ອີກບໍ່ພໍເທົ່າໃດວັນກໍ ໃກ້ຈະຮອດ ບຸນເຂົ້າພັນສາ, ເຊິ່ງໃນປີນີ້, ກໍ່ກົງກັບວັນເສົາທີ 8 ກໍລະກົດ ປີ 2017 ເຊິ່ງກົງກັບມື້, (ຂຶ້ນ 15 ຄໍ່າ ເດືອນ 8 ລາວ ) ວັນເຂົ້າພັນສາ, ເປັນວັນສໍາຄັນໃນທາງພຣະພຸດທະສາສະໜາວັນໜື່ງ ປີໜື່ງຈັດຂຶ້ນເທື່ອໜື່ງ ແລະ ມີກໍານນົດ 3 ເດືອນ ຫຼື ໜື່ງໄຕຣມາດ ເພື່ອໃຫ້ບັນພະຊິດ ແລະ ຄະຣືຫັດ ອຸປາສົກ- ອຸປາສິກາ ເຍົາວະຊົນ ມີຜູ້ມີຈິດສັດທາໄດ້ບໍາເພັນສິນທານ, ພາວະນາ ແລະ ຖວາຍທານໃຫ້ບໍລິສຸດເຕັມໄຕຣມາດ 3 ເດືອນ, ເພື່ອປະໂຫຍດຕົນ, ປະໂຫຍດຜູ້ອື່ນ ແລະ ເພື່ອເພີ່ມພູນບຸນກຸສົນ ຈະຣິຍະສໍາມາປະຕິບັດໃຫ້ເຕັມປ່ຽມ ມີການຖວາຍຜ້າອາບນໍ້າຝົນ ແລະ ຜ້າໄຕຣຈີວອນ ເປັນຕົ້ນ.
ໄລຍະມື້ເຂົ້າພັນສານີ້, ພຣະສົງ ຈະປະຈໍາຢູ່ທີ່ໃດທີ່ໜື່ງຕະຫຼອດລະດູຝົນ ທີ່ມີກໍານົດໄລຍະເວລາ 3 ເດືອນ, ຕາມທີ່ພຣະທໍາວິໄນບັນຍັດໄວ້ ໂດຍບໍ່ໄດ້ຄ້າງແຮມທີ່ອື່ນ ໂດຍນັບຕັ້ງແຕ່ວັນແຮມ 1 ຄໍ່າ ເດືອນ 8 ຂອງທຸກປີ ເຖິງວັນຂື້ນ 15 ຄໍ່າ ເດືອນ 11 ( ຖ້າປີໃດມີເດືອນ 8 ສອງຫົນ ກໍ່ຈະນັບເດືອນ 8 ຫຼັງໄປ ຫຼື ເດືອນແປດຫົນທີ 2 ເຊິ່ງປີນີ້ກໍ່ກົງກັບເດືອນ 8 ສອງຫົນເຊ່ັນກັນ).
ພາຍໃນວັດກໍຈະຫ້າງຫາກະກຽມ, ສະຖານທີ່ໃຫ້ອອກຕົນຍາດໂຍມມາໃສ່ບາດໃນຕອນເຊົ້າຂອງມື້ເຂົ້າພັນສາ. ສ່ວນອອກຕົນຍາດໂຍມກໍຈະຫ້າງຫາ,ອາຫານ,ເຮັດເຂົ້າຫນົມ, ເຂົ້າຕົ້ມ, ປັດໄຈແລ້ວແຕ່ຄວາມສາມາດຂອງແຕ່ລະຄົນ, ດອກໄມ້, ທູບ, ທຽນ, ອາຫານຄາວຫວານ, ບາງຄອບຄົວກໍກຽມເຮັດພາເຂົ້າທິບເພື່ອອຸທິດໃຫ້ຍາດພີ່ນ້ອງທີ່ລ່ວງລັບໄປແລ້ວ, ກີບດອກໄມ້, ຄຸສັງຄະທານ, ທຽນພັນສາ ແລະ ອື່ນອື່ນ.
ພໍຮຸ່ງເຊົ້າມື້ບຸນເຂົ້າພັນສາ, ອອກຕົນຍາດໂຍມຊາວພຸດຕ່າງກໍແຫ່ແຫນກັນໄປໃສ່ບາດ, ຢາດນ້ຳ, ຖະຫວາຍຂອງທານທີ່ຕົນໄດ້ກຽມໄວ້, ໃຫ້ພະສົງຕາມວັດວາອາຮາມທີ່ໄກ້ເຮືອນຂອງຕົນ....ຕອນແລງມາໃນມື້ດຽວກັນກໍຈະມີພິທີວຽນທຽນ, ໄຕ້ທຽນບູຊາອ້ອມສິມ, ກຸດຕິວິຫານ, ຮຸ່ງແຈ້ງເຫລືອງອະລ່າມໄປທົ່ວວັດ. ສໍາລັບຢູ່ເຮືອນປະຊາຊົນກໍເຊັ່ນດຽວກັນຕ່າງກໍພາກັນໄຕ້ທຽນອ້ອມເຮືອນຂອງໃຜລາວ ເພື່ອເປັນການບົ່ງບອກວ່າບຸນເຂົ້າພັນສາເລີ່ມຂຶ້ນແລ້ວ..
Editor: ກຳປານາດ ລັດຖະເຮົ້າ
