ວັນທີ 12 ມິຖຸນາ ຜ່ານມາ, ເຈົ້າໜ້າທີ່ ປກສ ເມືອງສີສັດຕະນາກ, ນະຄອນຫຼວງວຽງຈັນ ໄດ້ກັກຕົວທ້າວ ໄຊຊະນະ ຫຼື ໂຊລ້າ ອາຍຸ 35 ປີ, ຢູ່ບ້ານວັດນາກ, ເມືອງສີສັດຕະນາກ, ນະຄອນຫຼວງວຽງຈັນ ທີ່ກໍ່ເຫດລັກ ຄໍາຮູບປະພັນໜັກ 30 ບາດ ກັບ 2 ສະຫຼຶງ ຂອງປະຊາຊົນຢູ່ບ້ານດຽວກັນ ໄປດຳເນີນຄະດີ.
ເຈົ້າໜ້າທີ່ ປກສ ເມືອງ ສີສັດຕະນາກ ໃຫ້ຮູ້ວ່າ: ໃນວັນທີ 11 ເມສາ 2017 ໄດ້ມີຜູ້ເສຍຫາຍຊື່ທ້າວ ອິນແປງ ອາຍຸ 34 ປີ, ຢູ່ບ້ານວັດນາກ ເມືອງສີສັດຕະນາກ ເຂົ້າແຈ້ງຄວາມວ່າ: ມີຄົນຮ້າຍງັດເອົາຊັບສິນ ຢູ່ພາຍໃນຕູ້ເຊັບ ຢູ່ເຮືອນຂອງຜູ້ກ່ຽວ, ຜົນເສຍຫາຍມີ: ສາຍຄໍຄຳ ຈຳນວນ 3 ເສັ້ນ, ສາຍແຂນຄຳ 3 ເສັ້ນ, ຄຳແທ່ງ 1 ແທ່ງຕຸ່ມຫູຄຳ 1 ຄູ່, ສາຍແອວທອງນາກ 1 ເສັ້ນ, ແຫວນຄຳ 2 ວົງ, ລວມທັງໝົດ 30 ບາດ ກັບ 2 ສະຫຼຶງ ແລະ ເງິນກີບ 2 ລ້ານກີບ, ເງິນໂດລາ 1.000 ໂດລາສະຫະລັດ.
ຈາກການລົງເກັບກໍາຂໍ້ມູນຫຼັກຖານຕ່າງໆ ແລະ ຂັດຈອນເປົ້າໝາຍຖືກສົງໄສ. ມາຮອດວັນທີ 12 ມິຖຸນາ 2017 ກໍສາມາດກັກຕົວຜູ້ກໍ່ເຫດລັກຊັບຄັ້ງນີ້ໄດ້ ຊື່ທ້າວ ໄຊຊະນະ ທີ່ຢູ່ເຮືອນໃກ້ກັນ ມາສອບສວນ ແລະ ດຳເນີນຄະດີຕາມ ຂັ້ນຕອນຂອງກົດໝາຍ.
ຂອບໃຈຂໍ້້ມູນຈາກ ຫນັງສືພິມຄວາມສະຫງົບ
Editor:ຕະວັນ ແສງສະຫວັນ
