ອົງການກາແດງລາວ, ສູນເລືອດແຫ່ງຊາດ ພ້ອມດ້ວຍອົງການຈັດຕັ້ງສາກົນ ໄດ້ຮ່ວມກັນຈັດກິດຈະກໍາ ບໍລິຈາກເລືອດ ໃນວັນທີ 14 ມິຖຸນາ 2018 ເຊິ່ງແມ່ນວັນບໍລິຈາກເລືອດໂລກ ພາຍໃຕ້ຄໍາຂວັນ: ທຸກຊີວິດມີຄວາມໝາຍ ໃຫ້ເລືອດໃຫ້ຊີວິດ, ໂດຍໄດ້ມີການຈັດຂື້ນທີ່ ສູນການຄ້າລາວ - ໄອເຕັກ, ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ. ຄໍາຮຸ່ງ ເຮືອງວົງສີ ປະທານອົງການກາແດງລາວ, ໃຫ້ເຂົ້າຮ່ວມມີ ທ່ານ ບຸນເກີດ ສັງສົມສັກ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ປະທານສະມາຄົມມິດຕະພາບລາວ-ເກົາຫລີ, ພ້ອມດ້ວຍ ເອກອັກຄະລັດຖະທູດ ສາທາລະນະລັດ ເກົາຫລີ ປະຈໍາ ສປປ ລາວ, ຜູ້ຕາງຫນ້າອົງການອານາໄມໂລກ, ຜູ້ຕາງຫນ້າອົງການກ່ອຍກ້ານ, ພໍ່-ແມ່ ປະຊົນຊົນລາວ, ທະຫານ - ຕໍາຫຼວດ, ພະນັກງານລັດຖະກອນ, ອົງການຈັດຕັ້ງ ທັງພາກລັດ ແລະ ເອກກະຊົນ, ພໍ່ຄ້າຊາວຂາຍ, ພະສົງ, ນັກຮຽນ - ນັກສຶກສາ ເຂົ້າຮ່ວມ ແລະ ບໍລິຈາກເລືອດ ໂດຍບໍ່ຫວັງສິ່ງຕອບແທນ ພາຍໃນງານ ເປັນຈໍານວນຫຼາຍ.

ເພື່ອເປັນການສົ່ງເສີມຄວາມຮັບຮູ້ໃນທົ່ວສັງຄົມ ເພື່ອໃຫ້ເຫັນເຖິງ ຄວາມສໍາຄັນຂອງການ ສະໜອງເລືອດ ໂດຍສະເພາະແມ່ນການເຂົ້າເຖິງ ການບໍລິຈາກເລືອດ ທີ່ພຽງພໍ, ປອດໄພ ແລະ ທັນເວລາ ບໍ່ວ່າຈະຢູ່ແຫ່ງຫົນໃດໃນໂລກ ແມ່ນຖືວ່າເປັນສິ່ງສໍາຄັນທີ່ສຸດ ສໍາລັບປ້ອງກັນການຕາຍຂອງຄົນເຈັບ, ເພາະຂະບວນບໍລິຈາກເລືອດ ແມ່ນໄດ້ຊ່ວຍຊີວິດຄົນເປັນຈໍານວນຫຼາຍ ໃນແຕ່ລະປີ. ເຊີ່ງຂະບວນການ ບໍລິຈາກເລືອດ ຢູ່ ສປປ ລາວ, ໄດ້ຖືກຈັດຕັ້ງຜັນຂະຫຍາຍມາແຕ່ປີ ຄສ 1995 ມາຮອດປະຈຸບັນ ຄົບຮອບ 22 ປີ, ວຽກງງານດັ່ງ ໄດ້ມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະມາຮອດປະຈຸບັນ ມີສູນຮັບບໍລິຈາກເລືອດ ທັງໝົດ 17 ແຫ່ງ, ໜ່ວຍເກັບຮັກສາເລືອດ 22 ແຫ່ງ ແລະ ໂຮງໝໍກອງທັບ 6 ແຫ່ງ, ຊຶ່ງກວມເອົາທຸກໆແຂວງໃນທົ່ວປະເທດ, ບັນຍາກາດພາຍໃນງານ ຖືວ່າມີຜູ້ທີ່ເຂົ້າຮ່ວມ ຢ່າງຫຼວງຫຼາຍ ແລະ ຍັງມີພາກສ່ວນ ທີ່ໃຫ້ການສະນັບສະໜູນ ທັງເຫຼື່ອແຮງ, ອາຫານ, ນໍ້າດື່ມ ແລະ ພາຍໃນງານຍັງມີການຕັດຜົມໂດຍບໍ່ເສຍຄ່າ ຖືວ່າ ກິດຈະກໍາການບໍລິຈາກເລືອດໃນຄັ້ງນີ້ ເປັນການໃຫ້ເລືອດດ້ວຍຄວາມບໍລິສຸດໃຈ ໂດຍບໍ່ຫວັງສິ່ງຕອບແທນ ເປັນບຸນກຸສົນອັນໃຫຍ່ຫຼວງ ແລະ ເປັນປະໂຫຍດໃຫ້ແກ່ສ່ວນລວມ .

ສໍາລັບ ທ່ານໃດທີ່ຕິດພາລະກິດ ແລະ ພາດໂອກາດ ໃນຄັ້ງນີ້ ກໍ່ຍັງສາມາດ ຮ່ວມບໍລິຈາກເລືອດໄດ້ ທີ່ ສູນຮັບບໍລິຈາກເລືອດ, ໂຮງໝໍ ແລະ ໜ່ວຍງານຮັບຜິດຊອບໄດ້

Editor: ກຳປານາດ ລັດຖະເຮົ້າ