ໂຮງໝໍເມືອງຫົງສາ, ແຂວງໄຊຍະບູລີ ຈັດພິທີສະເຫຼີມສະຫຼອງວັນແພດລາວ ປະຈໍາປີ 2018 ຂື້ນ, ໃນຕອນເຊົ້າອງວັນທີ 19 ມິຖຸນາ 2018, ຢູ່ທີ່ເດີ່ນໂຮງໝໍເມືອງ, ໂດຍການເປັນກຽດເຂົ້າຮ່ວມຂອງ ທ່ານນາງ ດາວິນ ລາດສະກິດ ຮອງເຈົ້າເມືອງຫົງສາ, ມີ ທ່ານ ຂັນທອງ ແສນໂສພາ ຮອງຫົວໜ້າຫ້ອງການສາທາລະນະສຸກເມືອງ, ມີ ທ່ານ ດຣ ສົມພອນ ໂພພິລັກ ຫົວໜ້າໂຮງໝໍເມືອງຫົງສາ, ມີພະນັກງານຫ້ອງການສາທາລະນະສຸກເມືອງ, ແພດໝໍປະຈຳໂຮງໝໍເມືອງ, ໂຮງໝໍນ້ອຍ, ສຸກສາລາ, ພະນັກງານອາວຸໂສບຳນານ ແລະ ແຂກຖືກເຊີນເຂົ້າຮ່ວມທັງໝົດ 150 ກວ່າຄົນ.
ໃນໂອກາດນີ້ ທ່ານນາງ ດາວິນ ລາດສະກິດ ໄດ້ໃຫ້ກຽດຂື້ນກ່າວປາໄສ ເຊິ່ງທ່ານໄດ້ຍົກໃຫ້ເຫັນເຖິງປະຫວັດຄວາມເປັນມາຂອງແພດລາວ ເພື່ອຈາລຶກຄຸນງາມຄວາມດີຂອງແພດ-ໝໍ ແລະ ພັກນັກງານສາທາລະນະສຸກ ທີ່ໄດ້ປະກອບສ່ວນເຂົ້າໃນການຮັກສາສຸຂະພາບຂອງປະຊາຊົນ, ພະນັກງານ, ທະຫານຕຳຫຼວດໃນຂະບວນການຕໍ່ສູ້ກູ້ຊາດໃນເມື່ອກ່ອນ ກໍ່ຄືການປົກປັກຮັກສາ ແລະ ສ້າງສາປະເທດຊາດໃນປະຈຸບັນ, ເພື່ອປູກຈິດສຳນຶກໃຫ້ແກ່ແພດໝໍ ແລະ ພະນັກງານສາທາລະນະສຸກ ຮຸ້ນສືບທອດໄດ້ຮ່ໍາຮຽນເອົາແບບຢ່າງອັນດີງາມ ເຝິກຝົນຫຼໍ່ຫຼອມຕົນເອງໃຫ້ກາຍເປັນແພດໝໍທີ່ພຽບພ້ອມໄປດ້ວຍຄຸນສົມບັດ, ຈັນຍາທໍາວິຊາຊີບ ແລະ ຄວາມຊໍານານດ້ານວິຊາສະເພາະໃຫ້ສົມນາມວ່າ: ເປັນນັກຮົບເສື້ອຂາວປະຕິວັດຂອງພັກປະຊາຊົນປະຕິວັດລາວ.
ວັນແພດລາວ ແມ່ນວັນສຳຄັນອັນໜຶ່ງ ທີ່ເປັນປະຫວັດອັນລ້ຳຄ່າ ຄຽງຄູ່ກັບຂະບວນການຕໍ່ສູ້ກູ້ຊາດໃນແຕ່ລະໄລຍະຂອງຊາດລາວ ແລະ ແໜງການສາທາລະນະສຸກ ເປັນວັນສ້າງຂະບວນການ, ກິດຈະກຳຕ່າງໆ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດ ກໍ່ຄືສະໄໝປົກປັກຮັກສາ ແລະ ພັດທະນາປະເທດຊາດ, ປຸກລະດົມມວນຊົນ ໃຫ້ເຫັນຄວາມສຳຄັນ, ເຂົ້າໃຈ ແລະ ເປັນເຈົ້າການໃນການກັນພະຍາດ, ສົ່ງເສີມ ແລະ ຮັກສາສຸຂະພາບຂອງຕົນເອງ, ຄອບຄົວ ແລະ ສັງຄົມ, ອີກດ້ານໜຶ່ງ ກໍ່ເພື່ອເຮັດໃຫ້ປະຊາຊົນລາວບັນດາເຜົ່າ, ທຸກຊັ້ນຄົນ ໄດ້ເຫັນການເຕີບໃຫຍ່ຂະຫຍາຍຕົວທາງດ້ານສາທາລະນະສຸກຢ່າງບໍ່ຢຸດຢັ້ງ ໃນຖັນແຖວແພດໝໍໃນແຕ່ລະໄລຍະ.
ເພື່ອຕອບສະໜອງເຈຕະນາລົມຂອງ ປະທານ ໄກສອນ ພົມວິຫານ ທີ່ໄດ້ກ່າວໃນທ່າຍຂອງກອງປະຊຸມສາທາລະນະສຸກໃນທົ່ວປະເທດ ຄັ້ງທີ 2, ວັນທີ 11 ມີນາ 1987, ກະຊວງສາທາລະນະສຸກຈຶ່ງໄດ້ນຳສະເໜີຕໍ່ສະພາແຫ່ງຊາດ ແລະ ຮັບຮອງເອົາວັນທີ 18 ມິຖຸນາ ຂອງແຕ່ລະປີ ເປັນວັນແພດລາວ ເຊິ່ງໄດ້ລະບຸໄວ້ໃນກົດໝາຍປິ່ນປົວ ສະບັບປັບປຸງໃນປີ 2014, ດັ່ງນັ້ນທົ່ວພັກ, ທົ່ວປວງຊົນລາວ ຈຶ່ງໄດ້ພ້ອມກັນຈັດພິທີສະເຫຼີມສະຫຼອງວັນແພດລາວຂື້ນທົ່ວປະເທດ ເປັນຄັ້ງທຳອິດໃນປີ 2018 ເພື່ອໃຫ້ສົມຖານະບົດບາດ ແລະ ຄຸນງາມຄວາມດີຂອງແພດໝໍທີ່ມີຕໍ່ປະເທດຊາດຕະຫຼອດມາ.
ໃນຕອນທ້າຍກໍ່ໄດ້ມີການ ກວດສຸຂະພາບໃຫ້ແກ່ ການນຳຂອງເມືອງ, ພະນັກງານອາວຸໂສ-ບຳນານ ແລະ ແຂກທີ່ຖືກເຊີນຕື່ມອີກ,
ແຫລ່ງຂ່າວ ສົມປອງ ປະເສີດກຸນ ທີມຂ່າວ ເມືອງຫົງສາ
Editor: ກຳປານາດ ລັດຖະເຮົ້າ
