ໃນວັນທີ 20 ມີຖຸນາ 2018 ທີ່ຜ່ານມານີ້, ພາກວິຊາປູກຝັງ ຄະນະກະເສດສາດ, ມະຫາວິທະຍາໄລແຫ່ງຊາດ ( ເຂດນາບົງ ) ໄດ້ຈັດກິດຈະກໍາແຂ່ງຂັນດໍານາ ຕາມລະດູການ ປະຈໍາປີ 2018 ພາຍໃຕ້ຫົວຂໍ້: ສຶບສານການເຮັດນາ-ປູກເຂົ້າ ຕາມວິຖິຊິວິດຂອງປະຊາຊົນລາວ ທັງນີ້ກໍ່ເພື່ອເປັນການສ້າງຂະບວນການອອກແຮງງານ ໃຫ້ກັບພະນັກງານຄູອາຈານ ແລະ ນັກສຶກສາ ໃນຄະນະກະເສດສາດ, ສຶບສານ ສ້າງຄົນລຸ້ນສຶບທອດທາງວິຊາການດ້ານການກະເສດ ໄດ້ມີທັດສະນະໃນການອອກແຮງງານ.

ເຂົ້າຮ່ວມໃນຂະບວນການ ຄັ້ງນີ້ ມີ ທ່ານ ຮອງສາດສະດາຈານ ຟອງສະມຸດ ສຸທໍາມະວົງ ຄະນະບໍດີ ຄະນະກະເສດສາດ ມະຫາວິທະຍາໄລແຫ່ງຊາດ, ພ້ອມຄະນະ ແລະ ນອກຈາກນີ້ ຍັງຫົວຫນ້າພາກວິຊາຕ່າງໆ 4 ພາກ, ພະແນກອ້ອມຂ້າງ ນັກສຶກສາ ຈາກສາຂາວິຊາ ຕ່າງໆ 5 ສາຂາ ເຂົ້າຮ່ວມ 100 ກວ່າຄົນ,
ທ່ານ ຄະນະບໍດີ ຄະນະກະເສດສາດ ໄດ້ກ່າວວ່າ: ກິດຈະກໍາແຂ່ງດໍານາ ດັ່ງກ່າວ ຈັດຂື້ນເພື່ອເປັນການສືບທອດມູນເຊື້ອອັນດີງາມ ຄວາມດຸຫມັ້ນຂອງປະຊາຊົນລາວບັນດາເຜົ່າ ໃນການປູກເຂົ້າ. ແລະ ມື້ນີ້ ທາງຄະນະກະເສດສາດ ກໍ່ຄືພາກວິຊາປູກຝັງ ໄດ້ດໍາເນີນພິທີນີ້ຂື້ນ ເພື່ອແນໃສ່ໃຫ້ນັກສຶກສາຄະນະກະເສດສາດ ໄດ້ຮຽນຮູ້ ເຕັກນິກຂອງການດໍານາ ທັງເປັນການສຶບທອດມູນເຊື້ອອັນດີງາມ, ຄວາມດຸຫມັ່ນ ທີ່ມີມາກັບປະຊາຊົນລາວ. ເຂົ້າຖືເປັນອາຫານຫລັກຂອງຄົນລາວ ການຜະລິດເຂົ້າໃນ ສປປ ລາວ ຍັງເປັນທ່າແຮງຕົ້ນຕໍ ແລະ ອິງໃສ່ທໍາມະຊາດເປັນຫລັກ, ມີຫລາຍຊະນິດແນວພັນ ທີ່ມີເຕັກນິກໃນການຜະລິດ. ສໍາລັບ ຄະນະກະເສດສາດ ແມ່ນຖືເອົາການຮຽນ ໄປຄຽງຄູ່ກັບການສາທິດຕົວຈິງ ໄປພ້ອມໆກັນ, ໂດຍປະຕິບັດ 4 ເຕັກນິກ ເຊັ່ນ: ການປັກດໍາ, ການຢອດ, ການໂຍນ ແລະ ກາກີບດຽວ.

ສໍາລັບ ສປປ ລາວ ການຜະລິດເຂົ້າ ສາມາດສູ້ຊົນໄດ້ 4,3 ລ້ານໂຕນ/ປີ ແລະ ໄດ້ສົ່ງອອກຂາຍໄປຕ່າງປະເທດຈໍານວນຫນຶ່ງ, ການຜະລິດອາຫານແມ່ນມີພຽງພໍເພື່ອບໍລິໂພກ. ສາມາດບັນລຸໄດ້ ໃນການຮັບປະກັນດ້ານສະບຽງອາຫານ. ການຈັດກິດຈະກໍາດໍານາ ສຶບສານການເຮັດນາ-ປູກເຂົ້າ ຕາມວິຖິຊິວິດຂອງປະຊາຊົນລາວ ແມ່ນໄດ້ຈັດຂື້ນທຸກໆປີ ໂດຍສະເພາະ ນັກສຶກສາປີທີ 1 ໃນທຸກສາຂາວິຊາ ຟດ້ມີສ່ວນຮ່ວມ ໂດຍຈັດໃຫ້ມີການແຂ່ງຂັນດໍານາ ແລະ ໃຫ້ລາງວັນແກ່ນັກສຶກສາ ທີ່ດໍາໄດ້ໄວ, ງາມ ຖືກຕ້ອງຕາມເຕັກນິກ ແລະ ລະບຽບການກໍານົດໄວ້, ທັງເປັນການສ້າງຄວາມຮັກແພງສາມັກຄີ ລະຫວ່າງ ນັກສຶກສາ ກັບຄູອາຈານ ແລະ ນັກສຶກສາດ້ວຍກັນ.

Editor: ກຳປານາດ ລັດຖະເຮົ້າ