜົດ 44.500 ໂດລາສະຫາລັດ ພ້ອມນີ້ ບໍລິສັດ ຈະເລີນເຊກອງຍັງໄດ້ມອບເງີນສົດ ຈຳນວນ 15 ລ້ານກີບ ໃຫ້ເປັນເງີນ ສຳລັບການບຳລຸງຮັກສາລົດ. ໃນໂອກາດດັ່ງກ່າວທາງປະທານບໍລິສັດ, ການນຳຂອງແຂວງກໍ່ໄດ້ມີພິທີມອບ-ຮັບລົດຢ່າງເປັນທາງການ.
Editor: ກຳປານາດ ລັດຖະເຮົ້າ
