ເມື່ອບໍ່ດົນມານີ້, ເຈົ້າໜ້າທີ່ ປກສ ເມືອງບໍລິຄັນ, ແຂວງບໍລິ ຄຳໄຊ, ສາມາດຈັບຫົວໂປ່ໂຕການລັກລົດຈັກຂອງພົນລະເມືອງໄດ້ 2 ຄົນຄື: ທ້າວ ດາວເພັດ ອາຍຸ 22 ປີ, ຢູ່ບ້ານຜາເມືອງ ແລະ ທ້າວ ມະນີວອນ (ໂຢດ) ອາຍຸ 18 ປີ ຢູ່ບ້ານຫ້ວຍຄູນ, ເມືອງບໍລິຄັນ ແຂວງບໍລິຄຳໄຊ ໂດຍໄດ້ຮ່ວມກັນເຄື່ອນໄຫວ ລັກລົດຈັກຂອງປະຊາຊົນແຕ່ ເດືອນເມສາ 2017 ເປັນຕົ້ນມາ ທັງໝົດ 21 ຄັນ, ພາຍຫລັງລັກມາໄດ້ກໍເອົາໄປໄວ້ຢູ່ຕູບນ້ອຍ ຢູ່ປ່າບ້ານໂນນສົມບູນ ເພື່ອລົບຫລີກການຕິດຕາມຂອງເຈົ້າໜ້າທີ່ຕຳຫລວດ, ກ່ອນນຳອອກໄປ ຂາຍໃຫ້ປະຊາຊົນ. ສ່ວນຫລາຍ ແມ່ນ ເຄື່ອນໄຫວລັກຢູ່ເຂດເມືອງບໍລິຄັນ, ເມືອງປາກຊັນ ແລະ ເມືອງທ່າພະບາດໂດຍວິທີການ ຈະໄປເລາະເບິ່ງເຮືອນໃດມີລົດຈັກ ແລ້ວສັງເກດທາງເຂົ້າ-ອອກ ເຮືອນໃຫ້ລະອຽດ ເພື່ອວາງແຜນລົງມືລັກ. ໃນປັດຈຸບັນ ເຈົ້າໜ້າທີ່ສາມາດເກັບກູ້ລົດທີ່ພວກເຂົາລັກໄປຄືນມາໄດ້ແລ້ວຈຳນວນ 7 ຄັນ ສ່ວນທີ່ຍັງເຫລືອ ກຳລັງປະສານສົມທົບກັບພາກສ່ວນກ່ຽວຂ້ອງເກັບກູ້ມາ ໂດຍໄວເພື່ອມອບຄືນໃຫ້ເຈົ້າ ຂອງເດີມ.
ຂອບໃຈຂ້ໍມູນຈາກ ຫນັງສືພິມລາວພັດທະນາ
Editor: ຕະວັນ ແສງສະຫວັນ
