ທີ່ຫໍສະມຸດແຂວງຫຼວງພະບາງ (ຫ້ອງອ່ານປື້ມລາວ-ອາເມລິກາ) ພະແນກ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງ, ທ່ານ ລີເປົ່າກວ່າງ ຫົວໜ້າກົງສູນໃຫຍ່ ສປ ຈີນ ປະຈໍາພາກເໜືອ ທີ່ແຂວງຫຼວງພະບາງ ໄດ້ນໍາເອົາປື້ມ ປະທານ ສີ້ຈີ້ນຜິງ ວ່າດ້ວຍການຄຸ້ມຄອງປະເທດ ແລະ ການບໍລິຫານການເມືອງ(ສະບັບພາສາລາວ) ຈໍານວນ 10 ຫົວ,ໄປມອບໃຫ້ຫໍສະມຸດແຂວງຫຼວງພະບາງ, ໂດຍການຮັບຂອງ ທ່ານ ສຸລິທິບ ໜໍ່ຄຸນຜົນ ຫົວໜ້າພະແນກ ຖວທ ແຂວງຫຼວງພະບາງ,ມີຫົວໜ້າຫ້ອງການ,ຂະແໜງການ,ອໍານວຍການຫໍສະມຸດແຂວງ ແລະ ພະນັກງານເຂົ້າຮ່ວມ.
ທ່ານ ລີເປົ່າກວ່າງ ໄດ້ກ່າວວ່າ: ຈຸດປະສົງການມອບປື້ມຄັ້ງນີ້ ເພື່ອເປັນການສົ່ງເສີມ ສາຍພົວພັນມິດຕະພາບລາວ-ຈີນໃຫ້ມີຄວາມໝາຍຄວາມສໍາຄັນຍິ່ງໆຂື້ນ,ທັງເປັນການເພີ່ມເຕີມປື້ມຢູ່ຫໍສະມຸດທີ່ມີຢູ່ແລ້ວ ໃຫ້ອຸດົມສົມບູນຂື້ນ,ເຮັດໃຫ້ທຸກຊັ້ນຄົນຢູ່ທັງພາຍໃນ ແລະ ຕ່າງປະເທດ ໄດ້ເຂົ້າມາສຶກສາຮຽນຮູ້ ແລະ ເຂົ້າໃຈການສ້າງສາສັງຄົມນິຍົມທີ່ມີສີສັນພິເສດຂອງຈີນ,ອີກດ້ານນຶ້່ງ ເພື່ອຢາກໃຫ້ການນຳ, ພະນັກງານຫຼັກແຫຼ່ງ, ນັກຮຽນ-ນັກສຶກສາ ແລະ ເຍົາວະຊົນທີ່ເປັນໜໍ່ແໜງອານາຄົດຂອງຊາດ ໄດ້ຮໍ່າຮຽນເອົາບົດຮຽນ, ແບບແຜນການດຳລົງຊີວິດ ແບບແຜນການບໍລິຫານປົກຄອງປະເທດ ທີ່ເຂັ້ມແຂງ ຮັ່ງມີ ແລະ ສີວິໄລ ຂອງປະທານ ສີຈີ້ງຜິງ ເພື່ອນຳມາໝູນໃຊ້ເຂົ້າໃນການພັດທະນາປະເທດຊາດ ບ້ານເມືອງລາວເຮົາໃຫ້ຮັ່ງມີເຂັ້ມແຂງຂື້ນເທຶ່ອລະກ້າວ. ທ່ານກ່າວຕື່ມວ່າ: ປື້ມຂອງປະທານ ສີຈີ້ງຜິງ ວ່າດ້ວຍການປົກຄອງປະເທດ ແລະ ການບໍລິຫານການເມືອງ ໄດ້ແປເປັນ 21 ພາສາ,ໄດ້ຈຳໜ່າຍໄປ ຈຳນວນ 6.400.000 ກວ່າຫົວ, ໃນ 160 ກວ່າປະເທດທົ່ວໂລກ. ປື້ມດັ່ງກ່າວ ໄດ້ທ້ອນໂຮມເອົາບັນດາບົດຮຽນອັນລໍ້າຄ່າ ຂອງຜູ້ນໍາພາ ການບໍລິຫານປົກຄອງປະເທດ ຈີນ, ຕັ້ງແຕ່ອາດິດຮອດປະຈຸບັນ ຈົນສາມມາດສ້າງສາພັດທະນາປະເທດຈີນ ແລະ ກາຍເປັນປະເທດມະຫາອຳນາດດ້ານເສດຖະກິດ-ການເມືອງ ທີ່ມີຄວາມໝັ້ນຄົງຢູ່ໃນໂລກ ແລະ ພາກພື້ນ, ໃນນັ້ນໄດ້ສ່ອງແສງໃຫ້ເຫັນເຖິງຄວາມເດັດດ່ຽວໜຽວແໜ້ນ, ຄວາມສະຫຼາດສ່ອງໃສ ຂອງປະທານ ສີຈີ້ງພິງ ນັບແຕ່ເຍົາໄວຈົນກ້າວເຂົ້າວົງການ-ການເມືອງ, ເປັນປະທານພັກກອມມູນິດຈີນ, ໃນການປົກຄອງປະເທດ ແລະ ບໍລິຫານການເມືອງເປັນສະໄໝທີ່ 2.
Editor: ກຳປານາດ ລັດຖະເຮົ້າ
