ໃນວັນທີ 7 ມີຖຸນາ 2018 ຜ່ານມາບ້ານ ໜອງປາດ ເມືອງ ວຽງທອງ ແຂວງ ບໍລິຄໍາໄຊ ໄດ້ດໍາເນີນກອງປະຊຸມປັບປຸງການຈັດຕັ້ງບ້ານຕາມ 5 ໜ່ວຍງານ, ພ້ອມທັງຈັດພິທີມອບໃບຢັ້ງຢືນໜ່ວຍພັກເຂັ້ມແຂ່ງຮູ້ນຳພາຮອບດ້ານ ປະຈຳປີ 2017 ໃຫ້ໜ່ວຍພັກ ບ້ານ ໜອງປາດ ພິທີຈັດຂື້ນຢູ່ຫ້ອງການບ້ານດັ່ງກ່າວ ໂດຍເປັນກຽດເຂົ້າຮ່ວມຂອງທ່ານ ຄຳມອນ ໄຊພົມມີ ຮອງເລຂາພັກເມືອງ-ຮອງເຈົ້າ ເມືອງວຽງທອງ, ມີຄະນະພັກກຸ່ມບ້ານ, ພະນັກງານກໍ່ສ້າງຮາກຖານ, ອຳນາດການປົກຄອງບ້ານ ແລະ ພໍ່, ແມ່ ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.
ທ່ານ ຊົ່ງ ເນັ້ງຢີວ່າງ ເລຂາພັກບ້ານ-ນາຍບ້ານ-ບ້ານ ໜອງປາດ ໄດ້ຂື້ນຜ່ານບົດສະຫຼຸບການຈັດຕັ້ງນຳພາວຽກງານຮອບດ້ານຂອງບ້ານໄລຍະຜ່ານມາ ພ້ອມວາງທິດທາງແຜນການໃນຕໍ່ໜ້າ. ບ້ານ ໜອງປາດ ມີ 202 ຫຼັງຄາເຮືອນ, ມີ 214 ຄອບຄົວ, ມີພົນລະເມືອງ 1.397 ຄົນ, ຍີງ 678 ຄົນ, ມີອາຊີບເຮັດນາ, ເຮັດໄຮ່ເປັນຕົ້ນຕໍ ແລະ ປຸກຝັງລ້ຽງສັດເປັນສຳຮອງ ບ້ານມີເນື້ອທີ່ນາ150 ເຮັກຕ່າ, ເນື້ອທີໄຮ່ 90 ເຮັກຕ່າສະເລ່ຍເຂົ້າກີນ 420 ກິໂລ /ຄົນ/ປີ ບ້ານມີ: ຄວາຍ 200 ໂຕ,ງົວ 300 ໂຕ, ແບ້ 50 ໂຕ, ໝູ 200 ໂຕ ແລະ ສັດປີກຈຳນວນໜື່ງ ສະເລ່ຍລາຍຮັບ 2.275,000 ກີບ/ຄົນ/ປີ, ມີຄອບຄົວພົ້ນທຸກແລ້ວ 117 ຄອບຄົວ, ຄອບຄົວປອດຄະດີ 111 ຄອບຄົວ, ຄອບຄົວວັດທະນາທຳ111ຄອບຄົວ,
ຈາກນັ້ນ ກໍ່ໄດ້ຜ່ານໂຄງຮ່າງການຈັດຕັ້ງຂອງບ້ານທີ່ປັບປຸງໃໝ່ໄປຕາມ 5 ໜ່ວຍງານ, ພ້ອມນີ້ກໍ່ໄດ້ມອບໃບຢັ້ງຢືນໜ່ວຍພັກເຂັ້ມແຂ່ງຮູ້ນຳພາຮອບດ້ານ ປະຈຳປີ 2017 ໃຫ້ໜ່ວຍພັກບ້ານ ໜອງປາດ ໂດຍເປັນກຽດມອບຂອງທ່ານ ຄໍາມອນ ໄຊພົມມີ ຮອງເລຂາພັກເມືອງ, ຮອງເຈົ້າເມືອງວຽງທອງ ພ້ອມທັງໂອ້ລົມໃຫ້ທິດຊີ້ນຳຕໍ່ພິທີຕື່ມອີກ.
Editor: ນັກຂ່າວເມືອງວຽງທອງ
