ພິທີຖະແຫຼງການສະເຫຼີມສະຫຼອງວັນໂອແລມປິກສາກົນ ຄົບຮອບ 124 ປີ ໄດ້ຈັດຂື້ນ ຢູ່ທີ່ຫ້ອງປະຊຸມເບີ 2 ສະໂມສອນແຂວງບໍລິຄຳໄຊ ເມື່ອບໍ່ດົນມານີ້, ສໍາລັບປີນີ້ຄະນະກຳມະການ ໂອແລມປີກແຫ່ງຊາດລາວ ໄດ້ຕົກລົງຈັດພິທີສະເຫຼີມສະຫຼອງ ຢູ່ທີ່ແຂວງບໍລິຄຳໄຊ ໃນພິທີຖະແຫລງຂ່າວເປັນກຽດເຂົ້າຮ່ວມ ຂອງທ່ານ ບຸນມາ ບຸຈະເລີນ ຮອງເຈົ້າແຂວງບໍລິຄຳໄຊ, ທ່ານ ບົວສານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີບັນດາຄະນະກຳມະການໂອແລມປີກແຫ່ງຊາດລາວ, ພະແນກການອ້ອມຂ້າງແຂວງ, ບັນດາບໍລິສັດທີ່ໃຫ້ການອຸປະຖຳ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ
ໃນພິທີ ທ່ານ ສົມພູ ພົງສາ ຮອງປະທານເລຂາທິການຄະນະກຳມະການ ໂອແລມປິກແຫ່ງຊາດລາວ ໄດ້ກ່າວລາຍງານການກະກຽມຄວາມພ້ອມຄັ້ງນີ້ວ່າ: ການສະເຫຼີມສະຫຼອງວັນໂອແລມປິກສາກົນ ຄົບຮອບ 124 ປີ, ໃນປີນີ້ແມ່ນຈະຈັດຂື້ນໃນວັນທີ 23 ມີຖຸນາ 2018 ທີ່ຈະມາເຖິງນີ້ ຢູ່ທີ່ແຂວງບໍລິຄຳໄຊ ພາຍໃນງານຈະມີການຈັດກິດຈະກຳຕ່າງໆເປັນຕົ້ນ ແມ່ນ: ການແລ່ນ-ຍ່າງໄລຍະ 2-4 ກິໂລແມ້ດ ແລະ ການແຂ່ງຂັນກິລາປະເພດຕ່າງໆນຳອີກ, ຄາດວ່າຈະມີຜູ້ເຂົ້າຮ່ວມ 1 ພັນກວ່າຄົນ. ສຳລັບງານຄັ້ງນີ້ໄດ້ຮັບສະໜັບສະຈາກສອງບໍລິສັດ ຄື: ບໍລິສັດເບຍລາວ ປະເພດເຄື່ອງດື່ມມູນຄ່າ 70 ລ້ານກວ່າກີບ, ບໍລິສັດ FBT ອຸປະຖຳເສື້ອ ມູນຄ່າ 54 ລ້ານກວ່າກີບ.
ສໍາລັບຂະບວນການໂອແລມປີກສາກົນ ແມ່ນການສ້າງຕັ້ງຂອງອົງກອນສາກົນ ມາເຖິງປີນີ້ ຄົບຮອບ 124 ປີ ( ວັນທີ 23 ມີຖຸນາ 1894 – 23 ມີຖຸນາ 2018) ປະຈຸບັນມີສະມາຊິກທັງໝົດ 206 ປະເທດ ແລະ ສປປ ລາວ ກໍ່ໄດ້ເປັນ 1 ໃນ 206 ປະເທດສະມາຊິກ. ແລະ ໃນທຸກປີ ພໍເຖິງວັນທີ 23 ມີຖຸນາ ບັນດາປະເທດສະມາຊິກ ກໍ່ໄດ້ພ້ອມກັນຈັດຕັ້ງເຄື່ອນໄຫວກິດຈະກຳກິລາມວນຊົນຕ່າງໆ ເພື່ອເປັນການລະນຶກເຖິງວັນດັ່ງກ່າວ ແລະ ເປັນການສະແດງເຖິງຄວາມສາມັກຄີ ຄວາມເຂົ້າໃຈເຊິ່ງກັນ ແລະ ກັນ.
Editor: ກຳປານາດ ລັດຖະເຮົ້າ
