ໃນອາທິດຜ່ານມານີ້ ຢູ່ທີ່ເມືອງພູຄູນ ແຂວງຫຼວງພະບາງ ໄດ້ຈັດ ກອງປະຊຸມເຊື່ອມຊຶມ ນິຕິກຳວຽກງານແຂ່ງຂັນຍ້ອງຍໍ ຮັກຊາດ ແລະ ພັດທະນາທົ່ວເມືອງຂຶ້ນ ໂດຍການເປັນປະທານຂອງທ່ານ ວຽງທອງ ຫັດສະຈັນ ເຈົ້າເມືອງພູຄູນ, ມີບັນດາຄະນະປະຈຳ, ກຳມະການພັກ, ເລຂາພັກກຸ່ມ, ຫົວໜ້າກອງບັນຊາການປ້ອງກັນຊາດ-ປ້ອງກັນຄວາມສະຫງົບ, ຫົວໜ້າ, ຮອງຫົວໜ້າຫ້ອງການຕະຫຼອດຮອດຜູ້ຮັບຜິດຊອບວຽກງານຈັດຕັ້ງ-ພະນັກງານຈາກຫ້ອງການອອ້ມຂ້າງເມືອງເຂົ້າຮ່ວມ.
ໃນກອງປະຊຸມ ຜູ້ເຂົ້າຮ່ວມໄດ້ຮັບຟັງ ຂໍ້ຕົກລົງຂອງທ່ານເຈົ້າແຂວງຫຼວງພະບາງ ແລະ ຂໍ້ຕົກລົງຂອງທ່ານເຈົ້າເມືອງພູຄູນ ວ່າດ້ວຍການອະນຸມັດແຕ່ງຕັ້ງຄະນະກຳມະການຮັບຜິດຊອບ ວຽກງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາຂັ້ນເມືອງ, ຄຳແນະນຳວ່າດ້ວຍການຄັດເລືອກຜົນງານໃນການຈັດຕັ້ງປະຕິບັດວຽກງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາຂັ້ນເມືອງ ທັງນີ້ ກໍ່ເພື່ອເຮັດໃຫ້ຄະນະພັກ, ຫົວໜ້າກົມກອງຫ້ອງການ, ອົງການຈັດຕັ້ງທຸກຂັ້ນໃນຂອບເຂດທົ່ວເມືອງ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ກຳແໜ້ນຕໍ່ເນື້ອໃນຈິດໃຈຄາດ ໝາຍການສ້າງຜົນງານໃຫ້ໄວ, ໃຫ້ດີ, ໃຫ້ຫຼາຍ, ໃຫ້ຖືກຕ້ອງຕາມລະບຽບກົດໝາຍ. ລະດັບການສະເໜີການຍ້ອງຍໍ ແລະ ເງື່ອນໄຂມາດຖານແຕ່ລະເປົ້າໝາຍທີ່ຈະໄດ້ຮັບການຍ້ອງຍໍ ຈັດຕັ້ງຂະບວນການຄັດເລືອກຜົນງານແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ຕິດພັນກັບວຽກງານສາມສ້າງ ຖືກຕ້ອງສອດຄອງກັບຜົນງານຕົວຈິງຂອງບຸກຄົນ ແລະ ກົມກອງລວມໝູ່ ທີ່ໄດ້ປະກອບສວນເຫື່ອແຮງສະຕິປັນຍາເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ກໍ່ຄື ໃນການປະຕິບັດໜ້າທີໃນແຕ່ລະຂອບເຂດວຽກງານ ພາຍໃຕ້ຄຳຂວັນ ຮັກຊາດ ແລະ ພັດທະນາ ເປັນເນື້ອໃນຂອງການຈັດຕັ້ງປະຕິບັດ ທັງຮັບປະກັນ ໄດ້ 4 ເນື້ອໃນ 4 ຄາດໝາຍ ແລະ ສະຫຼຸບຕີລາຄາການຈັດຕັ້ງປະຕິບັດທິດທາງແຜນການແຕ່ນີ້ ຫາປີ 2020 ບົນພື້ນຖານ ແມ່ນອີງໃສ່ມະຕິ, ແຜນພັດທະນາເສດຖະກິດໃນແຕ່ລະໄລຍະ.
Editor: ນັກຂ່າວເມືອງພູຄູນ
