ທິດຜ່ານມາຢູ່ຫ້ອງປະຊຸມເມືອງເຊໂປນ ໄດ້ຈັດກອງປະຊຸມປຶກສາຫາລືຊອກຫາວິທີແກ້ໄຂກ່ຽວກັບບັນຫາ ກິ່ນຂີ່ວເໜັນ ຈາກໂຮງງານ ຜະລິດເຈ້ຍ ຂອງບໍລິສັດ ຊັນເປເປີໂຮນດິງ ຈຳກັດ ແລະ ທົບທວນຄືນຕາມບົດບັນທຶກກອງປະຊຸມໃນຄັ້ງວັນທີ 9 ມີຖຸນາ 2018 ຂອງພະແນກຊັບພະຍາກອນ ທຳມະຊາດ ແລະ ສິ່ງແວດລ້ອມແຂວງສະຫວັນນະເຂດ, ສົມທົບກັບຫ້ອງການຊັບພະຍາກອນ ທໍາມະຊາດ ແລະ ສິ່ງແວດລ້ອມເມືອງເຊໂປນ ຮ່ວມກັບ ບໍລິສັດ ຊັນເປເປິໂຮນດິງລາວ ຈຳກັດ, ໂດຍການເປັນປະທານຂອງ ທ່ານ ພູທອນ ຍອດບຸນເຮືອງ ຫົວໜ້າພະແນກຊັບພະຍາກອນທະມະຊາດ ແລະ ສິ່ງແວດລ້ອມແຂວງສະຫວັນນະເຂດ ພ້ອມຄະນະ, ມີບັນດາທ່ານຄະນະປະຊາຊົນ, ຫ້ອງການອ້ອມຂ້າງເມືອງທີ່ກ່ຽວຂ້ອງຂັ້ນເມືອງ ຮ່ວມກັບ ບໍລິສັດ ຊັນເປເປີໂຮນດິງລາວ ຈຳກັດ ຈຳນວນ 15 ທ່ານ ເຂົ້້າຮ່ວມ.
ຈຸດປະສົງໃນການຈັດກອງປະຊຸມກໍ່ເພື່ອປຶກສາຫາລື ຊອກຫາວິທີແກ້ໄຂກ່ຽວກັບບັນຫາກິ່ນຂີ່ວເໜັນ ປ່ອຍສານເຄມີທາງອາກາດ ແລະ ທໍ່ລະບາຍນໍ້າເສຍ ລົງສູ່ນໍ້າເຊບັ້ງຫຽງ ຂອງບໍລິສັດໂຮງງານ ຊັນເປເປີໂຮນດີ້ງລາວ ຈໍາກັດ, ເພື່ອຊອກຫາທິດທາງແກ້ໄຂ ແລະ ປັບປຸງບັນຫາກິ່ນຂີ່ວ ເໜັນດັ່ງກ່າວ, ໂດຍສະເພາະການຢຽວຢາຈິດໃຈດ້ານສຸຂະພາບຂອງປະຊາຊົນ ທີ່ເກີດຈາກຂະບວນການທົດລອງຜະລິດເຈ້ຍຂອງບໍລິສັດ ຊັນເປເປີໂຮນດິງລາວ ຈຳກັດ, ໃນກອງປະຊຸມກໍ່ໄດ້ຮັບຟັງການລາຍງານປະກອບຄຳຄິດຄຳເຫັນຈາກພາກສ່ວນທີ່ກ່ຽວຂ້ອງ ແລະ ຜູ້ຕາງໜ້າບໍລິສັດ, ຕໍ່ກັບບັນຫາກິ່ນຂີ່ວທີ່ເກີດຂື້ນໃນໄລຍະຜ່ານມາແມ່ນມີມູນຄວາມຈິງແທ້ ແລະ ຍັງພົບເຫັນມີເສດຕະກອນຕົກເຮ່ຍຕາມສາຍທາງໃນເວລາຂົນສົ່ງໄປຍັງຈຸດຝັງກົບ, ຜ່ານການປຶກສາ, ແລກປ່ຽນຄໍາຄິດຄໍາເຫັນໃນກອງປະຊຸມໄດ້ເຫັນດີ ແລະ ເປັນເອກະພາບກັນເຫັນດີສະເໜີໃຫ້ທາງບໍລິສັດ ປະຕິບັດຕາມບົດບັນທຶກກອງປະຊຸມໃນຄັ້ງວັນທີ 9 ມີຖຸນາ 2018 ຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງສະຫວັນນະເຂດ, ສົບທົບກັບຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງເຊໂປນ ຮ່ວມກັບ ບໍລິສັດ ຊັນເປເປິໂຮນດິງລາວ ຈຳກັດ ໃຫ້ສຳເລັດໂດຍໄວ, ສະເໜີໃຫ້ບໍລິສັດຕອບສະ ໜອງ ແລະ ແຈກຢາຍອຸປະກອນປ້ອງກັນກິ່ນ ແລະ ຝຸ່ນລະອອງ ເຊັ່ນ: ຜ້າປິດປາກ ແລະ ໜ້າກາກອານາໄມ ໃຫ້ພໍ່ແມ່ປະຊາຊົນໃນຂອບເຂດທີ່ໄດ້ຮັບຜົນກະທົບໄດ້ສວມໃສ່ໃນກໍລະນີເກີດບັນຫາແບບກະທັນຫັນ, ສະເໜີບໍລິສັດສະໜອງອຸປະກອນປ້ອງກັນຄວາມປອດໄຟໃຫ້ກໍາມະກອນໃນໂຮງງານ,ແຂກທີ່ມາເຮັດວຽກ ແລະ ຢ້ຽມຢາມເພາະມີຄວາມສ່ຽງອາດເກີດອຸປະຕິເຫັດ, ຕິດປ້າຍແຈ້ງເຕືອນຄວາມປອດໄຟຕາມຈຸຕ່າງໆພາຍໃນໂຮງງານຢ່າງເໝາະສົມ, ໃນການຂົນສົ່ງເສດຕະກອນໄປຈຸດຝັງກົບ, ຈຸດເກັບມ້ຽນຕ້ອງມີຜ້າປົກປິດ ແລະ ບໍ່ໃຫ້ບັນທຸກເກີນຂະໜາດ,ຕາມສາຍທາງເວລາຂົນສົ່ງ ແລະ ສະເໜີໃຫ້ບໍລິສັດປະຕິບັດຕາມຄໍາສັ່ງຂອງທ່ານເຈົ້າແຂວງສະຫວັນນະເຂດ ວ່າດ້ວຍຢຸດການເກັບຊື້ໄມ້ທຳມະຊາດຈາກປະຊາຊົນ ແລະ ທາງບໍລິສັດຢືນຢັນວ່າຈະແກ້ໄຂບັນຫາກິ່ນ ໃຫ້ສຳເລັດຕາມພັນທະສັນຍາ ແລະ ຖ້າຫາກບໍ່ສຳເລັດກໍ່ຍິນດີປະຕິບັດຕາມການກວດກາ ແລະ ການແນະນຳຂອງສອງຝ່າຍລັດຖະບານ ຕາມລະບຽບກົດໝາຍວາງອອກ.
ແຫລ່ງຂ່າວ ທີມຂ່າວເມືອງເຊໂປນ
Editor: ກຳປານາດ ລັດຖະເຮົ້າ
