ແຂວງອຸດົມໄຊ ໄດ້ຢືດຖືເອົາການພັດທະນາເສດຖະກິດ ເປັນໃຈກາງ ແລະ ສຸມໃສ່ການລຶບລ້າງຄວາມທຸກຍາກຂອງປະຊາຊົນ ໂດຍສະເພາະການຂະຫຍາຍພື້ນຖານໂຄງລ່າງ ໃຫ້ໄປຕາມໂຄງສ້າງເສດຖະກິດ ແລະ ມີການຫັນປ່ຽນທິດທາງດ້ານກະສິກຳເປັນສິນຄ້າ ຕິດພັນກັບອຸດສະຫາກຳປູງແຕ່ງ ແລະ ການບໍລິການ. ເຮັດໃຫ້ເສດຖະກິດຂອງແຂວງອຸດົມໄຊ ມີການຂະຫຍາຍຕົວ 7,5 ສ່ວນຮ້ອຍ ໃນໄລຍະຜ່ານ.
ອິງຕາມການລາຍງານຂອງຄະນະຮັບຜິດຊອບລວມ ຂອງຄະນະບໍລິຫານງານພັກແຂວງ ໃນການຊີ້ນຳ-ນຳພາ ຈັດຕັ້ງປະຕິບັດກອງປະຊຸມໃຫຍ່ ຄັ້ງທີ 10 ຂອງພັກ, ແລະ ມະຕິກອງປະຊຸມໃຫຍ່ ຄັ້ງທີ 8 ຂອງແຂວງອຸດົມໄຊ ລາຍງານໃຫ້ຮູ້ເມື່ອບໍ່ດົນນີ້ວ່າ: ຄະນະບໍລີຫານງານພັກແຂວງ ໄດ້ເອົາໃຈໃສ່ຊີ້ນຳ-ນຳພາ ສະມາຊິກພັກ-ພະນັກງານລັດຖະກອນໃນທຸກຂັ້ນ ໃນການຈັດຕັ້ງປະຕິບັດ ແຜນພັດທະນາເສດຖະກິດ -ສັງຄົມ ຢ່າງຕັ້ງຫນ້າ ໂດຍຖືເອົາການພັດທະນາເສດຖະກິດ ເປັນໃຈກາງ ແລະ ສຸມໃສ່ການລຶບລ້າງຄວາມທຸກຍາກ ຂອງ ປະຊາຊົນ ໂດຍສະເພາະ ເອົາໃຈໃສ່ຂະຫຍາຍພື້ນຖານໂຄງລ່າງ ໃຫ້ໄປຕາມໂຄງສ້າງຂອງເສດຖະກິດ ຫັນເອົາທິດພັດທະນາກະສິກຳ ເປັນສິນຄ້າ ຕິດພັນກັບອຸດສາຫະກຳການປຸງແຕ່ງ ແລະ ການບໍລິການ. ໃນນັ້ນ ລວມຍອດຜະລິດຕະພັນພາຍໃນ ມູນຄ່າລວມ 3 ພັນ 503 ຕື້ກວ່າກີບ, ສະເລ່ຍໃສ່ຫົວຄົນ ໄດ້ 1,397 ໂດລ້າສະຫາລັດ ຫລື 11 ລ້ານກວ່າກີບ. ຕໍ່ຄົນຕໍ່ປີ. ນອກຈາກນັ້ນ ແຕ່ລະຂະແຫນງການຂອງວຽກງານເສດຖະກິດ-ສັງຄົມ ແມ່ນໄດ້ຮັບການຈັດຕັງປະຕິບັດ ແລະ ພັດທະນາເປັນກ້າວໆ, ລວມທັງການຂຸດຄົ້ນ ແຫລ່ງລາຍຮັບ ເຂົ້າງົບປະມານ ໄດ້ທັງມົດ 445 ກວ່າຕື້ກີບ, ເທົ່າກັບ 99 ສ່ວນຮ້ອຍຂອງແຜນການ.
ຄຽງຄູ່ກັນນັ້ນ, ທາງຄະນະພັກແຂວງ ຍັງໄດ້ເອົາໃຈໃສ່ຈັດຕັ້ງປະຕິບັດ ວຽກງານ 3 ສ້າງ, ຂະບວນຮັກຊາດ ແລະ ພັດທະນາ ລວມທັງວຍກງານພັດທະນາຊົນນະບົດ ແລະ ການລືບລ້າງຄວາມທຸກຍາກ ເຊິ່ງປະຈຸບັນ ບ້ານ ແລະ ຄອບຄົວທຸກຍາກພາຍໃນແຂວງໄດ້ຫລຸດລົງເທື້ອລະກ້າວ.
Editor: ກຳປານາດ ລັດຖະເຮົ້າ
