ກອງປະຊຸມດັ່ງກ່າວໄດ້ຈັດຂື້ນ ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງຊໍາໃຕ້ ແຂວງຫົວພັນ ໂດຍໃຫ້ກຽດເຂົ້າຮ່ວມຂອງ ທ່ານ ພອນປະດິດ ສໍວັນໄຊ ຫົວໜ້າຂະແໜງແຜນການ ແລະ ການລົງທືນ, ພະແນກແຜນການ ແລະ ການລົງທືນແຂວງຫົວພັນ, ມີພະນັກງານວິຊາການຫ້ອງການກ່ຽວຂ້ອງຂອງເມືອງ ເຂົ້າຮ່ວມ
ໃນກອງປະຊຸມ ທ່ານ ສຸກກະເສີມ ສອນສະຫັວດ ກຳມະການພັກເມືອງ ຫົວໜ້າຫ້ອງການແຜນການ ແລະ ການລົງທືນເມືອງຊຳໃຕ້ ໄດ້ສະຫຼຸບລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມກາງສະໄໝ 2 ປີເຄີ່ງທີ່ຜ່ານມາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ ວຽກງານແຜນການ ແລະ ການລົງທືນໃຫ້ຮູ້ວ່າ: ເມືອງຊຳໃຕ້ມີຄວາມສະຖຽນລະພາບສະພາບທາງດ້ານການເມືອງ, ດ້ານເສດຖະກິດມີການຂະຫຍາຍຕົວຢ່າງຕໍ່ເນື່ອງ ລາຍຮັບລວມຍອດບັນລຸໄດ້ ( 275 ຕື້ 880 ລ້ານກວ່າກີບ,) ທຽບໃສ່ແຜນການປະຕິບັດໄດ້ 71% ລາຍໄດ້ສະເລ່ຍຕໍ່ຫົວຄົນເທົ່າກັບ 7 ລ້ານ 12.840 ກີບ ຕໍ່ຄົນຕໍ່ປີ ທຽບໃສ່ແຜນການປະຕິບັດໄດ້ 73,18% ອັດຕາການເຕີບໂຕທາງດ້ານເສດຖະກິດເທົ່າກັບ 8,27%, ຂະແໜງກະສິກຳ ແລະ ປ່າໄມ້ເພີ່ມຂື້ນ 6,23% ກວມເອົາ 41,67% ຂອງລາຍຮັບທັງໝົດ, ຂະແໜງອຸດສາຫະກໍາເພີ່ມຂື້ນ 8,18% ກວມເອົາ 40,64% ຂອງລາຍຮັບທັງໝົດ, ຂະແໜງບໍລິການເພີ່ມຂື້ນ 10,76% ກວມເອົາ 17,69% ຂອງລາຍຮັບທັງໝົດ. ແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 (2016-2020) ໄດ້ກຳນົດເອົາ 7 ແຜນງານ 119 ໂຄງການ ເປັນມູນຄ່າ ( 1 ພັນ 104 ຕື້ 690 ລ້ານກີບ ) ປະຕິບັດໄດ້ແລ້ວເປັນມູນຄ່າ 438 ຕື້ 870 ລ້ານກີບ ກວມເອົາ 39,72% ຂອງການລົງທືນທັງໝົດ, ມີິ 53 ໂຄງການ ກວມເອົາ 44,53% ຂອງໂຄງການທັງໝົດ ໃນນັ້ນໂຄງການລົງທືນຂອງລັດ 27 ໂຄງການ, ໂຄງການສະເໜີໃໝ່ 3 ໂຄງການ, ໂຄງການສືບຕໍ່ 18 ໂຄງການ, ໂຄງການສຳລະໜີ້ 6 ໂຄງການ ສຳລັບແຜນໃນຕໍ່ໜ້າຈະສູ້ຊົນສ້າງລາຍຮັບໃຫ້ບັນດຸ 388 ຕື້ 560 ລ້ານກວ່າກີບ, ສະເລ່ຍຕໍ່ຫົວຄົນໃຫ້ໄດ້ 9 ລ້ານ 582.821 ກີບ/ຄົນຕໍ່ປີ, ສະເໜີໂຄງການລົງທືນຂອງລັດໃຫ້ໄດ້ 15-20 ໂຄງການ ແລະ ສືບຕໍ່ຈັດຕັ້ງປະຕິບັດໂຄງການລົງທືນຂອງລັດໃຫ້ຖືກຕ້ອງສອດຄ່ອງກັບລະບຽບກົດໝາຍ.
Editor: ກຳປານາດ ລັດຖະເຮົ້າ
