ທ້າຍເດືອນມີຖຸນາ 2017 ນີ້, ຢູ່ຫ້ອງປະຊຸມຊັ້ນສອງຫ້ອງວ່າການເມືອງ ເຊໂປນ, ແຂວງສະຫວັນນະເຂດ, ແນວລາວສ້າງຊາດເມືອງເຊໂປນ ໄດ້ຈັດກອງປະຊຸມປືກສາຫາລືການສ້າງຄອບຄົວ ແລະ ບ້ານສາມັກຄີ-ປອງດອງຂື້ນຢ່າງເປັນທາງການ, ພາຍໃຕ້ການເປັນ ປະທານ ຂອງ ທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງ ພ້ອມຄະນະ, ທ່ານ ບຸນມາ ໄຊຍະກຸລາງ ປະທານແນວລາວສ້າງຊາດເມືອງເຊໂປນ, ມີບັນດາທ່ານ ໃນຄະນະກໍາມະການແນວລາວສ້າງຊາດແຂວງ, ຄະນະແນວລາວສ້າງຊາດເມືອງ, ຫ້ອງການອອ້ມຂ້າງເຂົ້າຮ່ວມຢ່າງພ້ອມພຽງ.
ໃນທີ່ປະຊຸມບັນດາແຂກເຂົ້າຮ່ວມຈະໄດ້ຮັບຟັງຄໍາແນະນໍາຂອງຄະນະປະຈໍາສູນກາງແນວລາວສ້າງຊາດ ເລກທີ 033/ຄປຈ.ສນຊລົງ ວັນທີ 19 ເມສາ 2017 ວ່າດ້ວຍການຈັດຕັ້ງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ ຂອງແນວລາວສ້າງຊາດ 2017-2020 ແລະ ນິຕິກໍາຕ່າງໆຂອງແນວລາວສ້າງຊາດ, ມາດຖານການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດແມ່ນໜຶ່ງໃນມາດຖານຄອບຄົວພັດທະນາ ແລະ ບ້ານພັດທະນາຂອງລັດຖະບານ (2016-2020) ຕິດພັນກັບຂະບວນແຂ່ງຂັນຮັກຊາດ ແລະ ພັດທະນາຕາມທິດ 3 ສ້າງ, ເປັນການຈັດຕັ້ງປະຕິບັດແນວທາງນະໂຍບາຍ ຂອງພັກກົດໝາຍ ແລະ ແຜນພັດທະນາເສດຖະກິດ-ສັງຄົມ ຂອງລັດໂດຍອີງໃສ່ 4 ມາດຖານການສ້າງຄອບຄົວສາມັກຄີປອງດອງ ຄື: ພໍ່ແມ່, ຜົວເມຍ ແລະ ລູກຫລານທຸກຄົນຢູ່ໃນຄອບຄົວມີຄວາມສາມັກຄີຮັກແພງ, ຖືກຕ້ອງປອງດອງກັນ, ມີຄວາມເຄົາລົບນັບຖືເຊີ່ງກັນ ແລະ ກັນ, ເປັນຄອບຄົວທີ່ມີຄວາມຕື່ນຕົວທາງດ້ານການເມືອງ, ມີສະຕິຕໍ່ການຈັດຕັ້ງ, ນັບຖືລະບຽບກົດໝາຍຂອງບ້ານເມືອງ,ເປັນເຈົ້າການເຂົ້າຮ່ວມໃນວຽກງານປົກປັກຮັກສາ ແລະ ສ້າງສາພັດທະນາບ້ານເມືອງ, ເປັນຄອບຄົວທີ່ອະນຸລັກຮິດຄອງປະເພນີອັນດີງາມ, ເສີມຂະຫຍາຍວັດທະນະທໍາຂອງເຜົ່າ ແລະ ຂອງຊາດ, ເປັນຄອບຄົວທີ່ມີແບບແຜນການດໍາລົງຊິວິດທີ່ປອດໃສ, ມີເຮືອນຢູ່ໝັ້ນຄົງ, ມີອາຊີບທໍາມາຫາກິນຄົງທີ່ ແລະ ເປັນຄອບຄົວພົ້ນທຸກ ແລະ ອີງໃສ່ 5 ມາດຖານການສ້າງບ້ານສາມັກຄີປອງດອງ ຄື: ປະຊາຊົນພາຍໃນບ້ານມີຄວາມສາມັກຄີປອງດອງ,ທຸກຄອບຄົວພາຍໃນບ້ານມີຄວາມຕື່ນຕົວທາງດ້ານການເມືອງ,ທຸກຄອບ ຄົວໃນບ້ານປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທໍາ ຮີດຄອງປະເພນີອັນດີງາມຂອງຊາດ, ຂອງບັນດາເຜົ່າ, ເປັນບ້ານພົ້ນທຸກ,ລະບົບການເມືອງ-ການປົກຄອງ ມີຄວາມໜັກແໜ້ນພ້ອມທັງເຜີຍແຜ່ນິຕິກໍາຕ່າງໆຂອງແນວລາວສ້າງຊາດເມືອງ,
ຈາກນັ້ນໃນກອງປະຊຸມກໍ່ໄດ້ຮ່ວມປືກສາຫາລືຄົ້ນຄວ້າເຈາະຈີ້ມບັນຫາຕ່າງໆຂໍ້ສະດວກ ແລະ ຂໍ້ຫຍຸ້ງຍາກມາປັບປຸງແກ້ໄຂເພື່ອໃຫ້ວຽກງານແນວລາວສ້າງຊາດ ໂດຍສະເພາະການສ້າງຄອບຄົວ ແລະ ບ້ານສາມັກຄີປອງດອງໃຫ້ສໍາເລັດຕາມຈຸດປະສົງທີ່ວາງໄວ້ 100 ສ່ວນຮ້ອຍ

Editor: ກຳປານາດ ລັດຖະເຮົ້າ