ກອງປະຊຸມເຜີຍແຜ່ກ່ຽວກັບວຽກງານດັ່ງກ່າວ ໄດ້ຈັດຂຶ້ນລະຫວ່າງວັນທີ 14-15 ມິຖຸນາ 2018 ນີ້ ຢູ່ທີ່ຣີສອດນາປ່າກວາງ. ທ່າລາດ ເມືອງທຸລະຄົມ, ແຂວງວຽງຈັນ, ໃຫ້ກຽດເປັນປະທານ ແລະ ກ່າວເປີດກອງປະຊຸມໂດຍແມ່ນ ທ່ານ ສັງຂານ ທ່ຽງທຳມະວົງ ຫົວໜ້າກົມຄຸ້ມຄອງການປ່ຽນແປງດິນຟ້າອາກາດ,ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເຊິ່ງທ່ານໄດ້ກ່າວວ່າ: ຈຸດປະສົງຂອງກອງປະຊຸມຄັ້ງນີ້ແມ່ນເພຶ່ອໂຄສະນາເຜີຍແຜ່ ແລະ ສ້າງຈິດສຳນຶກ ກ່ຽວກັບວຽກງານການປ່ຽນແປງດິນຟ້າອາກາດ ທັງເປັນການຍົກລະດັບຄວາມຮູ້ ແລະ ຄວາມເຂົ້າໃຈ ກ່ຽວກັບວຽກງານຂອງກອງທຶນສີຂຽວສຳລັບວຽກງານການປ່ຽນແປງດິນຟ້າອາກາດ ເປັນຕົ້ນແມ່ນຄວາມເປັນມາ,ຂະບວນການ,ເງື່ອນໄຂ ແລະ ວິທີການຕ່າງໆເພື່ອເຂົ້າຫາແຫຼ່ງທຶນກອງທຶນສີຂຽວສຳລັບວຽກງານການປ່ຽນແປງດິນຟ້ານອາກາດ.
ໃນກອງປະຊຸມ ໄດ້ຮັບຟັງການນຳສະເໜີ ແລະ ສົນທະນາຮ່ວມກັນ ກ່ຽວກັບຫຼາຍບັນຫາເປັນຕົ້ນແມ່ນຄວາມຮູ້ພື້ນຖານ ຂອງການປ່ຽນແປງດິນຟ້າອາກາດ ແລະ ຜົນກະທົບຂອງການປ່ຽນແປງດິນຟ້າອາກາດ,ການເຄື່ອນໄຫວວຽກງານ ແລະ ການແກ້ໄຂບັນຫາການປ່ຽນແປງດິນຟ້າອາກາດ ຢູ່ໃນສປປລາວ,ວຽກງານການປັບຕົວ ແລະ ສ້າງຄວາມທົນທານຕໍ່ການປ່ຽນແປງດິນຟ້າອາກາດລະດັບທ້ອງຖິ່ນ,ວຽກງານການຫຼຸດຜ່ອນທາດອາຍເຮືອນແກ້ວໃນລະດັບຊາດ,ຮັບຟັງການນຳສະເໜີກ່ຽວກັບຄວາມເປັນມາ ແລະ ສະ ພາບລວມຂອງກອງທຶນສາກົນ ແລະ ກອງທຶນສີຂຽວສຳລັບວຽກງານການປ່ຽນແປງດິນຟ້າອາກາດ ແລະບັນຫາອື່ນໆອີກ. ຫຼັງຈາກນັ້ນກໍ່ໄດ້ມີການສົນທະນາ ຖາມ-ຕອບ ແລະ ແບ່ງກຸ່ມປຶກສາຫາລື.
ໃຫ້ກຽດເຂົ້າຮ່ວມກອງປະຊຸມຄັ້ງນີ້ມີບັນດາທ່ານຕາງໜ້າຈາກພະແນກຊັບພະຍາກອນ ທຳມະຊາດ ແລະ ສິ່ງແວດລ້ອມ 6 ແຂວງພາກກາງເຂົ້າຮ່ວມຄື: ແຂວງວຽງຈັນ, ແຂວງໄຊສົມບູນ, ແຂວງບໍລິຄຳໄຊ, ແຂວງຄຳມ່ວນ, ແຂວງສະຫວັນນະເຂດ ແລະ ນະຄອນຫຼວງວຽງຈັນ
Editor: ກຳປານາດ ລັດຖະເຮົ້າ
