ເພື່ອແນໃສ່ປັບປຸງລະບົບການເມືອງຂັ້ນທ້ອງຖິ່ນ ໃຫ້ມີຄວາມເຂັ້ມແຂງ, ເຄື່ອນໄຫວຖືກຕ້ອງຕາມພາລະບົດບາດ, ຫນ້າທີ່, ຍົກສູງຄວາມເປັນເຈົ້າການ ແລະ ຄວາມຮັບຜິດຊອບຂອງທ້ອງຖິ່ນຮາກຖານ ກໍ່ຄືອົງການປົກຄອງບ້ານ ໄດ້ຮັບການຍົກສູງເພື່ອສ້າງໃຫ້ບ້ານກາຍເປັນບ້ານພັດທະນາ, ມີລະບົບການເມືອງທີ່ເຂັ້ມແຂງ, ຊາວບ້ານໄດ້ຮັບການສຶກສາອົບຮົມທາງດ້ານການເມືອງ-ແນວຄິດ, ບ້ານມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ, ມີການພັດທະນາຢ່າງຕໍ່ເນື່ອງທັງເຮັດໃຫ້ພະນັກງານກໍ່ສ້າງຮາກຖານການເມືອງຮັບຮູ້ຕື່ມກ່ຽວກັບຫນ້າທີ່ການເຄື່ອນໄຫວຂອງຕົນໃນການເປັນຜູ້ຊີ້ນຳ, ເປັນຜູ້ນຳພາ, ເປັນຜູ້ເຮັດຕົວຈິງ ແລະ ເປັນຜູ້ຊ່ວຍເຫລືອ-ຮ່ຳຮຽນນຳປະຊາຊົນແນໃສ່ສ້າງບ້ານໃຫ້ກາຍເປັນຫົວຫນ່ວຍພັດທະນາຮອບດ້ານ ແລະ ກາຍເປັນຕົວເມືອງນ້ອຍຢູ່ໃນຊົນນະບົດຕາມແຜນການວາງໄວ້.
ໃນກອງປະຊຸມຜູ້ເຂົ້າຮ່ວມໄດ້ເຊື່ອຊຶມບັນດາເອກະສານສຳຄັນຄື: ຄຳສັ່ງແນະນຳເລກທີ 03/ກມສພ ວ່າດ້ວຍ ການສ້າງບ້ານໃຫ້ເປັນຫົວຫນ່ວຍພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍຢູ່ໃນຊົນນະບົດ, ຄຳສັ່ງຂອງນາຍົກລັດຖະມົນຕີ ສະບັບເລກທີ 34/ນຍ ວ່າດ້ວຍ ທິດທາງເປົ້າຫມາຍ ແລະ ມາດຕະຖານສ້າງ ແຂວງເປັນຫົວຫນ່ວຍຍຸດທະສາດ,ສ້າງເມືອງເປັນຫົວຫນ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວຫນ່ວຍພັດທະນາ,ເອກະສານເລກທີ 647/ພ ນ ວ່າດ້ວຍການເຄື່ອນໄຫວຂອງອົງການປົກຄອງບ້ານ,ເອກະສານເລທີ 04/ຈຂ ວຈ ວ່າດ້ວຍການເຄື່ອນໄຫວຂອງພະນັກງານກໍ່ສ້າງຮາກຖານຢູ່ ແຂວງວຽງຈັນ.
ພິທີດັ່ງກ່າວໄດ້ໄຂຂຶ້ນໃນຕອນເຊົ້າວັນທີ 23 ມີຖຸນາ 2017 ທີ່ຜ່ານມາ ຢູ່ທີ່ຫ້ອງການບ້ານໂພນແຍງ, ເມືອງແມດ, ແຂວງວຽງຈັນ ໂດຍການເຂົ້າຮ່ວມເປັນປະທານຂອງ ທ່ານ ລຳໄມ ກູດລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆແມດ, ຫົວຫນ້າຄະນະຊີ້ນຳຈຸດສຸມພັດທະນາກຸ່ມບ້ານເມືອງຄີ່, ມີຄະນະຊີ້ນຳຈຸດສຸມ,ອົງການປົກຄອງ 6 ບ້ານ ແລະ ພະນັກງານກໍ່ສ້າງຮາກຖານການເມືອງເຂົ້າຮ່ວມ 63 ທ່ານ, ຍິງ 5 ທ່ານ, ກອງປະຊຸມໄດ້ດຳເນີນເປັນເວລາ 1 ວັນເຕັມຈຶ່ງອັດລົງ.
Editor: ກຳປານາດ ລັດຖະເຮົ້າ
