ແຂວງຫຼວງພະບາງ ຄືຈຸດໝາຍປາຍທາງຂອງນັກທ່ອງທ່ຽວທີ່ເຂົ້າມາທ່ອງທ່ຽວລາວ. ດັ່ງນັ້ນ, ຈຶ່ງເຮັດໃຫ້ນັກລົງທຶນທັງພາຍໃນ ແລະ ຕ່າງປະເທດ ສົນໃຈເຂົ້າມາລົງທຶນໃນແຂວງດັ່ງກ່າວຢ່າງຫຼວງຫຼາຍ; ສະເພາະໃນ 3 ເດືອນຕົ້ນປີ 2017 ນີ້ ໄດ້ມີບໍລິສັດເອກະຊົນສົນໃຈເຂົ້າລົງທຶນທັງໝົດ 43 ໂຄງການ ມີມູນຄ່າ 83 ຕື້ກວ່າກີບ.
ໃນບົດສະຫຼຸບການຈັດຕັ້ງປະຕິບັດ ແຜນພັດທະນາເສດຖະກິດ–ສັງຄົມ 3 ເດືອນ ( ງວດ1 ) ຜ່ານມາວ່າ: ການລົງທຶນຂອງເອກະຊົນພາຍໃນ ແລະ ຕ່າງປະເທດ ໄດ້ທັງໝົດ 43 ໂຄງການ ມີມູນຄ່າ 83.76 ຕື້ກີບ. ໃນນັ້ນ,ການລົງທຶນກິດຈະການສໍາປະທານ ມີ 4 ໂຄງການ ມີມູນຄ່າ 19.6 ຕື້ກີບ ເຊິ່ງເປັນກິດຈະກໍາ ປູກກ້ວຍຫອມ ແລະ ເປັນການລົງທຶນຂອງເອກະຊົນຕ່າງປະເທດ (ສປ ຈີນ ) ທັງໝົດ; ການລົງທຶນກິດຈະການທົ່ວໄປ ມີ 39 ຫົວໜ່ວຍ ມູນຄ່າ 64.16 ຕື້ກີບ. ໃນນັ້ນ, ມີການລົງທຶນຂອງເອກະຊົນຕ່າງປະເທດມີ 1 ຫົວໜ່ວຍ ມູນຄ່າ 10 ຕື້ກີບ,ການລົງທຶນຂອງເອກະຊົນພາຍໃນມີ 36 ຫົວໜ່ວຍ ມີມູນຄ່າ 42.16 ຕື້ກີບ, ການລົງທຶນຂອງເອກະຊົນພາຍໃນ ບວກຕ່າງປະເທດມີ 2 ຫົວໜ່ວຍ ມີມູນຄ່າ 12 ຕື້ກີບ.
ຂະນະທີ່ ແຜນພັດທະນາເສດຖະກິດ–ສັງຄົມ 2017 ໃນງວດທີ 2 ຄື: ການລົງທຶນຂອງເອກະຊົນພາຍໃນ ແລະ ຕ່າງປະເທດ ແມ່ນຈະສູ້ຊົນຍາດແຍ່ງການລົງທຶນໃຫ້ໄດ້ 40 ກວ່າໂຄງການ; ໃນນີ້, ເປັນການລົງທຶນກິດຈະການສຳປະທານ 4 ໂຄງການ ມູນຄ່າ 15 ຕື້ກີບ ແລະ ການລົງທຶນໃນກິດຈະການທົ່ວໄປ 40 ຫົວໜ່ວຍ ມູນຄ່າ 60 ຕື້ກີບ.
Editor: ຕະວັນ ແສງສະຫວັນ
