ເຈົ້າໜ້າທີ່ຕໍາຫຼວດ ປກສ ເມືອງໄຊເຊດຖາ ນະຄອນຫຼວງວຽງຈັນ ຕິດຕາມຈັບແກ້ງ ລັກລົດຈັກ ໄດ້ທັງ ໝົດ 7 ແກ້ງ, ກັກຕົວ ຜູ້ຖືກຫາ 13 ຄົນ, ພ້ອມທັງເກັບກູ້ຂອງກາງລົດຈັກຈໍານວນ 19 ຄັນ.
ເຈົ້າໜ້າທີ່ສືບສວນ-ສອບສວນ ປກສ ເມືອງໄຊເຊດຖາ ໄດ້ຖະແຫຼ່ງຂ່າວໃນວັນທີ 29 ມິຖຸນາ 2017 ວ່າ: ເຈົ້າໜ້າທີ່ໄດ້ເຂົ້າຈັບກຸ່ມມົ້ວສຸມ ຢາເສບຕິດ ແລະ ອອກກວດກາ ລາດຕະເວນພາຍໃນເມືອງ ໃນກາງເດືອນເມສາ 2017 ໄດ້ກັກຕົວໄວລຸ້ນ ຈໍານວນໜຶ່ງ ແລະ ພົບເຫັນກະແຈໂຕເຕ ທີ່ໃຊ້ເຂົ້າໃນການເຄື່ຶອນໄຫວລັກລົດຈັກ. ຈາກນັ້ນ, ເຈົ້າໜ້າທີ່ ຈຶ່ງໄດ້ສືບສວນຂະຫຍາຍຜົນຫາຫົວໂປໂຕການຂອງກຸ່ມລັກລົດຈັກໃນພາຍໃນເມືອງ ແລະ ບັນດາເມືອງອ້ອມຂ້າງໄດ້ທັງໝົດ 7 ແກ້ງ.
ຕໍ່ກັບຄະດີດັ່ງກ່າວ, ເຈົ້າໜ້າທີ່ ປກສ ເມືອງ ໄຊເຊດຖາ ຍັງທໍາການສືບສວນ-ສອບ ສວນຂະຫຍາຍຜົນ ຫາກຸ່ມແກ້ງທີ່ຮ່ວມຂະບວນການຕື່ມອີກ ເພື່ອຕິດຕາມມາດໍາເນີນຄະດີຕາມລະບຽບກົດໝາຍ.
ສໍາລັບ ລົດຈັກທີ່ເຈົ້າໜ້າທີ່ເກັບກູ້ຄືນມາໄດ້ຈໍານວນໜຶ່ງນັ້ນ ຍັງບໍ່ທັນມີຜູ້ເສຍຫາຍ ເຂົ້າມາ ພົວພັນ. ສະນັ້ນ, ເຈົ້າໜ້າທີ່ຈຶ່ງແຈ້ງມາຍັງເຈົ້າຂອງລົດທີ່ເສຍຫາຍໃຫ້ນໍາ ເອົາເອກະສານໄປພົວພັນກັບເຈົ້າໜ້າທີ່ຢູ່ກອງຄະດີບ້ານສົມສະຫງ່າ, ເມືອງໄຊເຊດຖາ ຕາມໂມງເວລາລັດຖະການ.
ຂອບໃຈຂໍ້ມູນຈາກ ຫນັງສືພິມຄວາມສະຫງົບ
Editor: ຕະວັນ ແສງສະຫວັນ
