ໃນອາທິດຜ່ານມານີ້; ຢູ່ທີ່ເມືອງອາດສະພັງທອງ, ແຂວງສະຫວັນນະເຂດ, ໄດ້ຈັດພິທີປະກາດການຈັດຕັ້ງຄະນະຫ້ອງການ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ຊຸດໃໝ່ ໂດຍການເຂົ້າຮ່ວມເປັນປະທານຂອງທ່ານ ລໍາທອງ ຂອບສີລາວົງ ເຈົ້າເມືອງອາດສະພັງທອງ, ທ່ານນາງ ດາວວອນ ໄຊສຸລຽນ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງສະຫວັນນະເຂດ, ມີບັນດາການນໍາພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ, ການນໍາອ້ອມຂ້າງເມືອງພ້ອມດ້ວຍພະນັກງານວິຊາການຈາກຫ້ອງການຖະແຫຼງຂ່າວ ວັດທະນະທໍາ ແລະ ທ່ອງທ່ຽວເມືອງ, ອໍານາດການປົກຄອງທ້ອງຖິ່ນ ເຂົ້າຮ່ວມເປັນສັກຂີພິຍານ.
ໃນພິທີທ່ານ ບົວສີ ເພຍພົມມະລິນ ຫົວໜ້າຄະນະຈັດຕັ້ງປະຈໍາເມືອງ ອາດສະພັງທອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ອາດສະພັງທອງ ສະບັບເລກທີ 0158/ຈມ ອທ ວ່າດ້ວຍການແຕ່ງຕັ້ງຜູ້ວ່າການແທນຫົວໜ້າຫ້ອງການຖະແຫຼງຂ່າວ ວັດທະນະທໍາ ແລະ ທ່ອງທ່ຽວເມືອງ. ເຈົ້າເມືອງອາດສະພັງທອງ ໄດ້ຕົກລົງອະນຸມັດແຕ່ງຕັ້ງທ່ານ ດາວວີ ວັງນາ ຮອງຫົວໜ້າຫ້ອງການຂຶ້ນເປັນຫົວໜ້າຫ້ອງການ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວເມືອງ. ໃນໂອກາດດັ່ງກ່າວ ກໍ່ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 0203/ຈມ ອທ ວ່າດ້ວຍການແຕ່ງຕັ້ງພະນັກງານ ໂດຍອີງຕາມກົດໝາຍການປົກຄອງທ້ອງຖິ່ນແຫ່ງ ສປປ ລາວ ສະບັບປັບປຸງເລກທີ 68/ສພຊ, ພາກທີ IV ໝວດທີ IV ມາດຕາທີ 40 ຂໍ້ທີ 6 ເຈົ້າເມືອງ ອາດສະພັງທອງ ໄດ້ຕົກລົງເຫັນດີອະນຸມັດແຕ່ງຕັ້ງທ່ານ ສົມຮັກ ເພັດພູໄທ ຫົວໜ້າໜ່ວຍງານວັດທະນະທໍາຂຶ້ນເປັນຮອງຫົວໜ້າຫ້ອງການ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວເມືອງ ອາດສະພັງທອງ ແຂວງ ສະຫວັນນະເຂດ.
ໃນຕອນທ້າຍພິທີທ່ານ ນາງ ດາວວອນ ໄຊສຸລຽນ ກໍ່ໄດ້ເນັ້ນໃຫ້ເອົາໃຈໃສ່ກ່ຽວກັບວຽກງານການເມືອງ-ແນວຄິດເປັນບັນຫາສໍາຄັນ ແລະ ບັນຫາຄວາມສາມັກຄີພາຍໃນ ແລະ ພາຍນອກໃຫ້ມີຄວາມໜັກແໜ້ນເຂັ້ມແຂງ.
Editor: ນັກຂ່າວເມືອງອາດສະພັງທອງ
