ໃນຕອນເຊົ້າຂອງວັນທີ 18 ມິຖຸນາ 2018 ທີ່ຜ່ານມາ, ຢູ່ທີ່ ຫ້ອງການສາທາລະນະສຸກ ເມືອງວັງວຽງ. ແຂວງວຽງຈັນ. ໄດ້ມີພິທີໂຄສະນາເຜີຍແຜ່ຄວາມຮູ້ກ່ຽວກັບການຮັກສາສຸຂະພາບຕາຂັ້ນຕົ້ນໃຫ້ແກ່ຊຸມຊົນທີ່ເມືອງວັງວຽງ. ໂດຍການເຂົ້າຮ່ວມຂອງ ທ່ານ ດຣ ສຸກພະໄທ ສໍປະເສີດ ຫົວໜ້າພະແນກສາທາລະນະສຸກແຂວງວຽງຈັນ, ມີ ທ່ານ ຈັນທະບູນ ໂພຊະສານ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ, ມີບັນດາທ່ານຫົວໜ້າສາທາລະສຸກເມືອງພ້ອມດ້ວຍ ພະນັກງານແພດໝໍ ແລະ ພໍ່ແມ່ປະຊາຊົນເຂົ້າຮ່ວມ.
ໃນພິທີ ທ່ານ ດຣ. ສຸກພະໄທ ສໍປະເສີດ ຫົວໜ້າພະແນກສາທາລະນະສຸກແຂວງວຽງຈັນ ໄດ້ກ່າວຈຸດປະສົງຂອງພິທີວ່າ: ການໂຄສະນາເຜີຍແຜ່ຄວາມຮູ້ກ່ຽວກັບການຮັກສາສຸຂະພາບຕາຂັ້ນຕົ້ນໃຫ້ແກ່ຊຸມຊົນ ກໍ່ເພື່ອເປັນການສ້າງໃຫ້ ພໍ່ແມ່ປະຊາຊົນມີຄວາມເຂົ້າໃຈ ແລະ ຮັບຮູ້ກ່ຽວກັບວິທີປ້ອງກັນ - ຮັກສາສຸຂະພາບຕາໃນຂັ້ນພື້ນຖານ ແລະ ເຂົ້າເຖິງການບໍລິການ ເພື່ອເປັນການຫຼຸດຜ່ອນພະຍາດຕາບອດທີ່ສາມາດປ້ອງກັນ ແລະ ຫຼີກລ້ຽງໄດ້.
ທ່ານ ຈັນທະບູນ ໂພຊະສານ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ ຍັງໄດ້ກ່າວຕື່ມວ່າ: ເພື່ອໃຫ້ສັງຄົມຍົກສູງຄວາມຮູ້ ແລະ ເຂົ້າໃຈກ່ຽວກັບບັນຫາການປ້ອງກັນການປິ່ນປົວພະຍາດຕາ ທີ່ຈະພາໃຫ້ຕາບອດ, ດັ່ງນັ້ນ ເພື່ອປ້ອງກັນຕາບອດ ຕ້ອງຂະຫຍາຍການບໍລິການການຮັກສາສຸຂະພາບຕາ ລວມທັງການປ້ອງກັນ ແລະ ການປິ່ນປົວໃຫ້ເປີດກ້ວາງການຮັກສາສຸຂະພາບຕາຢ່າງທົ່ວເຖີງ ແລະ ຊ່ວຍຫຼຸດຜ່ອນຈຳນວນການເປັນຕາບອດໄດ້. ມັນແມ່ນພັນທະສ່ວນໜຶ່ງ ທີມີຄວາມຈຳເປັນ ຈະຕ້ອງໄດ້ເຮັດເພື່ອບັນລຸມາດຖານສູງສຸດຂອງການມີສຸຂະພາບຕາທີ່ດີ, ໃນຈຳນວນຄົນທີ່ຕາບອດ ທີ່ສາມາດຫຼີກລ້ຽງໄດ້ 20 ສ່ວນຮ້ອຍ, ແມ່ນມາຈາກການປ້ອງກັນ ແລະ ອີກ 60 ສ່ວນຮ້ອຍ, ແມ່ນມາຈາກການປິ່ນປົວ. ສະນັ້ນ ທາງໜ່ວຍງານປິ່ນປົວຕາແຂວງວຽງຈັນ ໂດຍສົມທົບກັບໂຮງໝໍເມືອງວັງວຽງ ເຊິ່ງໄດ້ຮັບທຶນສະໜັບສະໜຸນ ຈາກອົງການຈັດຕັ້ງສາກົນມູນນິທິເຟຼດໂສໂລ ໃຫ້ມີການຈັດຕັ້ງກິດຈະກຳ ການໂຄສະນາ ເພື່ອເຜີຍແຜ່ໃຫ້ຄວາມຮູ້ແກ່ຊຸມຊົນໃນການປ້ອງກັນຕາບອດ ແລະ ໃຫ້ການບໍລິການກວດປິ່ນປົວຜ່າຕັດ ໃຫ້ແກ່ຜູ້ທີ່ມີບັນຫາກ່ຽວກັບຕາໂດຍສະເພາະແມ່ນພະຍາດແກ່ນຕາຂຸ້ນ ແລະ ສ່ວນຫຼາຍພະຍາດນີ້ມັກຈະເກີດກັບແມ່ຍິງ ທີ່ບໍ່ມັກມາກວດຕາ, ຖືເບົາທັງໆທີ່ຜູ້ຍິງເຮົາ ມີຄວາມສ່ຽງຫຼາຍກວ່າຜູ້ຊາຍ ເຊັ່ນ: ມີຄວາມສ່ຽງກ່ຽວກັບຝຸ່ນ, ຄັວນ, ແສງ ແລະ ສະພາບອື່ນໆ.
ຫລັງຈາກນັ້ນກໍ່ໄດ້ມີການໂຄສະນາ 3 ພະຍາດ ຄື: ພະຍາດແກ່ນຕາຂຸ້ນ, ພະຍາດຕາແດງ ແລະ ອຸບັດຕິເຫດຕ່າງໆ ທີ່ພາໃຫ້ຕາບອດ. ຕອນທ້າຍ, ຍັງໄດ້ມີການບໍລິການເຊັກສຸຂະພາບຕາ ແລະ ບໍລິການແທກແວ່ນຕາອ່ານໜັງສືບໍ່ໄດ້ ພ້ອມກັບ ແຈກຍ້າຍແວ່ນໃຫ້ພໍ່ແມ່ປະຊາຊົນຜູ້ທີ່ມີບັນຫາກ່ຽວສາຍຕາສັ້ນຕື່ມອີກ
ຂອບໃຈທີມຂ່າວ ເມືອງວັງວຽງ
Editor: ກຳປານາດ ລັດຖະເຮົ້າ
