ໃນວັນທີ 20 ມິຖຸນາ ຜ່ານມານີ້. ທີ່ໂຮງຮຽນ ມັດທະຍົມສົມບູນ ບ້ານ ຢຶບໃໝ່ ໄດ້ຈັດກອງປະຊຸມຈັດສັນທີ່ດິນ ໃຫ້ປະຊາຊົນບ້ານ ຢຶບໃໝ່ ເມືອງທ່າແຕງ, ແຂວງເຊກອງ ຈໍານວນ 20 ຄອບຄົວ,ໂດຍມີ ທ່ານ ພັນເອກ ສົມທອງ ດອນກັນນ້ອຍ ຄະນະປະຈໍາພັກແຂວງ ເຊກອງ ຫົວໜ້າກອງບັນຊາການທະຫານແຂວງ ປະທານຄະນະກໍາມະການພັດທະນາບ້ານ ຢຶບ, ມີທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ- ເມືອງທ່າແຕງ, ທ່ານ ຄໍາໄໝ ດວງກັນຍາ ກໍາມະການພັກແຂວງ ປະທານແນວລາວສ້າງຊາດແຂວງ, ມີຄະນະກໍາມະການຂັ້ນແຂວງ, ຂັ້ນເມືອງ,ພະແນກການກ່ຽວຂ້ອງ ພ້ອມພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນສໍາ ສີສັກ ຮອງຫົວໜ້າຫ້ອງວ່າການປົກຄອງແຂວງເຊກອງ ໄດ້ຂື້ນຜ່ານ ຂໍ້ຕົກລົງຂອງຄະນະກໍາມະການພັດທະນາບ້ານ ຢຶບ, ສະບັບເລກທີ 059/ຄກບຢ, ລົງວັນທີ 19 ມິຖຸນາ 2017 ວ່າດ້ວຍມອບເນື້ອທີ່ນາໃຫ້ປະຊາຊົນບ້ານ ຢຶບ ເມືອງທ່າແຕງ, ແຂວງ ເຊກອງ ຈໍານວນ 20 ຄອບຄົວ, ມີເນື້ອທີ 25,833 ເຮັກຕາ, ເນື້ອທີ່ນາດັ່ງກ່າວແມ່ນບຸກເບີກສໍາເລັດແລ້ວຢູ່ບ້ານ ສະທື ຊຶ່ງເປັນບ້ານມີຊາຍແດນຕິດຈອດກັນ, ມີຄອງເໝືອງ, ຄອງຊອຍ,ຄອງສົ່ງນໍ້າ ແລະ ເທຕໍມໍທັບທໍ່ສົ່ງນໍ້າ ເຂົ້າໃສ່ເນື້ອທີ່ນາທໍາການຜະລິດຂອງປະຊາຊົນ ຢ່າງພຽງພໍ, ມີເສັ້ນທາງໄປມາສູ່ເຂດຜະລິດ, ມີຄວາມສະດວກສະບາຍດີຂື້ນກວ່າເກົ່າ. ໂດຍລວມ ພັກ ແລະ ລັດຖະບານ ກໍ່ຄື ອໍານາດການປົກຄອງແຂວງ ແລະ ເມືອງ ໄດ້ສຸ່ມສະຕິປັນຍາ, ເຫື່ອແຮງທີ່ບົ່ມຊ້ອນທີ່ມີຢູ່ປະກອບສ່ວນເຂົ້າໃນການພັດທະນາບ້ານ ຢຶບ ເຊັ່ນ: ແນວພັນເຂົ້າ, ອຸປະກອນຕ່າງໆ, ເຕັກນິກການປູກ, ການບົວລະບັດຮັກສາ ແລະ ອື່ນໆ ເພື່ອເຮັດໃຫ້ປະຊາຊົນພາຍໃນບ້ານ ໄດ້ມີການພັດທະນາຄອບຄົວ, ມີຢູ່ມີກິນດີຂື້ນເທື່ອລະກ້າວ.
ໂອກາດນີ້ ທ່ານ ພັນເອກ ສົມທອງ ດອນກັນນ້ອຍ ຄະນະປະຈໍາພັກແຂວງ ຫົວໜ້າກອງບັນຊາການທະຫານແຂວງ ເຊກອງ ປະທານຄະນະກໍາມະການພັດທະນາບ້ານ ຢຶບ ໄດ້ຕີລາຄາສູງຕໍ່ຄະນະກໍາມະການຂັ້ນແຂວງ, ຂັ້ນເມືອງ ທີ່ເຮັດສໍາເລັດໜ້າທີ່ຕົນເອງຢ່າງມີຄວາມຕັ້ງໜ້າ ພ້ອມຮຽກຮ້ອງໃຫ້ປະຊາຊົນພາຍໃນບ້ານ ຈົ່ງສືບຕໍ່ປົກປັກຮັກສາຮີດຄອງປະເພນີອັນດີງາມຂອງຊາດ ກໍ່ຄືຂອງຊົນເຜົ່າໃຫ້ຢູ່ກັບຄົນລາວຕະຫຼອດໄປ, ນອກນີ້ ກໍ່ຕ້ອງເຊື່ອມຊືມທຸກມະຕິຄໍາສັງ, ນິຕິກໍາຕ່າງໆຂອງພັກ-ລັດ ຕິດພັນກັບມະຕິກອງປະຊຸມໃຫ່ຍ ຄັ້ງ ທີ 10 ຂອງພັກ, ເຂົ້າໃຈຕໍ່ການພັດທະນາປະເທດຊາດ, ບ້ານເມືອງ ໂດຍຖືສຳຄັນ ຄວາມ ສະໝານສາມັກຄີ ເປັນປຶກແຜ່ນແໜ້ນໜາ, ມີສະຕິເຄົາລົບລະບຽບກົດໝາຍຂອງພັກ-ລັດ ວາງອອກ ໄປພ້ອມກັບການສ້າງເສດຖະກິດຄອບຄົວ ໃຫ້ດີຂື້ນເປັນກ້າວໆ.
Editor: ກຳປານາດ ລັດຖະເຮົ້າ
