ໃນຕອນເຊົ້າ ຂອງັວນທີ 15 ມີຖຸນາ 2018 ຜ່ານມາ ກົງກັບມື້ຂື້ນ 3 ຄ່ຳ ເດືອນ 8 ພສ 2561, ທີ່ດ້ານຫຼັງວັດທາດຫຼວງເໜືອ ນະຄອນຫຼວງວຽງຈັນ ໄດ້ຈັດພິທີວາງສີລາເລີກ ໂຄງການກໍ່ສ້າງອາຄານອາຄັນຕຸກະ, ອາຄານປະທານສົງ ແລະ ອາຄານສຳນັກງານສູນກາງ ອົງການພຸດທະສາດສະໜາສໍາພັນລາວ(ອພສ). ໂດຍຄະນະ ອົງການພຸດທະສາສະໜາສໍາພັນລາວ ແລະ ນະຄອນຫຼວງວຽງຈັນ ຮ່ວມກັນຈັດຕັ້ງພິທີດັ່ງກ່າວ. ເປັນກຽດເຂົ້າຮ່ວມພິທີດັ່ງກ່າວມີ ທ່ານ ພັນຄຳ ວິພາວັນ ຮອງປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ, ທ່ານປ້າ ຄໍາເມີງ ວໍລິຈິດ, ທ່່ານ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍພັນລະຍາ, ນອກຈາກນີ້ຍັງມີ ທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະບໍລິຫານງານສູນກາງພັກ, ທ່ານ ບົວສອນ ບຸບຜາວັນ ຫົວໜ້າສະຖາບັນຄົ້ນຄ້ວາເສດຖະກິດແຫ່ງຊາດ, ພ້ອມດ້ວຍບັນດາທ່ານການນຳຈາກບັນດາກະຊວງ, ອົງການປົກຄອງ ນວ, ບັນດາພາກສ່ວນທີ່ກ່ຽວຂ້ອງ ພ້ອມດ້ວຍຄະນະສົງ ແລະ ມວນຊົນເຂົ້າຮ່ວມຢ່າງຫຼວງຫຼາຍ.

ສຳລັບໂຄງການກໍ່ສ້າງອາຄານທັງສາມນີ້ມີ:
1./ ອາຄານອາຄັນຕຸກະ ອະນຸສອນສູນກາງ ອົງການພຸດຖະສາດສະໜາສໍາພັນລາວ ຂະໜາດຍາວ 65,7 ແມັດ, ກວ້າງ 29,8 ແມັດ ເປັນອາຄານ 2 ຊັ້ນ ຄາດວ່າຈະສາມາດບັນຈຸຜູ້ເຂົ້າປະຊຸມໄດ້ 510 ອົງ.
2./ ອາຄານ ສໍານັກງານປະທານສົງ ມີຄວາມຍາວ 37,2 ແມັດ, ກ້ວາງ 32,1 ແມັດ, ເປັນອາຄານ 2 ຊັ້ນ ໃຊ້ສໍາລັບເປັນທີ່ພັກຂອງພຣະອາຈານໃຫຍ່ ພ້ອມດ້ວຍຄະນະ,
3./ ອາຄານສໍານັກງານສູນກາງ ອພສ ມີລວງຍາດ 33,5 ແມັດ, ກ້ວາງ 20 ແມັດ, ເປັນອາຄານ 3 ຊັ້ນ. ໃຊ້ສໍາລັບເປັນສໍານັກງານໃຫຍ່.
ຈຸດປະສົງກໍ່ແມ່ນເພື່ອນ້ອມບູຊາຄຸນພະສີພະຣັດຕະນະໄຕ ແລະ ໄວ້ເປັນທີ່ລະນຶກ ອານຸສອນ ຂອງອົງການພຸດທະສາສະໜາສຳພັນລາວ ແຫ່ງ ສປປລາວ, ທີ່ປະຕິບັດພາລະບົດບາດໜ້າທີ່ຂອງຕົນ ເພື່ອຄວາມຈະເລີນກ້າວໜ້າຂອງສາສະໜາ, ເພື່ອເປັນທີ່ຢູ່ອາໄສຂອງ ພຣະເຖລານຸເຖຣະ ຄະນະກໍາມະການສູນກາງ ອົງການພຸດຖະສາດສະໜາສໍາພັນລາວ ທີ່ມາຈາກແຂວງຕ່າງໆ ທັງໃນປະເທດ ແລະ ຕ່າງປະເທດ ທີ່ເດີນທາງມາປະຊຸມ ຫຼື ມາຢ້ຽມຢາມ ສປປ ລາວ ແລະ ເພື່ອເປັນສະຖານທີ່ຈັດກອງປະຊຸມໃຫຍ່ຂອງຄະນະກຳມະການສູນກາງ ອພສ, ກອງປະຊຸມຜູ້ໃຫຍ່ຜູ້ແທນຄະນະສົງທົ່ວປະເທດ ແລະ ກອງປະຊຸມພະສົງນາໆຊາດ. ສຳລັບໄລຍະກໍ່ສ້າງອາຄານທັງ 3 ຫຼັງນີ້, ມີກໍານົດຄາດຄະເນໄວ້ວ່າຈະໃຫ້ສຳເລັດພາຍໃນປີ 2020-2021, ສຳລັບ ງົບະມານໃນການສ້າງອາຄານທັງ 3 ຫຼັງ ປະມານ 80 ຕື້ກວ່າກີບ. ເຊີ່ງຂື້ນຢູ່ກັບປັດໄຈທຶນການກໍ່ສ້າງ ວ່າຈະໄດ້ມາພຽງພໍ ຫຼື ບໍ່ ? ຢ່ໂຄງການນີ້ເປັນຂອງພຸດທະສາສະໜາ ບໍ່ໄດ້ເອົາງົບປະມານຂອງລັດ ມາໃຊ້ຈ່າຍ ແຕ່ໃຊ້ການລະດົມທຶນແຜ່ສັດທາ ຈາກອອກຕົນຍາດໂຍມທັງຫຼາຍ ຊ່ວຍກັນບໍລິຈາກສົມທົບທຶນເຂົ້າໃນການກໍ່ສ້າງຄັ້ງນີ້

Editor: ກຳປານາດ ລັດຖະເຮົ້າ