ຕາມການໃຫ້ສໍາພາດຂອງທ່ານ ພອນເພັດ ໄຊປັນຍາ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງ ອາດສະພັງທອງ, ແຂວງສະຫວັນນະເຂດ ຕໍ່ນັກຂ່າວວ່າ: ມາເຖິງປະຈຸບັນນີ້; ເມືອງ ອາດສະພັງທອງ ແມ່ນກໍາລັງຂຸ້ນຂ້ຽວໃນການປັກດໍາເຂົ້ານາປີຢ່າງເປັນຂະບວນການທີ່ກວ້າງຂວາງ ແລະ ສາມາດໄຖ່ຮຸດນາປີ ໄດ້ແລ້ວ 95% ຂອງເນື້ອທີທັງໝົດ 13.206 ເຮັກຕາ, ລົງມືຕົກກ້ານາປີ ໄດ້ 85% ຂອງເນື້ອທີ່ ພ້ອມທັງ ໄດ້ປູກລົງສູ່ໜ້າດິນໄດ້ແລ້ວ 673 ກວ່າໂຕນ, ມາເຖິງປັດຈຸບັນນີ້ ໃນບາງເຂດຂອງເມືອງກໍ່ສາມາດປັກດໍາເຂົ້ານາປີໄດ້ແລ້ວ 18% ຂອງເນື້ອທີ່ທັງໝົດ 13.206 ເຮັກຕາ.
ໃນການປັກດໍາເຂົ້ານາປີໃນປີນີ້; ຊາວນາ-ຊາວກະສິກອນໃນທົ່ວເມືອງອາດສະພັງທອງ ແມ່ນໄດ້ເລີ່ມລົງມືປັກດໍາໃນຕົ້ນເດືອນມິຖຸນາເປັນຕົ້ນມາ ແລະ ຄາດການວ່າຖ້າຫາກສະພາບດິນຟ້າອາກາດເອື້ອອໍານວຍໃຫ້ແກ່ການປັກດໍາ ຄາດວ່າໃນທ້າຍເດືອນກໍລະກົດນີ້ ຈະສໍາເລັດຕາມລະດັບຄາດໝາຍ. ນອກຈາກການປັກ ດໍາເຂົ້ານາປີແລ້ວຊາວນາ-ຊາວກະສິກອນໃນທົ່ວເມືອງ ຍັງມີແຜນການປູກພືດສໍາຮອງລະດູຝົນຕື່ມອີກໃນເນື້ອທີ່ 500 ກວ່າເຮັກຕາ ມາເຖິງປັດຈຸບັນນີ້ ກໍ່ໄດ້ລົງມືປູກໄປແລ້ວຈໍານວນໜຶ່ງ ພືດທີ່ນິຍົມປູກຫຼາຍກໍ່ແມ່ນ: ສາລີ, ໝາກແຕງ, ເຜືອກ, ມັນ ແລະ ພືດຜັກຕ່າງໆອີກຈໍານວນໜຶ່ງ.
ເຂດທີ່ນິຍົມປູກຫຼາຍກໍ່ແມ່ນເຂດບ້ານ ປົ່ງດົງ, ປົ່ງນາ ແລະ ບ້ານໄລກະທະ. ທັງນີ້; ກໍ່ເພື່ອເປັນການປັກດໍາເຂົ້ານາປີໃຫ້ທ່ວງທັນຕາມລະດູການ ແລະ ເພື່ີອແກ້ໄຂຊີວິດການເປັນຢູ່ພາຍໃນບ້ານ ກໍ່ຄື ພາຍໃນຄອບຄົວໃຫ້ມີຢູ່ມີກິນຂຶ້ນໄປເລື່ອຍໆ ແລະ ກ້າວໄປສູ່ຄວາມຮັ່ງມີຕາມແນວທາງນະໂຍບາຍຂອງພັກວາງອອກໃນແຕ່ລະໄລຍະໃຫ້ປະກົດເປັນຈິງ.
Editor: ນັກຂ່າວເມືອງອາດສະພັງທອງ
