ໃນວັນທີ 12 ມິຖຸນາ ທີ່ຜ່ານມານີ້ ຢູ່ທີ່ສະໂມສອນຫ້ອງວ່າການປົກຄອງເມືອງຄູນຄຳ ແຂວງຄຳມ່ວນ ອົງການກາແດງລາວ ສາຂາແຂວງຄຳມ່ວນ ໂດຍສະເພາະ ກໍ່ແມ່ນສູນຮັບບໍລິຈາກເລືອດແຂວງ ໄດ້ເຄື່ອນໄຫວຮັບການບໍລິຈາກເລືອດຢູ່ເມືອງຄູນຄໍາ ເຊິ່ງເຂົ້າຮ່ວມ ໃນພິທີຄັ້ງນີ້ ມີທ່ານ ແກ້ວລັນດອນ ຈັນທະປານີ ເຈົ້າເມືອງ-ເມືອງຄູນຄໍາ, ທ່ານ ສາຍສະໝອນ ສົມນຸກຄໍາຈັນ ຫົວໜ້າສູນບໍລິຈາກເລືອດ ກາແດງ ແຂວງຄຳມ່ວນ, ມີຫົວໜ້າຫ້ອງການກາແດງເມືອງ, ມີອ້າຍ-ເອື້ອຍນ້ອງທະຫານ, ຕໍາຫຼວດ, ບັນດາຫ້ອງການອ້ອມຂ້າງເມືອງ ພ້ອມດ້ວຍບັນດາພະນັກງານວິຊາການເຂົ້າຮ່ວມ.
ການລົງຮັບບໍລິຈາກເລືອດຢູ່ຫ້ອງວ່າການປົກຄອງເມືອງຄູນຄຳ ໃນຄັ້ງນີ້ ໄດ້ມີຜູ້ສະໝັກໃຈໃຫ້ການບໍລິຈາກເລືອດທັງໝົດ 29 ຄົນ ໄດ້ເລືອດ ຈຳນວນ 29 ຖົງ, ການລົງຮັບບໍລິຈາກເລືອກໃນເທື່ອນີ້ ກໍ່ເພື່ອເປັນການສະເຫຼີມສະຫຼອງ ວັນບໍລິຈາກເລືອດໂລກ 14 ມິຖຸນາ ຂອງທຸກປີ ແລະ ເປັນການບໍລິຈາກເລືອດ ເພື່ອຊ່ວຍເຫລືອສັງຄົມ. ເພາະວ່າວຽກງານບໍລິຈາກເລືອດ ແມ່ນຕິດພັນກັບທຸກພາກສ່ວນ ທີ່ໄດ້ສະແດງເຖິງການທຳບຸນຮ່ວມຊາດ ຕັກບາດຮ່ວມຂັນ ບິແບ່ງປັນຊີວິດ ຈົ່ງຄິດຊ່ວຍເຫຼືອຄົນເຈັບ, ສະແດງເຖິງຄວາມມີນ້ຳໃຈຕໍ່ເພື່ອນມະນຸດດ້ວຍກັນ ແລະ ເພື່ອຊ່ວຍເຫລືອຜູ້ທີ່ຂາດເລືອດ ແລະ ບາດເຈັບ ທັງເປັນສ່ວນໜຶ່ງທີ່ຊ່ວຍເຫລືອຊີວິດເພື່ອນມິດຮ່ວມຊາດ ແລະ ເພື່ອບຸນກຸສົນ, ເພື່ອຄົນດ້ອຍໂອກາດທີ່ກຳລັງຕ້ອງການເລືອດທີ່ນອນຢູ່ຕາມໂຮງໝໍແຫ່ງຕ່າງໆໃນ ສປປ ລາວ.
Editor: ນັກຂ່າວເມືອງຄູນຄຳ
