ໃນວັນທີ 1 ກໍລະກົດ 2017 ນີ້ ທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກົມພີມຈຳຫນ່າຍ ແລະ ສະມາຄົມນັກປະພັນລາວ ໄດ້ຈັດງານຖະແຫລງຂ່າວ ປະກາດຜົນບົດວັນນະກຳ ທີ່ຊະນະເລີດ ເພື່ອຮ່ວມຮັບລາງວັນ ວັນນະກຳແມ່ນ້ຳຂອງ ປະຈຳປີ 2017 ທີ່ບາງກອກ, ປະເທດໄທ ໃນທ້າຍເດືອນ ສິງຫາ 2017 ທີ່ຈະມາເຖິງນີ້. ງານຖະແຫລງຂ່າວ ຄັ້ງນີ້ ຮ່ວມເປັນປະທານ ມີ ທ່ານ ທອງໃບ ໂພທິສານ ປະທານສະມາຄົມນັກປະພັນລາວ, ທັງເປັນ ຫົວຫນ້າກົມມໍລະດົກ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານນາງ ບົວໄຂ ເພັງພະຈັນ ຫົວຫນ້າກົມພີມຈຳຫນ່າຍ ແລະ ທ່ານນາງ ດາລາ ກັນລະຍາ ທີ່ປຶກສາສະມາຄົມນັກປະພັນລາວ, ທັງເປັນສິລະປິນແຫ່ງຊາດ, ພ້ອມນີ້ ຍັງມີສະມາຊີກນັກປະພັນລາວ, ບັນດາແຂກ ແລະ ສື່ມວນຊົນລາວ ເຂົ້າຮ່ວມ.
ກ້າວເຖິງ ລາງວັນນະກຳ ວັນນະກຳແມ່ນ້ຳຂອງ ແມ່ນໄດ້ຮັບການສ້າງຕັ້ງຂື້ນ ໃນປີ 2007 ໂດຍການລິເລີ່ມຂອງສະມາຄົມນັກປະພັນ ຫວຽດນາມ, ລາວ ແລະ ກຳປູເຈຍ ແລະ ໄດ້ມອບລາງວັນເປັນປີທຳອິດ ໃນປີ 2008 ຈຸດປະສົງ ເພື່ອເສີມສ້າງມິດຕະພາບ ແລະ ການຮ່ວມມືຂອງນັກປະພພັນ, ນັກກະວີທັງຫລາຍ ໃນບັນດາປະເທດທີ່ມີຊາຍແດນຕີດແມ່ນ້ຳຂອງ ໂດຍການມອບລາງວັນວັນນະກຳດີເດັ່ນ ແລະ ສຳມະນາວິຊາການ ເພື່ອແລກປ່ຽນບົດຮຽນເຊີ່ງກັນ ແລະ ກັນ.

Editor: ກຳປານາດ ລັດຖະເຮົ້າ