ກອງປະຊຸມດັ່ງກ່າວ ໄດ້ຈັດຂື້ນໃນວັນທີ 20 ມີຖຸນາ 2018 ທີ່ຜ່ານມາ ຢູ່ຫໍປະຊຸມໃຫຍ່ ຂອງແຂວງອັດຕະປື ໂດຍການເປັນປະທານ ຂອງທ່ານ ປອ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ມີ ທ່ານ ສຸກສະໃຫມ ຈັນທະມາດ ຮອງເຈົ້າແຂວງອັດຕະປື, ເຂົ້າຮ່ວມມີ ຫົວຫນ້າກົມ ຈາກກະຊວງ, ຫົວຫນ້າພະແນກການທີ່ກ່ຽວຂ້ອງ 3 ແຂວງພາກໃຕ້, ອົງການຈັດຕັ້ງສາກົນ ຂອງສະຫະປະຊາຊາດ ດ້ານເຄຫາສະຖານ, ລັດວິສາຫາກິດ ນໍ້າປະປາ 3 ແຂວງ ແລະ ຫນ່ວຍງານທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ທ່ານ ປອ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ກ່າວວ່າ: ກອງປະຊຸມຄັ້ງນີ້ ນັບວ່າເປັນຄັ້ງທີ 2 ທີ່ຄະນະຊີ້ນໍາໂຄງການ ໃນການພັດທະນາລະບົບໂຄງລ່າງ ການສະຫນອງນໍ້າ ແລະ ສຸຂະພິບານ ໃຫ້ທົນທານກັບການປັບຕົວເຂົ້າກັບສະພາບອາກາດ ແລະ ໄພພິບັດ ທີ່ມີຄວາມສ່ຽງຫລາຍທີ່ສຸດ ໃນຖີ່ນຊົນນະບົດ ແລະ ຕົວເມືອງ ໃນ ສປປ ລາວ. ເວົ້າລວມ-ເວົ້າສະເພາະ ກໍ່ຄືໃນ 3 ແຂວງພາກໃຕ້ ຄື: ແຂວງສາລະວັນ, ແຂວງເຊກອງ ແລະ ແຂວງອັດຕະປື. ລວມທັງໝົດ ມີ 8 ຕົວເມືອງ, ແລະ ຈໍານວນ 189 ບ້ານ. ອົງການສະຫະປະຊາຊາດດ້ານເຄຫາສະຖານ ໄດ້ໃຫ້ການສະຫນັບສະຫນູນຊ່ວຍເຫລືອ 3 ແຂວງ ເພື່ອພັດທະນາໃຫ້ຊຸມຊົນຫລຸດພົ້ນອອກຈາກຄວາມທຸກຍາກ ແລະ ປັບປູງຊີວິດການເປັນຢູ່ ຂອງຊຸມຊົນ ໃຫ້ດີຂື້ນ ເທື່ອລະກ້າວ.
ກອງປະຊຸມດັ່ງກ່າວ ຜູ້ເຂົ້າຮ່ວມ ຍັງໄດ້ຮັບຟັງການສະເໜີສະພາບລວມຂອງໂຄງການ, ການປະເມີນຄວາມສ່ຽງ, ຄວາມຄຶບຫນ້າຂອງໂຄງການ, ການປະເມີນຄວາມສ່ຽງໂດຍການນໍາໃຊ້ເຄື່ອງມືທີ່ທັນສະໄຫມ, ພ້ອມກັນນີ້ ຍັງໄດ້ຮັບຟັງການປະເມີນຄວາມສ່ຽງ ຂອງແຂວງສາລະວັນ, ແຂວງເຊກອງ ແລະ ແຂວງອັດຕະປື., ການແນະນໍາແຜນການໃນການປົກປັກຮັກສາສິ່ງແວດລ້ອມ-ສັງຄົມ ແລະ ບົດສະເໜີໂຄງການຕົວແບບ ທີ່ໄດ້ກໍ່ສ້າງລະບົບນໍ້າປະປາ ຂະຫນາດນ້ອຍ ໂດຍໃຊ້ລະບົບພະລັງງານແສງຕາເວັນ ຢູ່ທີ່ເມືອງພູວົງ. ກອງປະຊຸມຄັ້ງນີ້ ຜູ້ເຂົ້າຮ່ວມ ຍັງໄດ້ປະກອບຄໍາຄິດເຫັນ ຢ່າງກົງໄປ-ກົງມາ ເພື່ອພ້ອມກັນ ຮັບຮອງແຜນການວຽກງານໃນໄລຍະຕໍ່ໄປ.
ແຫລງຂ່າວ ທີມຂອບຈາກແຂວງອັດຕະປື
Editor: ກຳປານາດ ລັດຖະເຮົ້າ
