ວັນທີ 18 ມີຖຸນາ2018 ນີ້ ຢູ່ທີ່ໂຮງຮຽນມໍສໍລ້ອງແຈ້ງໄດ້ຈັດພິທີເປີດບັ້ນການສອບເສັງຈົບຊັ້ນມັດທະຍົມຕອນປາຍ ມ 7 ຢູ່ສູນສອບເສັງ ມສ ລ້ອງແຈ້ງ ແຂວງໄຊສົມບູນ ໂດຍພາຍໃຕ້ການເປັນປະທານ ທ່ານ ຊົ່ວເຊັ່ງ ຈື່ວ່າໜໍ່ເຮີລໍ່ ເລຂາພັກເມືອງ ເຈົ້າເມືອງລ້ອງແຈ້ງ, ທ່ານ ສືຢ່າງ ຊາວາ ຫົວໜ້າຂະແໜງບໍລິຫານ-ການເງີນ ພະແນກສຶກສາທິການ ແລະ ກິລາແຂວງໄຊສົມບູນ, ທ່ານ ບົວທອງ ພົມມະນີຜູ້ອຳນວຍການ ໂຮງຮຽນ ມສ ລ້ອງແຈ້ງ ມີທ່ານ ອາຍຊົ່ງ ນະວົງໄຊ ຮັກສາການຫົວໜ້າຫ້ອງການສຶກສາທິການ-ກິລາເມືອງ ,ພະນັກງານຄູອາຈານ ຕະຫຼອດຮອດນັກຮຽນເຂົ້າຮ່ວມທັງໝົດ 50 ກວ່າຄົນ.

ໃນພິທີ ທ່ານ ອາຍຊົ່ງ ນະວົງໄຊ ໄດ້ຜ່ານຂໍ້ຕົກລົງ ຂອງເຈົ້າແຂວງໄຊສົມບູນ ວ່າດ້ວຍການແຕ່ງຕັ້ງຄະນະກຳມະການ ລົງຕິດຕາມ ແລະ ອະນຸກຳມະການລົງຊີ້ນໍາ ແຕ່ລະສູນສອບເສັງ ຈົບຊັ້ນມັດທະຍົມສຶກສາຕອນປາຍ ສະບັບເລກທີ 463/ຈຂ ຊບ ລົງວັນທີ 11.5.2018 ສໍາລັບຢູ່ສູນສອບເສັງ ມສ ລ້ອງແຈ້ງ ໄດ້ຕົກລົງແຕ່ງຕັ້ງ ທ່ານເຈົ້າເມືອງ ເປັນປະທານ, ທ່ານ ສືຢ່າງ ຊາວາ ແລະ ທ່ານ ອາຍຊົງ ນະວົງໄຊ ເປັນຮອງປະທານ , ທ່ານ ຢີວື ແລະ ຜູ້ອຳນວຍການໂຮງຮຽນ ມສ ລ້ອງແຈ້ງ ເປັນກຳມະການ ຊື່ງສູນສອບເສັງລ້ອງແຈ້ງໄດ້ແບ່ງອອກເປັນ 2 ຫ້ອງ, ມີຄະນະອະນຸກຳມະການຍາມຫ້ອງສອບເສັງ 4 ທ່ານ ມີນັກຮຽນເຂົ້າເສັງທັງໝົດ 43 ຄົນ,ຍີງ 9 ຄົນ.

ຈາກນັ້ນບັນດາທ່ານທີ່ເຂົ້າຮ່ວມຍັງໄດ້ຮັບຟັງ ການຜ່ານຂໍ້ຕົກລົງ ຂອງລັດຖະມົນຕີກະຊວງ ສືກສາທິການ ແລະ ກິລາ ຈາກທ່ານ ສືຢ່າງ ຊາວາ ຊື່ງຂໍ້ຕົກລົງສະບັບນີ້ແມ່ນໄດ້ກຳລະບຽບຫຼັກການກ່ຽວກັບການສອບເສັງຈົບຊັ້ນມັດທະຍົມສຶກສາຕອນປາຍ ເພື່ອໃຫ້ເປັນລະບົບ, ມີຄວາມໂປ່ງໃສ,ຍຸຕິທຳ ຮັບປະກັນຄຸນນະພາບ ແລະ ປົກປ້ອງ ຜົນປະໂຫຍດຢ່າງຊອບທຳ ຂອງຄູອາຈານ ແລະ ນັກຮຽນ ໂດຍສະເພາະແມ່ນ ພາລະບົດບາດ,ສິດ ແລະ ໜ້າທີ່,ມາດຕະການ, ລະບຽບຫຼັກການ ແລະ ຂໍ້ຫ້າມຕ່າງໆ ຂອງຄະນະກໍາມະການ ແລະ ນັກຮຽນ ໃນນັ້ນຕໍ່ຄະນະກຳມະການຍາມຫ້ອງ ຫ້າມອານຸຍາດໃຫ້ນັກຮຽນເຂົ້າຫ້ອງສອບເສັງໂດຍບໍ່ມີບັດສອບເສັງ,ຫ້າມຕັດຊອງຫົວບົດສອບເສັງ ກ່ອນເວລາສອບເສັງເກີນ 5 ນາທີ ແລະ ຂໍ້ຫ້າມອື່ນໆ ທີ່ບໍ່ຖືກຕ້ອງສອດຄອງຕາມລະບຽບຫຼັກການ ສໍາລັບ ນັກຮຽນຫ້າມຂຶ້ນຫ້ອງຊ້າ ຫຼື ກາຍເວລາ ເກີນ15 ນາທີ, ຫ້າມໃຊ້ສຽງດັງ ,ສ້າງຄວາມວຸ້ນວາຍ ລົບກວນ ໃນເວລາເຂົ້າຫ້ອງສອບເສັງ ແລະ ຫ້າມໃຊ້ໂທລະສັບ ຫຼື ເຄື່ອງສືສານ ຕິດຕໍ່ພົວພັນກັບບຸກຄົນນອກ ແລະ ບັນດາຂໍ້ຫ້າມອື່ນ ຕາມທີ່ຂັ້ນເທີງໄດ້ກໍານົດໄວ້

ໃນໂອກາດດັ່ງກ່າວນີ້ ທັງຕາງໜ້າພະແນກສືກສາທິການ ແລະ ກິລາ ຍັງໄດ້ມອບ ຫົວບົດສອບເສັງແຕ່ລະວິຊາ ໃຫ້ແກ່ ປະທານຊີ້ນໍາການສອບເສັງ ໃນຄັ້ງນີ້ ເພື່ອເກັບຮັກສາໄວ້ ຊຶ່ງການສອບເສັງແມ່ນຈະໄດ້ເລີ່ມແຕ່ວັນທີ່ 19-20 ມີຖຸນາ ນີ້ ຈື່ງສໍາເລັດ.

ຕອນທ້າຍຂອງພິທີ ທ່ານເຈົ້າເມືອງຍັງໄດ້ໂອ້ລົມເໜັ້ນໜັກໃຫ້ບັນດາຄະນະກຳມະການ ແລະ ນັກສອບເສັງ ເອົາໃຈໃສ່ປະຕິບັດຕາມລະບຽບຫຼັກການ ແລະ ຕັ້ງໃຈເຮັດໜ້າທີ່ ຕາມຄວາມຮັບຜິດຊອບຂອງຕົນເອງດ້ວຍຄວາມຮັບຜິດຊອບສູງ ເຮັດໃຫ້ໄດ້ຮັບຜົນດີ ,ສໍາລັບນັກສອບເສັງກໍ່ໃຫ້ພະຍາຍາມສຸມໃສທຸກແນວຄິດສະຕິປັນຍາ ທີ່ໄດ້ຮໍ່າຮຽນຜ່ານມາ ແລະ ສອບເສັງຈົບຊັ້ນໃນຄັ້ງນີ້ໃຫ້ແຕ່ລະຄົນ ເສັງໄດ້ຄະແນະດີ ແລະ ມີໃບໜ້າອັນໃໝ່ ຢູ່ໃນສະຖາບັນອື່ນໆ ຕາມຄວາມມຸ້ງຫວັງ.

 ແຫລ່ງຂ່າວ: ທີມຂ່າວເມືອງລ້ອງແຈ້ງ

Editor: ກຳປານາດ ລັດຖະເຮົ້າ