ຖືວ່າຜ່ານໄປປະມານຫນຶ່ງອາທິດພໍດີ  ທີ່ທາງພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ມີແຈ້ງການ ຫ້າມບໍ່ໃຫ້ຂາຍເຄື່ອງ, ຈອດລົດທຸກປະເພດ ແລະ ວາງສິ່ງກີດຂວາງ ຢູ່ບໍລິເວນພື້ນທີ່ເສັ້ນທາງເດີນລົດ ແລະ ເຂດສະຫງວນທາງ ລວມທັງພື້ນທີ່ທາງຍ່າງ ຕາມຖະໜົນສາຍຫຼັກໃນນະຄອນຫຼວງວຽງຈັນ.

ແຕ່ຜ່ານການລົງຕິດຕາມຂອງຜູ້ສືຂ່າວພວກເຮົາ ພົບວ່າ: ກໍ່ຍັງພົບເຫັນແມ່ຄ້າບາງຄົນ ຍັງບໍ່ປະຕິບັດຕາມແຈ້ງການ ຂອງພະແນກໂຍທາທິການ ແລະ ຂົນສົ່ງ ວາງອອກ ໂດຍຍັງພົບເຫັນການຂາຍເຄື່ອງໃສ່ບໍລິເວນທາງຄົນຍ່າງ ຊຶ່ງກໍ່ເປັນພາບທີ່ບໍ່ເຫມາະສົມປານໃດ,  ຊຶ່ງຕາມທີ່ທີມຂ່າວສັງເກດເບິ່ງ ກໍ່ຮູ້ວ່າ ແມ່ຄ້າ ເຫລົ່ານີ້ ມັກຈະມາຂາຍກັນໃນເວລາວັນເສົາ-ອາທິດ, ຊຶ່ງເປັນວັນພັກຂອງເຈົ້າຫນ້າທີ່ຫລາຍຄົນ ສະນັ້ນ ຈຶ່ງຍາກໃນການກວດກາ ແລະ ຖ້າປ່ອຍປະໄວ້ດົນສັງຄົມກໍ່ເປັນຫ່ວງວ່າຈະກັບຄືນມາເປັນດັ່ງເດີມອີກ ດັ່ງນັ້ນ ຈຶ່ງຝາກເຖິງພາກສ່ວນທີ່ກ່ຽວຂ້ອງ ແກ້ໄຂໃຫ້ເຖິງທີ່ສຸດດ້ວຍ.

Editor: ຕະວັນ ແສງສະຫວັນ