ໃນວັນທີ 22 ມິຖຸນາ 2017 ທີ່ນະຄອນຫລວງວຽງຈັນ, ໄດ້ມີພິທີເຊັນບົດບັນທຶນຄວາມເຂົ້າໃຈຮ່ວມລົງທຶນ ລະຫວ່າງ ທ່ານ ໄຊຍະສອນ ປັນຍາທິບ ປະທານບໍລິສັດ ປັນຍາທິບ ໂຄສະນາຂອງ ສປປ ລາວ ແລະ ທ່ານ ປະຣິນ ໂລຈະນະໂກສິນ ປະທານບໍລິສັດ ແພລນບີ ມີເດຍ ຈາກປະເທດໄທ, ການຮ່ວມທຶນດັ່ງກ່າວ ມືມູນຄ່າການລົງທຶນເກືອບ 3 ລ້ານໂດລາສະຫະລັດ ເຊິ່ງເປັນການຮ່ວມທຶນ ເພື່ອການພັດທະນາ ຕະຫລາດສື່ໂຄສະນາ ນອກສະຖານທີ່ໃນ ສປປ ລາວ ໃຫ້ມີມາດຕະຖານສາກົນ. ໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ແກ້ວພິໄລວັນ ອາໄພລາດ, ຮອງເຈົ້າຄອງນະຄອນຫລວງວຽງຈັນ, ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ໄຊຍະສອນ ປັນຍາທິບ ມີຄຳເຫັນວ່າ: ການຮ່ວມມືໃນຄັ້ງນີ້, ແມ່ນເບິ່ງເຫັນໂອກາດທາງດ້ານທຸລະກິດ ທີ່ມີການເຕີບໃຫຍ່ ແລະ ເສດຖະກິດ-ສັງຄົມຂອງ ສປປ ລາວ ມີການຂະຫຍາຍຕົວ ແລະ ການພັດທະນາແບບກ້າວກະໂດດ ທາງດ້ານວົງການສື່ໂຄສະນາ ໂດຍສະເພາະ ພາຍຫລັງທີ່ ສປປ ລາວ ໄດ້ເຂົ້າເປັນປະຊາຄົມເສດຖະກິດອາຊຽນ ແລະ ໄດ້ເຊື່ອມໂຍງກັບອາຊຽນ ແລະ ພາກພື້ນ. ພ້ອມທັງອີງຕາມແນວທາງນະໂຍບາຍຂອງພັກ ແລະ ລັດຖະບານ ໃນການຫັນປະເທດໄປສູ່ອຸດສາຫະກຳ ແລະ ທັນສະໄໝ, ນຳພາປະເທດຊາດ ອອກຈາກປະເທດດ້ອຍພັດທະນາ ໃນປີ 2020 ແລະ ເປັນການດຶງດູດເອົາການລົງທຶນຂອງຕ່າງປະເທດ ເພື່ອສ້າງຜະລິດຕະພັນການໂຄສະນາດ້ານໃຫ້ຫລາກຫລາຍສີສັນ, ພ້ອມທັງດຶງດູດເອົາລູກຄ້າ ໃນບັນດາປະເທດອາຊຽນ ແລະ ພາກພື້ນ.
Editor: ຕະວັນ ແສງສະຫວັນ
