ເມື່ອບໍ່ດົນມານີ້ ຢູ່ທີ່ຫ້ອງວ່າການເມືອງຫົງສາ ໄດ້ຈັດກອງປະຊຸມປຶກສາຫາລື ກ່ຽວກັບການຄຸ້ມຄອງພື້ນທີ່ໂຄງການ ໄຟຟ້າຫົງສາ ລະຫ່ວາງ ເມືອງຫົງສາ ແລະ ບໍລິສັດ ໄຟຟ້າຫົງສາ ຈໍາກັດຂື້ນ,ໂດຍການເປັນປະທານ ຂອງ ທ່ານ ຄໍາເພັດ ພົມມະລາດ ເຈົ້າເມືອງໆຫົງສາ, ມີ ທ່ານ ຄະທາຍຸດ ຊູພູນ ຜູ້ອໍານວຍການໃຫ່ຍບໍລິສັດ ໄຟຟ້າຫົງສາ ຈໍາກັດ, ພ້ອມດ້ວຍພາກສ່ວນທີີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້, ເພື່ອເປັນການຄົ້ນຄົ້ວາປຶກສາຫາລືແກ້ໄຂບັນຫາ 3 ໜ້າວຽກ ຄື: ການຄຸ້ມຄອງອ່າງໂຕ່ງເຂດນໍ້າເລືອກ, ນໍ້າແກນ, ການຫາປາຂອງປະຊາຊົນ ຢູ່ 2 ອ່າງໂຕ່ງ ໃນພື້ນທີ່ດັ່ງກ່າວ, ການປ່ອຍສັດລ້ຽງຂອງປະຊາຊົນທີ່ເຂົ້າໄປໃນເຂດສໍາປະທານໂຄງການ ທີ່ອາດຈະເປັນອັນຕະລາຍຕໍ່ລະບົບສາຍພານລຳລຽງຖ່ານຫີນ ແລະ ບັນຫາການປຸກສ້າງ, ການທໍາການພະລິດຂອງປະຊາຊົນໃນເຂດສໍາປະທານຂອງໂຄງການໄຟຟ້າຫົງສາ.
ຜ່ານການຄົ້ນຄົ້ວປຶກສາຫາຕໍ່ກັບບັນຫາດັ່ງກ່າວນັ້ນທັງ 2 ຝ່າຍແມ່ນໄດ້ເຫັນດີຕົກລົງເປັນເອກະພາບກັນ ໃຫ້ປະຊາຊົນເມືອງຫົງສາ ເຂົ້າຫາປາ 2 ອ່າງໂຕ່ງ ເຂດນໍ້າເລືອກ, ນໍ້າແກນ ໂດຍໃຫ້ປະຊາຊົນບ້ານອ້ອມຂ້າງອ່າງໂຕ່ງດັ່ງກ່າວຈັດເປັນກຸ່ມສະມາຄົມຫາປາ ຢູ່ 2 ອ່າງ, ໃຫ້ມີການອອກລະບຽບຄຸ້ມຄອງທີ່ຮັດກຸມ - ຊັດເຈນ ແລະ ພ້ອມກັນລົງເຜີຍແຜ່ໃຫ້ປະຊາຊົນຢູ່ແຕ່ລະບ້ານເຂົ້າໃຈ, ກ່ຽວກັບບັນຫາການປ່ອຍສັດຂອງປະຊາຊົນ ເຂົ້າໄປໃນເຂດສໍາປະທານຂອງໂຄງການເຊິ່ງໃນໄລຍະເບື້ອງຕົ້ນທາງເມືອງຈະແຕ່ງຕັ້ງຄະນະກໍາມະການລົງໄປເກັບກໍາຂໍ້ມູນລະອຽດ ເຊັ່ນ: ເຈົ້າຂອງ,ຈຳນວນສັດລ້ຽງ, ສະຖານທີ່ລ້ຽງ ຢູ່ບ້ານອ້ອມຂ້າງຂອງໂຄງການ, ໃນຂັ້ນຕໍ່ໄປແມ່ນເອົາເຈົ້າຂອງສັດທີ່ລ້ຽງຢູ່ໃນບໍລິເວນດັ່ງກ່າວມາສືກສາອົບຮົມ ແລະ ສ້າງບົດບັນທືກວາງມາດຕະການຮ່ວມກັນ,ສ່ວນບັນຫາຖ້າຫາກມີກໍລະນີປະຊາຊົນໄປປຸກສ້າງ,ໄປທໍາການພະລິດຢູ່ໃນພື້ນທີ່ສໍາປະທານແມ່ນໃຫ້ທາງບໍລິສັດແຈ້ງເປັນລາຍລັກອັກສອນ ມາເຖີງເມືອງເພື່ອແກ້ໄຂໃຫ້ທັນເວລາ.
ທັງນີ້ກໍ່ເພື່ອໃຫ້ມີຄວາມ ເປັນເອກະພາບກັນໃນການຈັດຕັ້ງປະຕິບັດວຽກງານດັ່ງກ່າວໃຫ້ດີຂຶ້ນໃນຕໍ່ໜ້າ.
Editor: ກຳປານາດ ລັດຖະເຮົ້າ
