ເຈົ້າຫນ້າທີ່ກົມຕໍາຫຼວດສິ່ງແວດລ້ອມ ໄດ້ສົມທົບກັບ ກົມອາຫານ ແລະ ຢາ, ອໍານາດການປົກຄອງ ໄດ້ກວດພົບສີນຄ້າ ປະເພດປາມຶກ ທີ່ມີສານເຄມີ ແລະ ເຊື້ອພະຍາດ, ໃນວັນທີ 7 ມິຖຸນາ 2018 ເຈົ້າຫນ້າທີ່ ກົມຕໍາຫຼວດສິ່ງແວດລ້ອມ ເຄື່ອນໄຫວພົບເຫັນ ລົດສົ່ງສີນຄ້າ ຈຶ່ງໄດ້ມີການກວດ ພົບວ່າມີສີນຄ້າປະເພດປາມຶກແຊ່ ຫຼື ດອງ ຈໍານວນ 100 ຖົງ, ມີນໍ້າໜັກທັງໝົດ 1,000 ກິໂລ, ດັ່ງນັ້ນເຈົ້າຫນ້າທີ່ໄດ້ນໍາເອົາສີນຄ້າ ແລະ ເຈົ້າຂອງສີນຄ້າ ໄປສືບສວນ ພ້ອມກັບນໍາເອົາຕົວຢ່າງ ປາມຶກແຊ່ ໄປກວດກາ ຢູ່ກອງກວດກາອາຫານ ແລະ ຢາ, ຜົນປາກົດວ່າສີນຄ້າດັ່ງກ່າວເຫັນວ່າ ມີສານເຄມີ ປະເພດ ຟໍມາລີນ ຫຼື ຟ໋ອກໂມນ ແລະ ໂຊດາໄຟ ເຊິ່ງເປັນເຄມີອັນຕະລາຍ ຕ້ອງຫ້າມ. ດັ່ງນັ້ນເຈົ້າຫນ້າທີຈຶ່ງໄດ້ສົມທົບກັບອໍານາດການປົກຄອງບ້ານນາງ່າ ແລະ ປກສ ກຸ່ມ ເຂົ້າກວດສະຖານທີ່ ທີ່ເປັນບ່ອນປຸງແຕ່ງ ພົບເຫັນ ປາມຶກທີ່ແຊ່ແລ້ວ 130 ກິໂລ ແລະ ກໍາລັງແຊ່ຢູ່ ໃນອ່າງອີກ 8 ອ່າງ ມີນໍ້າໜັກ 800 ກິໂລ, ປາມຶກແຫ້ງ ຈໍານວນ 15 ກະເປົາ, ນໍ້າໜັກລວມ 900 ກິໂລ, ລວມທັງໝົດ 2,830 ກິໂລ, ພ້ອມກັບສານເຄມີປະເພດ ຟອກມາລີນ ຈໍານວນ 90 ກວດ, ແລະ ໂຊດາໄຟ ຈໍານວນ 5 ແກັດກັບ 5 ຖົງ.
ຕາມການລາຍງານ ກອງກວດກາອາຫານ ແລະ ຢາ ໄດ້ໃຫ້ຮູ້ວ່າ: ຜົນກວດກາ ແລະ ທົດສອບປາມຶກແຊ່ ດັ່ງກ່າວ ເຫັນວ່າ: ພົບສານເຄີມີ ປະເພດ ຟອກມາລີນ, ໂຊດາໄຟ ແລະ ມີເຊື້ອເຫັດ, ມີກີ່ນເນົ່າ ແລະ ພົບພະຍາດບາງຊະນິດ ທີ່ເປັນອັນຕະລາຍຕໍ່ສຸຂະພາບ ແລະ ອາດເຖິງແກ່ຊີວິດແກ່ຜູ້ບໍລິໂພກໄດ້, ສານເຄມີ ປະເພດດັ່ງກວ່າ ມີອັນຕະລາຍສູງ ໃນກໍລະນີຖືກ ຫຼື ສໍາພັດຈະເຮັດໃຫ້ຜິດຫນັງອັກເສບ, ຖ້າສູບດົມຈະເຮັດໃຫ້ແສບດັງ - ແສບຕາ, ຫາຍໃຈຝືດ ແລະ ປັ່ນປ່ວນ ທາງເດີນອາຫານ, ກໍລະນີເຂົ້າໄປສູຮ່າງກາຍ ຈະເຮັດໃຫ້ເກີດອາການເຈັບທ້ອງຢ່າງຮຸນແຮງ, ເປັນຮາກ, ຖອກທ້ອງ, ໝົດສະຕິ ແລະ ອາດເສຍຊີວິດໄດ້.
ສະນັ້ນ, ເຈົ້າຫນ້າທີ່ຈຶ່ງໄດ້ອອກຄໍາສັ່ງຢຶດສີນຄ້າດັ່ງກ່າວ ແລ້ວເອົາໄປທໍາລາຍຖີ້ມ ພິທີທໍາລາຍແມ່ນໄດ້ຈັດຂື້ນໃນວັນທີ 8 ມິຖຸນາ 2018 ທີ່ຜ່ານມາ ຢູ່ທີ່ສະໝາມກໍາຈັດຂີ້ເຫຍື້ອ, ສ່ວນເຈົ້າຂອງສີນຄ້າ ເຈົ້າຫນ້າທີ່ໄດ້ດໍາເນີນຕາມຂັ້ນຕອນລະບຽບກົດ ໝາຍ.
Editor: ກຳປານາດ ລັດຖະເຮົ້າ
