ງານວາງສະແດງ ເຄື່ອງເຮືອນລາວຄັ້ງທີ 2 ຫຼື 2nd Lao Home and Living Fair 2017 ທີ່ສູນການຄ້າ ລາວໄອເຕັກ ຫຼັງເກົ່າ ທີ່ຈະຈັດຂຶ້ນໃນລະຫວ່າງວັນທີ 8-16 ກະກົດ 2017 ປະຈຸບັນ ມີຫົວຫນ່ວຍທຸລະກິດ ຜູ້ປະກອບການໂຮງງານເຟີນິເຈີ ສະແດງເຈດຈຳນົງ ເຂົ້າຮ່ວມງານແລ້ວ ຈຳນວນ 65 ໂຮງງານ ຫລື ປະມານ 160 ຫ້ອງວາງສະແດງ ໂດຍມາຈາກ 12 ໂຮງງານຈາກຕ່າງແຂວງ ແລະ 53 ໂຮງງານຈາກນະຄອນຫລວງ ຊຶ່ງຈະເນັ້ນສິນຄ້າປະເພດເຟີນິເຈີຮັບໃຊ້ພາຍໃນເຮືອນຈາກໄມ້ເນື້ອແຂງ, ຫວາຍ, ໄມ້ປ່ອງ ແລະ ເຄື່ອງຈັກສານຕ່າງໆ ລວມໄປເຖິງສິນຄ້າໂອດ໋ອບຈຳນວນຫນຶ່ງ, ຊຶ່ງຂໍ້ມູນດັ່ງກ່າວແມ່ນຖືກເປີດເຜີຍອອກມາຈາກທ່ານ ກອງມາລາ ພົມມາໄລ, ຮອງປະທານສະມາຄົມເຟີນິເຈີລາວ, ທັງເປັນເຈົ້າຂອງໂຮງງານ ເຄແອນບີ ເຟີນິເຈີ. ຢ່າງໃດກໍ່ຕາມ ໃນນາມຮອງປະທານສະມາຄົມເຟີນີເຈີໄມ້ລາວ ທ່ານ ຍັງຮຽກຮ້ອງ ໃຫ້ຜູ້ປະກອບການ ຫົວໜ່ວຍທຸລະກິດ ເຟີນີເຈີຂອງພວກເຮົາ ໄດ້ພ້ອມກັນ ນຳເອົາຜົນງານ ຂອງຕົນເອງໄດ້ເຂົ້າມາວາງສະແດງໃຫ້ຫຼາກຫຼາຍ ສົມເປັນງານເຄື່ອງເຮືອນລາວຄັ້ງທີ 2 ເພື່ອເຮັດໃຫ້ຜູ້ຊົມໃຊ້ໄດ້ຫັນມາໃຊ້ສິນຄ້າຂອງລາວໃຫ້ຫຼາຍຂຶ້ນ ສ້າງມູນຄ່າເພີ່ມໃຫ້ສິນຄ້າລາວສູງຂຶ້ນຫຼາຍເທົ່າໂຕ ພ້ອມນັ້ນ ຈະສົ່ງຜົນປະໂຫຍດຫຼາກຫຼາຍເປັນຕົ້ນແມ່ນ: ເປັນການປະກອບສ່ວນສ້າງວຽກເຮັດງານທຳໃຫ້ນາຍຊ່າງ ແລະ ອື່ນໆ.
ທາງດ້ານ ໂຮງງານ ເຄແອນບີ ເຟີນີເຈີ ຊຶ່ງເປັນໂຮງງານເຟີນິເຈີລາຍໃຫຍ່ ແລະ ຢູ່ໃນແຖວຫນ້າ ຂອງ ສປປ ລາວ ພາຍໃຕ້ການ ບໍລິຫານງານຂອງທ່ານ ກອງມາລາ ພົມມາໄລ ເປີດເຜີຍວ່າ: ໂຮງງານແມ່ນມີຄວາມພ້ອມ ໃນການນຳ ຜະລິດຕະພັນເຄືອງເຮືອນ, ສິນຄ້າຕົກແຕ່ງ, ເຟີນີເຈີຄົບວົງຈອນ ເກືອບຮ້ອຍລາຍການ ເພື່ອຮ່ວມວາງສະແດງ ແລະ ຕອບສະໜອງລູກຄ້າໃນງານ.
ຊຶ່ງງານວາງສະແດງເຄື່ອງເຮືອນລາວຄັ້ງທີ 2 ຈະເປັນເວທີ ເຕົ້າໂຮມພູມປັນຍາ, ເຕົ້າໂຮມປະສົບການຈາກຜູ້ປະກອບການທັງພາຍໃນ ແລະ ແລະ ລູກຄ້າ ເພື່ອມາຫາລື ປັບປຸງຄຸນນະພາບສິນຄ້າ ແລະ ນຳໃຊ້ວັດຖຸດິບໃຫ້ຄຸ້ມຄ່າ. ສໍາລັບ ໂຮງງານ ເຄເເອນບີ ເຟີນີເຈີ ປັດຈຸບັນ ມີການຜະລິດສິນຄ້າ ເກືອບ 100 ລາຍການ ເຂົ້າມາຮ່ວມວາງສະແດງ ແລະ ຈະມີການຈັດໝູນວຽນ ໃນແຕ່ລະວັນໄປເລື້ອຍໆ ເພື່ອເຮັດໃຫ້ລູກຄ້າ ທີ່ເຂົ້າມາເຫັນແລ້່ວ ໄດ້ຄວາມປະທັບໃຈ ພ້ອມດຽວກັນນັ້ນ ລູກຄ້າທ່ານໃດຫາກມີຄວາມສົນໃຈຢາກໃຫ້ ໂຮງງານເຄເເອນບີ ເຟີນີເຈີ ອອກແບບ ຫຼື ສ້າງສິນຄ້າໃຫ້ ພວກເຮົາກໍ່ມີຄວາມຍິນດີ ອອກແບບຕາມລູກຄ້າຕ້ອງການ ເຊິ່ງຮັບຮອງວ່າ ພວກເຮົານຳໃຊ້ໄມ້ ໃຫ້ເກີດຄຸນຄ່າເຂົ້າໃນຂະບວນການຜະລິດ, ນຳໃຊ້ເຄື່ອງມືທີ່ທັນສະໄໝ, ອອກແບບຜະລິດຕະພັນຕ່າງໆມາເພື່ອຕອບສະໜອງການຊົມໃຊ້ໃນວຽກງານຕົວຈິງ ບໍ່ວ່າຈະເປັນ ໂຕະຕັ່ງຮັບແຂກ ທີ່ປະສົມປະສານກັບຜະລິດຕະພັນອື່ນໆໄດ້ຢ່າງລົງໂຕ, ຕູ້ໃສ້ເສື້ອຜ້າ, ຕູ້ແຕ່ງໂຕ, ຊັ້ນວາງເຄື່ອງ, ຕຽງນອນ, ຜະລິດຕະພັນປະກອບໂຄມໄຟໃນຫ້ອງນອນ ແລະ ສິນຄ້າອື່ນໆ.
ການເຂົ້າຮ່ວມວາງສະແດງໃນແຕ່ລະຄັ້ງເປັນວຽກງານໜຶ່ງ ທີ່ໄດ້ພົບປະກັບຜູ້ປະກອບການດ້ວຍກັນ, ພົບປະກັບລູກຄ້າ ແລະ ນໍາເອົາແນວຄິດທີ່ລູກຄ້າ ຕ້ອງການມາປັບປຸງຜະລິດຕະພັນຂອງຕົນເອງ ລວມທັງ ໄດ້ເຫັນສິນຄ້າຂອງຜູ້ປະກອບການຄົນອື່ນ, ສິນຄ້າທີ່ນຳເຂົ້າມາ ເພື່ອນຳເອົາສິ່ງເຫຼົ່ານັ້ນ ມາປະຍຸກ ແລະ ເຕີ່ມແຕ່ງໃຫ້ສິນຄ້າຕົນເອງ ມີອັນໃໝ່ໆຢູ່ຕະຫຼອດ.
ງານວາງສະແດງສິນຄ້າເຄື່ອງເຮືອນລາວຄັ້ງທີ 2 ຫຼື 2nd Lao Home and Living Fair 2017 ຖືເປັນງານວາງສະແດງທີ່ ສະມາຄົມເຟີນີເຈີລາວ ຈັດເພື່ອສືບຕໍ່ງານດັ່ງກ່າວໃນປີຜ່ານມາ ເຊິ່ງແມ່ນມີຄວາມໝາຍຄວາມສຳຄັນດ້ານການຜະລິດ ໂດຍສະເພາະ ເຄື່ອງເຟີນີເຈີ, ເຄື່ອງຕົກແຕ່ງບ້ານ, ເຄື້ອງໃຊ້ພາຍໃນເຮືອນ ແລະ ອື່ນໆ ນອກຈາກນັ້ນ ຍັງເປັນການຈັດງານຄັ້ງທຳອິດ ຂອງຄະນະບໍລິຫານງານສະມາຄົມເຟິນີເຈີລາວຊຸດໃໝ່ ເພື່ອສານຕໍ່ເປົ້າໝາຍສ້າງຄວາມເຂັ້ມແຂງ ທາງດ້ານການເງິນຂອງສະມາຄົມ ໃຫ້ເຂົ້າເຖິງແຫຼ່ງວັດຖຸດິບ ເພື່ອຕອບສະໜອງສະມາຊິກ ພ້ອມກັນສ້າງຜະລິດຕະພັນໃຫ້ມີຄຸນນະພາບ ສະໜອງຕະຫຼາດພາຍໃນ ແລະ ຕ່າງປະເທດ.
ສະນັ້ນ ທາງລາຍການມີສຽງຖະແຫລງບາງຕອນຂອງທ່ານ ກອງມາລາ ພົມມາໄລ, ຮອງປະທານສະມາຄົມເຟີນິເຈີລາວ, ທັງເປັນເຈົ້າຂອງໂຮງງານ ເຄແອນບີ ເຟີນິເຈີ ມາໃຫ້ຮູ້ຂໍ້ມູນເພີ່ມຕື່ມ
Editor:ຕະວັນ ແສງສະຫວັນ
