ປັດຈຸບັນ ປະຊາຊົນຜູ້ທີ່ມີເງື່ອນໄຂ ຈຳນວນໜຶ່ງຢູ່ ບ້ານຖິ່ນຍຸງ ເມືອງວຽງຄຳ ແລະ ບ້ານແອກຊ້າງ ເມືອງໂພນໂຮງ, ນັບທັງບ້ານກົກກ້ຽງ ເມືອງແກ້ວອຸດົມ, ແຂວງວຽງຈັນ ໄດ້ເລີ່ມສົນໃຈຫັນມາເຂົ້າຮ່ວມ ໂຄງການທົດລອງ ລ້ຽງງົວຜູ້ທອມ ແລະ ງົວແມ່ປັບປຸງພັນ ເຊິ່ງໄດ້ຮັບການ ສະໜັບສະໜູນຊ່ວຍເຫລືອຈາກອົງການກອຍກາ ສາທາລະນະລັດ ເກົາຫລີ ເພື່ອປະກອບ ສ່ວນຫລຸດຜ່ອນ ຄວາມທຸກຍາກ ໃຫ້ຫມົດໄປໃນເທື່ອລະກ້າວ.

ໂຄງການນີ້, ໄດ້ເລີ່ມຈັດຕັ້ງປະຕິບັດ ກິດຈະກຳຢູ່ 3 ບ້ານດັ່ງກ່າວ ນັບແຕ່ທ້າຍ ປີ 2016, ສຳລັບບ້ານຖິ່ນຍຸງ ມີ 3 ຄອບຄົວ ແລະ ບ້ານແອກຊ້າງ ປະກອບ 7ຄອບຄົວ, ລວມທັງໝົດ 10 ຄອບຄົວ, ໃນນີ້ 5 ຄອບຄົວລ້ຽງງົວຜູ້ທອມ ແລະ ອີກຂຳນວນ 5 ຄອບຄົວລ້ຽງງົວແມ່ປັບປຸງພັນ, ມີງົວທັງໝົດ 150 ໂຕ, ທັງນີ້ໄດ້ປະຕິບັດ ຕາມຫລັກວິຊາການ ຂອງໂຄງການ ເປັນຕົ້ນ ແມ່ນການລ້ຽງງົວຢູ່ໃນຄອກ, ທັງມີການປູກຫຍ້າລ້ຽງສັດ ແລະ ການໃຫ້ອາຫານທີ່ຖືກຕ້ອງ. ສ່ວນບ້ານກົກກ້ຽງ ມີ 2 ກຸ່ມ 9 ຄອບຄົວ, ມີງົວ 30 ໂຕ ເຊິ່ງເປັນໂຄງການສຳຮອງ ໃຊ້ເພື່ອປຽບທຽບກັບ ໂຄງການຫລັກ ແລະ ເປັນການລ້ຽງແບບທຳມະຊາດ, ບໍ່ມີການປູກຫຍ້າລ້ຽງສັດ.

ເຂົ້າຮ່ວມໂຄງການດັ່ງກ່າວ, ປະຊາຊົນຕ້ອງໄດ້ ປະກອບສ່ວນງົວ ແລະ ເນື້ອທີ່ສຳລັບປູກຫຍ້າ, ສ່ວນໂຄງການ ໄດ້ສະໜອງແນວພັນຫຍ້າ, ອາຫານສັດ, ງົບປະມານການກໍ່ສ້າງຮົ້ວ ແລະ ຄອກລ້ຽງງົວ, ນັບທັງກົນຈັກກະສິກຳ, ຢາປ້ອງກັນ ແລະ ປິ່ນປົວສຸຂະພາບສັດລ້ຽງ, ຊຶ່ງໃນໜຶ່ງປີຜ່ານມາ ການຊ່ວຍເຫລືອຂອງ ສ.ເກົາຫລີ ສະເພາະບ້ານຖິ່ນຍຸງ ມີມູນຄ່າ 350 ລ້ານກວ່າກີບ, ບ້ານແອກຊ້າງ 820 ລ້ານກວ່າກີບ ແລະ ບ້ານກົກກ້ຽງ 690 ລ້ານກວ່າກີບ, ລວມທັງໝົດ ເກືອບ 2 ຕື້ກີບ.

ເມື່ອບໍ່ດົນມານີ້, ທ່ານ ນາຍົກລັດຖະມົນຕີ ຍັງໄດ້ລົງຢ້ຽມຊົມຄອບຄົວ ທົດລອງລ້ຽງງົວ ທີ່ເຂົ້າຮ່ວມໂຄງການດັ່ງກ່າວ ຢູ່ບ້ານຖິ່ນຍຸງ ແລະ ກຸ່ມລ້ຽງງົວຢູ່ບ້ານແອກຊ້າງ ໂດຍໄດ້ສະແດງຄວາມຊົມເຊີຍ ຕໍ່ລັດຖະບານ ສ.ເກົາຫລີ ກໍ່ຄື ອົງການກອຍກາ ທີ່ໄດ້ໃຫ້ການສະໜັບສະໜູນ ໂຄງການ ເຮັດໃຫ້ປະຊາຊົນ ມີຄວາມສົນໃຈລ້ຽງງົວ ຊະນິດດັ່ງກ່າວ. ພ້ອມນີ້, ທ່ານນາຍົກລັດຖະມົນຕີ ຍັງເຊື່ອໝັ້ນວ່າ ໂຄງການດັ່ງກ່າວ, ຈະຂະຫຍາຍຕົວສູ່ຊົນນະບົດ ອີກຫລາຍໆແຫ່ງ, ທັງນີ້, ເພື່ອເປັນການສົ່ງເສີມປະຊາຊົນ ສ້າງລາຍໄດ້ແກ່ຄອບຄົວ ແລະ ຫລຸດຜ່ອນຄວາມທຸກຍາກ ໃຫ້ໝົດໄປໃນເທື່ອລະກ້າວ.

Editor: ກຳປານາດ ລັດຖະເຮົ້າ