ໃນຕອນເຊົ້າຂອງວັນທີ 13 ມິຖຸນາ ນີ້ ຢູ່ຫ້ອງປະຊຸມ ຫ້ອງການສາທາລະນະສຸກເມືອງໂພນທອງ ໄດ້ຈັດກອງປະຊຸມໃຫຍ່ ໜ່ວຍຊາວໝຸ່ມຮາກຖານ ຂອງເມືອງຂຶ້ນ ໂດຍເປັນປະທານຂອງ ສະຫາຍ ສີໄລ ດວງພະຈັນ ເລຂາໜ່ວຍຊາວໝຸ່ມຮາກຖານ ຫ້ອງການສາທາລະນະສຸກເມືອງ, ມີ ສະຫາຍ ສິດທິສັກ ສະເຫຼີມສັກ ຮອງເລຂາຄະນະບໍລິຫານງານຊາວໝຸ່ມເມືອງ, ສະຫາຍ ທອງດີ ດວງພະຈັນ ເລຂາໜ່ວຍພັກຫ້ອງການສາທາລະນະສຸກເມືອງ,ພ້ອມດ້ວຍແຂກຮັບເຊີນຈາກອົງການຈັດຕັ້ງມະຫາຊົນ ອ້ອມຂ້າງຂອງເມືອງ, ສະມາຊິກຊາວໝຸ່ມພາຍໃນໜ່ວຍຮາກຖານ ເຂົ້າຮ່ວມ.
ສີໄລ ດວງພະຈັນ ໄດ້ຂື້ນຜ່ານບົດສະຫຼູບ ການເຄື່ອນໄຫວໃນໄລຍະ 5 ປີ ຜ່ານມາ, ໜ່ວຍຊາວໝຸ່ມຮາກຖານ ສາທາລະນະສຸກ ປະກອບມີ ສະມາຊິກຊາວໝຸ່ມ ທັງໝົດ 37 ສະຫາຍ, ຍີງ 20 ສະຫາຍ, ຄະນໜ່ວຍໄດ້ນຳພາສະມາຊິກຊາວໝຸ່ມ ເຂົ້າຮ່ວມສ້າງຂະບວນການຂອງເມືອງໄດ້ຫຼາຍດ້ານ ເພື່ອຂໍ່ານັບຮັບຕ້ອນກອງປະຊຸມໃຫ່ຍຂັ້ນຕ່າງໆ ແລະ ຂະບວນການ ກໍ່ສ້າງໝ່ວຍພັກແຂງ-ຮູ້ນຳພາຮອບດ້ານ ຢ່າງມີຂະບວນການຟົດຟື້ນ, ເຮັດໃຫ້ສະມາຊິກຊາວໝຸ່ມໄດ້ຮັບໃບຍ້ອງຍໍ ຈາກຄະນະບໍລິຫານຊາວໝຸ່ມແຂວງ ຈຳນວນ 37 ສະຫາຍ, ຍີງ 20 ສະຫາຍ,ໄດ້ຮັບໃບຍ້ອງຍໍ ຈາກເລຂາຄະນະບໍລິຫານງານຊາວໝຸ່ມເມືອງ 37 ສະຫາຍ, ໄດ້ສຸມໃສ່ປະຕິບັດວຽກງານວິຊາສະເພາະ ເປັນຕົ້ນວຽກງານຮັກສາສຸກຂະພາບ ສົ່ງເສີມສຸກຂະພາບ ພ້ອມທັງລົງ ໃກ້ສິດ-ຕິດແທດ ປະຊາຊົນຢ່າງທົ່ວເຖິງ, ຕາມທິດທາງແຜນງານ 8 ວຽກງານຫຼັກ ຂອງກະຊວງສາທາລະນະສຸກວາງອອກ. ຈາກນັ້ນ ກອງປະຊຸມໄດ້ປ່ອນບັດຄັດເລືອກເອົາຄະນະໜ່ວຍຊຸດໃໝ່ ມີຜູ້ສະໝັກຮັບເລືອກຕັ້ງ 7 ສະຫາຍ ເລືອກເອົາ 5 ສະຫາຍ, ໂດຍເລືອກເອົາ ສະຫາຍ ສີໄລ ດວງພະຈັນ ເປັນເລຂາ, ສະຫາຍ ແກັດ ຄຸດລະວົງ, ສະຫາຍ ລໍາພັນ ສິງທຳມວົງ ເປັນຮອງ, ສະຫາຍ ບຸນຈັນ ພັນວິໄລ ແລະ ສະຫາຍ ນາງ ຫວາ ຊົງຕົງວື ເປັນຄະນະ. ໂດຍຄົບຖ້ວນຕາມມາດຖານເງື່ອນໄຂ ຂອງວຽກງານຊາວໝຸ່ມ ປະຊາຊົນ ປະຕິວັດລາວ ຢ່າງແທ້ຈິງ.
ຕອນທ້າຍ ສະຫາຍ ສິດທິສັກ ສະເຫຼີມສັກ ໄດ້ເນັ້ນໜັກ ໃຫ້ຄະນະຊຸດໃໝ່ ເອົາໃຈໃສ່ສຶບຕໍ່ສຶກສາອົບຮົມການເມືອງແນວຄິດ, ໂດຍຖືເອົາການຮ່ວມຊີວິດການເມືອງ ໃນແຕ່ລະເດືອນ, ເພື່ອເປັນການສ່ອງແສງ-ກໍ່ສ້າງ ເຊີ່ງກັນ ແລະກັນ, ເອົາໃຈໃສ່ໃນການປະຕິບັດເນື້ອໃນຂໍ້ແຂ່ງຂັນ 4 ບຸກ ຂອງຄະນະຊາວໝຸ່ມ ປະຊາຊົນ ປະຕິວັດລາວວາງອອກ ໃຫ້ປະກົດຜົນເປັນຈີງ, ປັບປຸງແບບແຜນວິທີນຳພາ-ວິທີເຮັດວຽກ ເພື່ອສະດວກໃນການຈັດຕັ້ງປະຕິບັດວຽກງານຮອບດ້ານ, ພ້ອມທັງເຕົ້າໂຮມຄວາມສາມັກຄີ ຂອງສະມາຊິກໃຫ້ເປັນປຶກແຜນ, ປຸກລະດົມສະມາຊິກ ເຂົ້າຮ່ວມກອງທຶນຊ່ວຍເຫຼືອເຊິ່ງກັນ ແລະ ກັນ ໃຫ້ໄດ້ 100% ໃນຕໍ່ໜ້າ.
Editor: ເມືອງໂພນທອງ
