ໃນອາທິດທີ່ຜ່ານມານີ້ ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງຄໍາມ່ວນ ໄດ້ຈັດພິທີປະກາດການ ຈັດຕັ້ງຂອງຄະນະບໍລິຫານງານຊາວໜຸ່ມແຂວງຂຶ້ນ ໂດຍການເຂົ້າຮ່ວມຂອງທ່ານ ພົມມາ ພັນທະລັງສີ ຫົວໜ້າຄະນະຈັດຕັ້ງແຂວງ, ມີບັນດາຄະນະພັກ ຈາກ 7 ອົງການອ້ອມຂ້າງຫ້ອງວ່າການປົກຄອງແຂວງ, ຄະນະບໍລິຫານງານຊາວໜຸ່ມແຂວງ, ຄະນະສະມາຄົມນັກທຸລະກິດໜຸ່ມແຂວງ, ຄະນະຮາກຖານ, ໜ່ວຍຊາວໜຸ່ມພະແນກການອ້ອມຂ້າງແຂວງ, ສະມາຊິກຊາວໜຸ່ມ ເຂົ້າຮ່ວມທັງໝົດ 60 ສະຫາຍ, ຍິງ 28 ສະຫາຍ.
ໃນພິທີທ່ານ ອິນປັນ ແກ້ວມະນີ ຫົວໜ້າຫ້ອງການຄະນະຈັດຕັ້ງແຂວງຄຳມ່ວນ ກໍ່ໄດ້ຜ່ານຂໍ້ຕົກລົງ ຂອງທ່ານເຈົ້າແຂວງໆ ຄຳມ່ວນ ສະບັບເລກທ 166/ຈຂ/ຄມ, ລົງວັນທີ 28 ພຶດສະພາ 2018 ວ່າດ້ວຍການຍົກຍ້າຍທ່ານ ປອ ແກ້ວອຸດອນ ບຸດສິງຂອນ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງ ໄປຮັບຜິດຊອບໜ້າທີ່ໃໝ່ ເປັນເຈົ້າເມືອງໆ ບົວລະພາ ແລະ ຜ່ານຂໍ້ຕົກລົງຂອງ ທ່ານເຈົ້າແຂວງໆ ຄຳມ່ວນ ສະບັບເລກທີ 168/ຈຂ/ຄມ, ລົງວັນທີ 28 ພຶດສະພາ 2018 ວ່າດ້ວຍການແຕ່ງຕັ້ງທ່ານ ນາງ ວົງພະຈັນ ສີບຸນເຮືອງ, ຮອງເລຂາຄະນະບໍລິຫານງານຊາວໜຸ່ມແຂວງ ເປັນເລຂາຄະນະບໍລິຫານງານຊາວໜຸ່ມແຂວງຄຳມ່ວນ ຜູ້ໃໝ່.
ເນື່ອງໃນໂອກາດດັ່ງກ່າວ ທ່ານ ຫົວໜ້າຄະນະຈັດຕັ້ງແຂວງ ໄດ້ກ່າວວ່າ: ການແຕ່ງຕັ້ງພະນັກງານຊີ້ນຳ-ນຳພາ ແມ່ນເປັນວຽກທີ່ສຳຄັນ ແລະ ປົກກະຕິເພື່ອປະຕິບັດໜ້າທີ່ການເມືອງຂອງພັກ ກໍ່ຄື ຫັນເຂົ້າສູ່ການຈັດຕັ້ງປະຕິບັດແຜນພັດທະນາຊາວໜຸ່ມ- ເຍົາວະຊົນ ໃຫ້ບັນລຸຕາມຄາດໝາຍຕາມທີ່ໄດ້ວາງໄວ້, ພ້ອມກັນນັ້ນ ຜູ້ທີ່ມາຮັບໜ້າທີ່ໃໝ່ກໍ່ຕ້ອງໄດ້ເພີ່ມທະວີຄວາມຮັບຜິດຊອບຂອງຕົນໃຫ້ສູງຂຶ້ນ, ເອົາໃຈໃສ່ທາງດ້ານການພັດທະນາຊັບພະຍາກອນມະນຸດ ໂດຍສະເພາະ ດ້ານການກໍ່ສ້າງ ແລະ ບຳລຸງຍົກລະດັບຄວາມຮູ້ ຄວາມສາມາດໃນດ້ານຕ່າງໆ ໃຫ້ພະນັກງານພາຍໃນກົມກອງຂອງຕົນໃຫ້ສົມກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນການພັດທະ
ນາປະເທດຊາດ ກໍ່ຄືການພັດທະນາຊາວໜຸ່ມ-ເຍົາວະຊົນໃນໄລຍະໃໝ່.
Editor: ນັກຂ່າວຊາວໜຸ່ມແຂວງຄຳມ່ວນ
