ພິທີປະກາດຮັບຮອງເອົາ ກຸ່ມ 5 ເປັນກຸ່ມບ້ານວັດທະນະທໍາ ໄດ້ຈັດຂື້ນ ທີ່ໂຮງຮຽນ ມສ ບ້ານຝາຍ. ເມືອງປາກອູ, ແຂວງຫຼວງພະບາງ ເມື່ອບໍ່ດົນມານີ້, ໂດຍມີ ທ່ານ ປອ ຄໍາຄ່ອງ ພົມມະປັນຍາ ເຈົ້າເມືອງປາກອູ, ມີ ທ່ານ ສົມອົກ ພັນທະວົງ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຫຼວງພະບາງ, ມີຫົວໜ້າກຸ່ມອ້ອມຂ້າງ, ກໍາມະການພັກເມືອງ, ອົງການປົກຄອງບ້ານ 6 ບ້ານ ພ້ອມດ້ວຍປະຊາຊົນ ແລະ ຄູ-ອາຈານເຂົ້າຮ່ວມ.
ໃນພິທີ ທ່ານນາງ ເພັດສາຄອນ ຄູນບຸນເຮືອງ ກໍາມະການພັກເມືອງ, ຫົວໜ້າກຸ່ມ 5 ເມືອງປາກອູ ໄດ້ຜ່ານການຈັດຕັ້ງປະຕິບັດວຽກງານ ສ້າງບ້ານວັດທະນະທໍາ ຂອງກຸ່ມ 5 ເຊິ່ງມີບາງຕອນທ່ານກ່າວວ່າ: ກຸ່ມ 5 ບ້ານປະກອບ ມີ: ບ້ານຝາຍ, ບ້ານຫ້ວຍເຫຼືອງ, ບ້ານຫາດຊວາ, ບ້ານປາກແຈກ, ບ້ານລາດກອກ ແລະ ບ້ານລາດທ່າແຮ່. ມີທັງໝົດ 616 ຄອບຄົວ, ພົນລະເມືອງ 2.857 ຄົນ ຍີງ 1.392 ຄົນ, ປະຊາຊົນຖືອາຊີບປູກຝັງ-ລ້ຽງສັດ ແລະ ບໍລິການຄ້າຂາຍຈໍານວນໜຶ່ງ,ໃນນີ້ອໍານາດການປົກຄອງຂອງແຕ່ລະບ້ານໄດ້ເອົາໃຈໃສ່ວຽກງານການເມືອງແນວຄິດດໂດຍໄດ້ນໍາເອົາລະບຽບກົດໝາຍຕ່າງຂອງພັກ-ລັດ ມາເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ເຮັດໃຫ້ແຕ່ລະບ້ານມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ສືບຕໍ່ພັດທະນາເສດຖະກິດຄອບຄົວ ກໍຄືບ້ານຂອງຕົນໃຫ້ພົ້ນອອກຈາກຄວາມທຸກຍາກເທື່ອລະກ້າວ ເຊິ່ງມັນສະແດງອອກ ປະຊາຊົນໃນແຕ່ລະບ້ານມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ ພ້ອມກັນເຮັດພ້ອມກັນສ້າງສາພັດທະນາບ້ານຂອງຕົນຢ່າງເຂັ້ມແຂງ, ນອກນນີ້ຢູ່ພາຍໃນແຕ່ລະບ້ານຍັງມີຄອບຄົວຕົວແບບຫຼາຍຄອບຄົວ ເປັນຕົ້ນແມ່ນຄອບຄົວຕົວແບບດ້ານກະສິກໍາ, ຫັດຖະກໍາ, ການຄ້າຂາຍ ແລະ ອື່ນໆ. ຈາກການປະເມີນຜົນໃນ 5 ມາດຖານຂອງບ້ານວັດທະນະທໍາ ເຫັນວ່າກຸ່ມບ້ານດັ່ງກ່າວແມ່ນຄົບຕາມມາດຖານ 100%. ຈາກນັ້ນພິທີກໍໄດ້ຜ່ານຂໍ້ຕົກລົງຂອງເຈົ້າເມືອງປາກອູ ວ່າດ້ວຍການຮັບຮອງເອົາຄອບຄົວວັດທະນະທໍາ 6 ບ້ານຂອງກຸ່ມ 5 ໂດຍການຂື້ນມອບຂອງ ທ່ານ ສົມອົກ ພັນທະວົງ ຮອງຫົວໜ້າພະແນກ ຖວທ ແຂວງຫລວງພະບາງ ແລະ ຜ່ານຂໍ້ຕົກລົງວ່າດ້ວຍການຮັບຮອງເອົາ ກຸ່ມ 5 ເມືອງປາກອູ ເປັນກຸ່ມບ້ານວັດທະນະທໍາ ກຸ່ມທໍາອິດຂອງເມືອງ ໂດຍການມອບຂອງ ທ່ານ ປອ ຄໍາຄ່ອງ ພົມມະປັນຍາ ເຈົ້າເມືອງປາກອູ ຢ່າງສົມກຽດ,ພ້ອມນີ້ທ່ານ ສົມອົກ ພັນທະວົງ ຮອງຫົວໜ້າພະແນກ ຖວທ ແຂວງ ກໍໄດ້ຍົກໃຫ້ເຫັນ ຄວາມເປັນມາ ແລະ ຄວາມໝາຍຄວາມສໍາຄັນຂອງວັດທະນະທໍາ ເຊິ່ງປະກອບມີ 2 ຢ່າງເຊັ່ນ: ວັດທະນະທໍາທີ່ສາມາດຈັບຕ້ອງໄດ້ ເປັນຕົ້ນແມ່ນການນຸ່ງຖື, ວິຖືຊີວິດ ແລະ ວັດທະນະທໍາ ທີ່ບໍ່ສາມາດຈັບຕ້ອງໄດ້ ເຊັ່ນ: ປາກປາກເວົ້າ ແລະ ຄວາມຄິດເປັນຕົ້ນ.
ໂອກາດນີ້ ທ່ານ ເຈົ້າເມືອງປາກອູ ກໍໄດ້ສະແດງຄວາມຊົມເຊີຍຕໍ່ຜົນງານຂອງແຕ່ລະບ້ານໃນກຸ່ມ 5 ທີ່ຍາດມາໄດ້ ພ້ອມທັງໄດ້ເນັ້ນໃຫ້ປະຊາຊົນພາຍໃນແຕ່ລະບ້ານ ຈົ່ງສືບຕໍ່ຮັກສາມູນເຊື້ອດັ່ງກ່າວນີ້ໄວ້ ພ້ອມດຽວກັນນັ້ນກໍຕ້ອງບຸກບືນສູ້ຊົນສ້າງເສດຖະກິດຄອບຄົວໃຫ້ເຂັ້ມແຂງເຮັດໃຫ້ແຕ່ລະຄອບຄົວ ແລະ ແຕ່ລະບ້ານລຸດພົ້ນອອກຈາກຄວາມທຸກຍາກກາຍເປັນຄອບຄົວ ແລະ ບ້ານບ້ານພັດທະນາໃນຕໍ່ໜ້າ.ຈາກນັ້ນປະທານ ແລະ ຜູ້ເຂົ້າຮ່ວມພິທີກໍ່ໄດ້ຮ່ວມກັນເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນການຢືນຢັນວ່າ 6 ບ້ານໃນກຸ່ມ 5 ຂອງເມືອງປາກອູ ເປັນກຸ່ມບ້ານວັດທະນະທໍາແຫ່ງທໍາອິດຢ່າງສົມກຽດ.
Editor: ກຳປານາດ ລັດຖະເຮົ້າ
