ມູນນິທິເຈືອງສົມບູນຂັນ ຮ່ວມກັບ ສະມາຄົມນັກຂ່າວແຫ່ງ ສປປ ລາວ ໄດ້ຈັດຖະແຫລງ ຂ່າວສະເໜີປຶ້ມ ແມງໄມ້ຢູ່ທຸກແຫ່ງ ຂຶ້ນ ໃນວັນທີ 22 ມິຖຸນາ 2017 ທີ່ນະຄອນຫລວງວຽງຈັນ, ໂດຍມີຈຸດປະສົງ ໃຫ້ເດັກນ້ອຍລາວໄດ້ອ່ານ ແລະ ສຶກສາ, ພ້ອມທັງໃຫ້ໂອກາດຊາວໜຸ່ມລາວ ໄດ້ຝຶກການອ່ານເປັນພາສາອັງກິດໄປພ້ອມໆກັນ, ຊຶ່ງແມ່ນທັກສະທີ່ຈຳເປັນອີກອັນໜຶ່ງ ທີ່ຊາວໜຸ່ມ ຕ້ອງໄດ້ພັດທະນາ ຍິ່ງຮູ້ຫລາຍພາສາ ກໍຍິ່ງມີໂອກາດຫລາຍຂຶ້ນ ໃນການຮັບເອົາຄວາມຮູ້ໃໝ່ໆ.
ນັກຂຽນທັງສອງຄົນ ຄື: ທ່ານ ຈອນຈີເອສເປີຕັນ ແລະ ທ່ານເກຮກໍ ອາຮ ມີບອລ ເມີ ໄດ້ສຶກສາແມງໄມ້ນາໆພັນ ແລະ ມີຄວາມສົນໃຈພັນແມງໄມ້ຊະນິດຕ່າງໆ ລວມທັງແມງໄມ້ທີ່ກິນໄດ້ ແລະ ກິນບໍ່ໄດ້ ໃນເຂດອາຊີຕາເວັນອອກສ່ຽງໃຕ້ ແລະ ໄດ້ສຶກສາມາດົນກວ່າ 50 ປີ ໃນໂລກນີ້, ແມງໄມ້ ແລະ ສັດໃນຕະກຸນແມງໄມ້ ແມ່ນຈັດຢູ່ໃນກຸ່ມສັດ ທີ່ມີຈຳນວນຫລວງຫລາຍ ກວ່າສັດ ປະເພດອື່ນໆ ແລະ ສາມາດພົບເຫັນໄດ້ຢູ່ທຸກແຫ່ງ ໃນປະເທດລາວ.
ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ ລາວ ກ່າວວ່າ: ປື້ມນີ້ໄດ້ນຳສະເໜີຫົວຂໍ້ ກ່ຽວກັບແມງໄມ້ຊະນິດຕ່າງໆ ເຊັ່ນ: ຄວາມຫລາກຫລາຍ, ຊະນິດກິນໄດ້, ທີ່ຢູ່ອາໃສ, ວົງຈອນຊິວິດ, ການປັບຕົວກັບສະພາບແວດລ້ອມ ຫລື ການພາງໂຕ, ຄຸນລັກສະນະເປັນປະໂຫຍດ, ສ້າງຄວາມເສຍຫາຍ ແລະ ສັດໃນຕະກຸນແມງໄມ້ອື່ນໆ. ຫວັງວ່າປຶ້ມຫົວນີ້, ຈະເຮັດໃຫ້ຜູ້ອ່ານສົນໃຈກ່ຽວກັບແມງໄມ້ຊະນິດຕ່າງໆ ຢູ່ໃນຈັກກະວານນີ້, ຮູບພາບທັງໝົດ ຢູ່ໃນປຶ້ມຫົວນີ້ແມ່ນໄດ້ຖ່າຍຢູ່ໃນປະເທດລາວ ທົ່ວປະເທດ. ໂດຍໃຊ້ເວລາ ຫລາຍປີ ໃນການລວບລວມກ່ຽວກັບພາບແມງໄມ້.
Editor: ກຳປານາດ ລັດຖະເຮົ້າ
