ໃນອາທິດທີ່ຜ່ານມາ ຢູ່ທີ່ເມືອງບົວລະພາ, ແຂວງຄຳມ່ວນ ໄດ້ຈັດພິທີ ມອບເຂົ້າ ເພື່ອນໍາໄປຊ່ວຍເຫລືອ ຜູ້ທີ່ໄດ້ຮັບຜົນກະທົບຈາກພະຍຸ ດອກສຸລິ ໂດຍການເຂົ້າຮ່ວມຂອງທ່ານ ຄຳເພົ່າ ທອງເທພາຮັກ ເຈົ້າເມືອງໆບົວລະພາ, ທ່ານ ບຸນທວາຍ ສິລິປັນຍາທອງ ຫົວໜ້າພະແນກແຮງງານ ແລະ ສະຫວັດດີການສັງຄົມ, ມີບັນດາ ຄະນະກໍາມະການປ້ອງກັນ ແລະ ຄວບຄຸມໄພພິບັດ ຂັ້ນເມືອງ ແລະ ພະນັກງານວິຊາການທີ່ກ່ຽວຂ້ອງ ເຂົ້າຮ່ວມ.
ຈຸດປະສົງໃນການມອບ ເຂົ້າ ຊ່ວຍເຫລືອໃນຄັ້ງນີ້ ກໍ່ເພື່ອບັນເທົາຄວາມອຶດຫີວ ແລະ ແກ້ໄຂຄວາມທຸກຍາກ ໃຫ້ກັບພໍ່ແມ່ປະຊາຊົນ ພາຍໃນເມືອງ ບົວລະພາ ທີ່ຖືກຜົນກະທົບ ຈາກ ພະຍຸ ດອກສຸລິ ໃນວັນທີ 15 ກັນຍາ 2017 ທີ່ຜ່ານມາ, ເຊິ່ງເຂົ້າ ທີ່ນໍາມາຊ່ວຍເຫລືອ ເມືອງບົວລະພາ ຄັ້ງນີ້ ມີຈໍານວນທັງໝົດ 50.000 ກິໂລ ເຂົ້າດັ່ງກ່າວ ແມ່ນໄດ້ຮັບ ຈາກອົງການ ອາຫານໂລກ, ຕ່າງໜ້າການມອບ ເຂົ້າ ຊ່ວຍເຫລືອ ໃນຄັ້ງນີ້ ໂດຍ ທ່ານ ບຸນທວາຍ ສິລິປັນຍາທອງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ແລະ ຮັບໂດຍທ່ານ ຄຳເພົ່າ ທອງເທພາຮັກ ເຈົ້າເມືອງໆບົວລະພາ ຕ່າງໜ້າຄະນະການນຳຂັ້ນເມືອງ ແລະ ພໍ່ແມ່ປະຊາຊົນ ໃນທົ່ວເມືອງບົວລະພາ.
ໃນຕອນທ້າຍຂອງພິທີ ທ່ານ ເຈົ້າເມືອງບົວລະພາ ກໍ່ໄດ້ສະແດງຄວາມຂອບໃຈ ມາຍັງ ພະແນກແຮງງານ ແລະ ສະຫວັດດີການສັງຄົມແຂວງ ກໍ່ຄື ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ທີ່ເຫັນໄດ້ເຖິງ ຄວາມຈຳເປັນ ຂອງພໍ່ແມ່ປະຊາຊົນຊາວ ເມືອງບົວລະພາ ທີ່ຖືກຜົນກະທົບ ຈາກພະຍຸ ດັ່ງກ່າວ ແລະ ຈະໄດ້ນຳເອົາເຂົ້າຈໍານວນນີ້ ໄປມອບໃຫ້ກັບ ພໍ່ແມ່ ປະຊາຊົນຜູ້ປະສົບໄພ ພາຍໃນເມືອງບົວລະພາ ໃຫ້ທົ່ວເຖິງ.
Editor: ນັກຂ່າວເມືອງບົວລະພາ
